MANJETNA 11 - Rabu Athar New Testament (BSI)

Shakhi Anni

¹ Hale kei jiang thingbong anga en sin na an khat an na lui pek, han thaneithiang in a ngirra a ti, “Thuiro, Pathian inn thiang le a thiang mun han Pathian chubeibuk ngaiha ensinro,

² tak-ha Pathian inn thiang va ralla a om inn ha ko makro, ensin maro, hava ko jatdangngai jiang a pek jui, hale anmani ning tha som manli leini tung na a thiang khopui ha an kea an sir rang ke.

³ han kein shakhi anningai jiang ranak ka pek rang ke, ruia kan khit nan ta nikhuo lising khat le riani som ka ruk hi Pathian chong ha an la ri rang ke.”

⁴ Anmani ngaiha Pathian madonna thai mei anni ning an ngir anga, cholopho kung anga anni.

⁵ Tu ang khat ning manmang ranga anti aninko, an bai sung tenna mei hong suak na ta anmani lam ha an thi rang ani, hingahin anmani en lal ngai lam ha thina an nei.

⁶ Anmanin vanram kot an khar tor, rua lui tho noning. Pathian chong an ri karra, tuipuilian nom thisen anga a man suak tor, hale ramuol la a om phur le pai, miring rakip jiang pong nale khodengthei na ripur a hong tir tor.

⁷ Anmanin chong thiang an lui hong sem karra sa ngai ning mei khur tenna an hong suak anmani jiang that nanta ral tor nanti.

⁸ An taksa ngaiha Puma an lui that na mun na siak nan ta hava jet na khopui ko Sodom le Ijip ha ni nati.

⁹ Jatrakip le phung rakip om mingai ning hong nan ta hava mingai ha sun khat le her khat an en rang ke, tak-ha anmaningai ha lui man phum noni u.

¹⁰ Ramuol chunga a omngai ning, anmani ruia an ning asat, an tho, khat le khat kutchoi an kan pek ajarko Pathian chong ri anni ning ramuol chunga a omngai an man pong.

¹¹ Hale ni thum le a her suale, Pathian tenna ring na ha anmani jiang, hong na ta anmanin thui nanti, hava a mu rakip ning a tam tak an ning dong nanti u.

¹² Pathian chong ri anmani a vanram tenna rasa khat an lui jet, hong kalru vanram hin. Anmani en lal mingai ning an en karra sumphaile kan ruaia vanram ma an lut.

¹³ Hiva phatak hin ramuol la ning nu a kan nik, thina mang na a suak mi lising sari an thi a Pathian chubeibuk na inn thiang ha a mang jui, miringngai ning an ning a donga, mitam ning vanram ma Pathian a lian nale a rat na an lui manpak.

¹⁴ Anni chang na pongnai a tor jui, tak-ha an thum chang na khodengthei na ha hong rang ani juia rak tak a!

Pengkul Sari

¹⁵ Hava suale thaneithiang sari chang na pa ning, pengkul a tum karra vanram tenna rasa a ring khat a hong suak a ti, ramuol rakip hi kan puma ama jiang a om jui, hale ama tirlon Mesaia ha ning amongtibuia ramuol la reng chang rang ani jui.

¹⁶ Hale ulianrup somni leimanli an reng ong na mun na a omngai ham, Pathian madonna an hong kiak jui, hale Puma chubei an buk anti,

¹⁷ “Irakip a tor pu Pathian a tun nom, a tuan lai sot alui ni Pathian nang ha kan na manpak, na ranak na ratna ha kan jet hale vai hom ha na phut jui.

¹⁸ Han jat lim le mirakip ning an lui rang, a thi sa mingai jiang chong jen na phut ha a hong jui, Pathian chong ri ngain anlo man an mu rang phat a hong tung jui, nang ranga a thianga alui omngai lo man mu rang phat a hong tung juia sin nom, a lian nom, hale ramuol a manmang ngai chung om manmang na rang phat a hong tung jui!”

¹⁹ Vanram ma Pathian inn khar kot a alui kan long, Pathian chong lam rabu han a kan long ha an mu, hava han pum varra alui var, ning nu alui kan nik, ruo a ri a hale rial alui chul.