KOLOSIA 4 - Rabu Athar New Testament (BSI)

¹ Mi neipu changngai, vanram ma nangni om nan neipu khat a om tihi ngaidon unang, na suakngai ha adik le asat a tho peru.

Manchuna

² Nan lam na rakip a manpak le kan ching thei tak a lam na neiru.

³ Hiva phalai tak hin keini rang om na lam deru, ajarko Khrista chongsat ha kan ri torna rang, Pathian chong ruk hi om ri thei na rang lam ha ana long pe na rang, kei ning ren inna ka om ani.

⁴ Kei ning ka ri rang ha kari torna rang na lam deru.

⁵ Pha nan nei na rakip a asat a nei manru, takngai luingai jiang kan ching thei a om ru.

⁶ Nan chong ri la pha rakip a mi lung tai nale ningsat na riru, hale mirakip jiang nan shang rang ha asat a ngaidon ru.

A torna Chubei

⁷ Kan manrit u le nai Taichika puma chuan na takngai jot, kan chuan sin pui suom, a man kei ruia chong rakip ha nang ni jiang na ripe nati.

⁸ Nang nin keini ruia nan jet na rang hale a man nang ni lunga ningsat na rang, kei ning ama hi nangni jiang ki va tir ani.

⁹ Nang ni nan mi, ka manrit takngai jot u le nai, Onesimas om ama le kan ruaia ka hong tir de, anmani ning hiva mun na isuok rakip chuan ruija na ripe nanti.

¹⁰ Kei le ren inna om Aristarkas ning chubei ana hong pek, hale Barnabas tupa Mark innom chubei ana va pek a man nan lam tiang a hong inko na lui don peru, tihi chong nan mu sa ani.

¹¹ Justus om anti Joshua ning chubei ana hong pek anmani anthum hi Jiwngai karra takngai mi ha anni, anmaningai ning Pathian rengram rang kei le chuan kan tho suom, asat nianga ana san mi ha anni.

¹² Nang ni nan mi Khrista Jisu a suak Epapharas innom chubei ana hong pek, nang nin Pathian lungdo tak a le nan lung ngir det tak a om na rang lungdo tung khristian nan chang na rang, a pha rakip a nang ni ranga lam na anei.

¹³ A man nang ni rang le Laodesia, hale Hirapolis a om miranga chuan a sin tihi kei tak in shakhi ka pek tor.

¹⁴ Kan manrit thiampu Luk le Dema ning om nang jiang chubei an na hong pek.

¹⁵ Laodisia a om Ulenaingai le Nympha jiang tiko ama inna biakrup kan chun, Mingai jiang kei ning chubei ka na hong pek.

¹⁶ Hiva chong shan hi nang nin na pa suole Laodesia biakrup a nan pa rang hi ka dei, hale Laodesia tenna nang ni innom nan tel rang hi na tho peru,

¹⁷ Puma chuan sin na rang an na pek ha na tor suo maje sinro, tia Archippus jiang riro,

¹⁸ Paul ka kut tak in ka hong jiak chithi chubei ke ani, an na khit na hi na thei ni pe maru, Pathian manrit han na ruoi rase.