KOLOSIA 3 - Rabu Athar New Testament (BSI)

¹ Khrista le nang ni nan ringkhir jarra, nan lungin vanram tianga phur ha ngaidon ru. Pa pathian chang tiang a Khrista ning a om na mun ha;

² Hiva ramuol chunga phur pai ha nang nin ngaidon maru,

³ ajarko, nang nin nan thi jui, han Pathian tenna Khrista le kan ruaia nan ringkho ha a kan thup jui ani.

⁴ Nang ringkhuo adik tak ha ko Khrista ke ani, a man a hong kando pha, nang ni jom nan kando rang ke, hale ama lianpui na ha nan tum suam rang ke.

A thar Ringkhuo le A lui

⁵ Hiva jarra, ramuol ning adei le angai tui ha ko om chansalui, athiang lui, hurna, asatlui, ngai tui, pham raisiat kut a sin ramil chubeibuk khat ani.

⁶ Hiva rakip jarra hin, Pathian lung thak na hi achong jui luingai chunga ahong chul rang ani.

⁷ Nang nin pha khat a hingan nan tak in nan dei taksa lungdo han vai ana lui hom ani.

⁸ Tak-ha atun ko a rang siat, mi enda, an tingai rakip hi bang in lang mi man jak na chong nan bai tenna man suak lai maru.

⁹ Ankhat le ankhat chunga leisei kan ri lai maru ajarko, nang nin man lai omchan alui ngaiha nan mak jui ani.

¹⁰ Hale ana sin pu Pathian ning ama mel pua tak a, jet chiak a ina man thar mithar ha nang nin nan ni jui.

¹¹ Hiva mi thar sung hin Griks, Jiws, vuntan le vuntan lui, aching le a am, suak le kan chong suak chang lui, a kan khel na ite om mak, tak-ha Khrista ko aniver, hale Khrista ko irakip a a om.

¹² Nang ni Pathian mi ke nan ni, ama lungsiat jarra ami ranga ina thang jui ani, hiva jarra dui rat, lungsiat thei, mi lungsiat jet, manrit a khang rat ha changru.

¹³ Nang ni khat le khat lungkan hui mak na nan nei innom, kan ngaidamru. Puman nang ni ina ngaidam anga nangni ning om khat le khat kan ngaidamru.

¹⁴ Hiva rakip chunga nang nin lungdo tung han lung kan ruol la kan khit chunru.

¹⁵ Khrista ning ana pek lunghip han nan kan jot na rakip na ruoi rase, hiva lunghip jarra nangni ha pathian ning anakui jui ani, tak khat changa Pathian ha man pakru.

¹⁶ Khrista chongsat ha ning na lung sunga om rase, chingna theina, khat le khat nan man kan chuna, nan kan ripe na rakip a manpak la, biakrup la, choi lom na la, thavang rakip ha nan lung sunga Pathian jiang thoru.

¹⁷ Puma Jisu jarra pa Pathian ha manpakru, chonga aninom, chuan na aninom, nang nin nan tho na rakip ha puma minga thoru.

Ringkhuo Thar Om chan Chuan

¹⁸ Nupuinu ngai, nan lompa thuoia om ru, hivahi khristian khat ning tho rang suak chuan ha ani.

¹⁹ Lompangai ning, nan lomnungai ha lungsiatru, hanna anmani pong khodengthei pek ha chang maru.

²⁰ Naingai, nan pa nan nungai chong ha jui chakru, hivahi Pathian lung tai na ani.

²¹ Pa le nungai, nan naingai ha lim kan sir pek maru,

²² suakngai, ramuol chunga nan neipungai chong ha pha rakip a jui, puma chitlejak nan nei ang han an na en lai jak chuan tho ha ni luia, lungthiang tak a thoru,

²³ Nan tho na rakip a miranga chuan tho ha niluia, puma ranga ki sin ke tia chuan ha lung lut a thoru.

²⁴ Puma ning a mingai ranga lo man itet ha katum rang ke tihi ngaidon unang, nan chuan tho ha adik tak Khrista chuan tho ha changru.

²⁵ A satlui tho ha ning asatlui tum nati, ajarko Pathian ning an thona nuk juia chongtan nati.