KOLOSIA 1 - Rabu Athar New Testament (BSI)

¹ Pathian lungdo nuk juia Khrista thiamruoi khat Paul le Ulenai Timothi ning,

² Kolosia hin a om Pathian mingai Khrista jiang takngai U le nai nangni jiang kan na hong manjet ani, pa pathian ning manrit nale lunghip ha napek rase.

Man pak Lam na

³ Keini nangni ranga lamna kan nei pha han, kan puma Jisu le pa Pathian ha kan manpak chak.

⁴ Ajarko, nang nin pa pathian mingai ha nan lungsiat pet, hivahi Khrista takngai na nan nei jarra ani.

⁵ A phut na han chongsat le adik chong choi manjet pha lungdo nan nei jui, hiva jarra vanram ma nan tet rang lungdo le takngai na lungsiat ha nan nei jui ani.

⁶ Ajarko ramuol rakip a chongsat ruia khel la lungdo tunga ihongni ang han nangnin Pathian manrit na ha nan jet le kan ruaia adik ha nan hong jet na nikhuo tenna nang ni jiang om ahongni ke ani.

⁷ Keini le chuan sin suam Epapharas tenna nang ni nan jet anga, ama ko keini rahut a Khrista chuan sin takngai jot miha ani.

⁸ Nang ni nan lungsiat thei na ha thavang ranak keini jiang ana ripe jui.

⁹ A ma tenna keini ning nang ni ruia kan jet na nikhuo tenna, nang ni ranga Thavang Tianga chingna theina rakip Pathian lungdo nang nin jet theina ranga keinin kan lam na rakip a ka ngaidon.

¹⁰ Nang nin asat chuan nan sin na rakip le, puma lungdo ha jet thei na tianga kan sonru.

¹¹ Ningsat le kan ruaia nang nin dui rat hi a pha rakip a Pathian lianpui na ranak rakip han, nang ni ha na man rat rase.

¹² A thiang mingai ning an tum rang ha nang ni om tum suam na ranga, keini lungdo lung khat a na manni Pathian ama mun na nang nin man pakru, Puma ranga rahui suak lungdo tung ha changru.

¹³ Pathian ning Keini ha a jing ranak tenna a na hong san na, ama lungsiat a pasalnai Om na mun han keini jom ana manjet jui.

¹⁴ Keini na san ringpa Ka siatna ngaidam torko a pasalnai jianga a om.

Khrista Ning Pathian Chuan Tak-ha A tho

¹⁵ Khrista ko mit a mu thei lui Pathian mel ha ani.

¹⁶ Ajarko, vanram le ramuol la mu torlui, a tor pungai ong na mun ranak neingai anninom puma tenna an hong sin mang ke ani; phur rakip hi puma jarra le ama ranga alui sin ani

¹⁷ Puma ko phur rakip madonna alui om jui, hale ama jiang phur rakipngai hi an om ver.

¹⁸ Puma ko taksa tianga kanti nom, biakrup lu ha ani, ama ko i rakip karra a rapa ong na mun ha tung na rang hale a thi ngai kar tenna a rapa nai chang a phut na ha ani.

¹⁹ Ajarko, a nai ha ning a binga Pathian chang torna lungdo inei ha Pathian in a man sat ani jui.

²⁰ Puma ning Khros chunga thisen a man suak han lunghip nale ramuol le vanram ma a om phur rakip ama jarra kan jot thei na hi Pathian lungdo ani.

²¹ A tuan lai han nang niko chuan satlui tho tianga nan lung a ngarra a satluija nan lui om.

²² Atunko, puma madonna mi thiang a chok bui, man kan lian na nei lui, puman miring anga a na thi pe jarra kan betai na ha nan nei jui.

²³ Vanram thuaija om phur rakip karra Paul kein nang ni jiang ka lui tho chuan rakip ha nan jet a chuan tho miha ka hong chang; chongsat ha nan jet a phut a dang takngai na khat a nan lung man che lai maru.

Paul Ning biakrup a Chuan Tho na

²⁴ A thianga kein nang ni ruia pong khodengthei na ki nei hi Ka ning asat, hale, puma ning pongna amu rakip ha kei ning om ama anga pongna ka nei hi puma taksa biakrup ranga ani.

²⁵ Hiva chongsat hi sem torna ranga kei jiang Pathian in mirakip jiang manjet ranga ana hong tir ani.

²⁶ Tak-ha hiva chongsat hi mirual miruolla alui kan thup a alui om ha atunko ami thiang ngai jiang amanjet jui.

²⁷ Pathian ning hiva chong ruk hi jatdangngai jiang a manjet jot, nangni hi Khrista ranga lianpui na ha nan ni.

²⁸ Keini ning mirakip hi Khrista jiang lungdo tunga om thei na ranga, chingna theina rakip le kan ruaia mirakip jiang man chuna ranga kein puma chongsat ha ka jiak ani.

²⁹ Hiva rang jarra ka sunga ranak rakip ka kei sua pong khodengthei na mun han nom Kein sin torna ka tho.