MANJETNA 10 - Rabu Athar New Testament (BSI)

Thaneithiang Le Che chun te

¹ Hava suale kei ning thaneithiang khat ka mu, vanram tenna a hong chum, ama ha puonna a kan chun jiak suminsangin alu ha a hil tit, nih anga alui pua, hale a ke ngai ham mei ka cho anga a ti.

² A ma a kut che chun a sin khat a kan longa a om, hale a ke chang tiang han tuionglian na a ngir, hale a vei tiang a ke han tanga a ngirra a om.

³ A man sabakkai rasa anga a hong khek, a hong khek karra rori sari ning an hong sang.

⁴ Anmanin an hong ri, khek rasa suak kein irang kati, “Tak-ha vanram tenna chong ri rasa ka jet karra, rori sari anti han sil ko namro, jiak om jiak maro.”

⁵ Hava suale thaneithiang a ke tuionglian le tanga a siak pa han, vanram tiang a kut a dom ma a siak jui.

⁶ Vanram ma a om irakip ramuol chunga a om tuionglian sunga a om irakip, Pathian ning a kut sin ngai a en karra chongsan alui neia a ti, a pha hi sot lai noning.

⁷ Thaneithiang sari ning pengkul an tum karra Pathian chong lui ri ngain an ri anga Pathian ama a chuan ngaidon ha ala hong tung rang ke.

⁸ Hale kein vanram tenna kai jet chong han a ti, “Nang in chero, hale tuionglian a le tanga a om thaneithiang kut chunga a om che chun luiro.”

⁹ Kein thaneithiang jiang ka chea hava che chun ka hong lam karra a man luiro a ti; “Chakro, na von na a kha rang ke tak-ha na bai a ko khuai ning anga thum nati.”

¹⁰ Hale kein ama kut chunga che chun ha ka lui a ka lui chak, ha khuai ning anga a thum, ka lem karra ka von na a kha jui.

¹¹ Hava suale kei jiang a na ri, “Nang in vei khat ramuol la a om phung rakip le reng rakip jiang chong ha ripero.”