JOHON 8 - Rabu Athar New Testament (BSI)

Numei chuk lui an khat an chur

¹ Hava suale mirakip inna anlui che, tak-ha Jisu ko Olib tangbunga a luiche jui.

² Jingtiang masa Jisu veikhat biakinna a hong kanleret, mirakip a kolla achun khomma a man a onga anmani ha manchu aphut jui.

³ Dan oja ngaile Pharisingai ning numei khat mi le a chuk lui omchan satlui chuan atholaitak an churra an hong kairuaia amai kung a anmanngir.

⁴ Han anmanin Jisu jiang anti, “Oja, hiva numei hi Pasal dang khatle siatna an tho laitak kan hong chur ani.

⁵ A ma chong pek nukjui ja ko hiva numei hi lunga dengthat na rang Mousi ning chong i napek ani a tun nangin imo na ngaidon?

⁶ Anmanin ama maral peklut na ranga hivahi ensin na an neia an luiti ani, tak-ha Jisun akunna a kut simma leipak aluisun.

⁷ Anmanin an ngir chunga chong an dingkel ani jarra Jisun akunna anmani jiang aluiti, “Nan karra siatna ite khat nei lui miha ning ama jiang man Lunga deng rase;”

⁸ Hava suale ama akunna, leipak akutchalla aluisun.

⁹ Anmanin hava an jet phat han, Ulian tenna an phut mi ankhat, ankhat anluichea, an renga an tanpetjui. Jisu amai kunga anmanngir numei jak ha a ngirra an luimak jui.

¹⁰ Jisun a hong ahongtanga ati, “E, numei, anmani honne an che jui? Nontak napek rang tu khat om om lai ma u mo?”

¹¹ Numei nun alui sang, “Oja tu khat om omlaimau,” Jisun alui ti, “Asatjui, han ko kein om na mansiat making; chetaro a tun tenna an phut vei khat siatna tholaimaro.”

Jisu ha ramuol var ani

¹² Jisun veikhat anmani jiang a ti, “Kei ramuol la avar ha ka ni; tu a chang innom kei kanuk anajui ama han ring na a var ha nei nati, hale a jing na mun na om noning.”

¹³ Pharisingain ama jiang an lui ti, “Nang in nabi binga chong shakhi na tho na chong shakhi ha dik mak.”

¹⁴ Jisun alui sang, “Kein ka binga chong shakhi ki tho an in nom, adik tak ka ri ke, ajarko kei kahongna an phut kein ka jet. Nang nin jet mak che u, hon na an phut ka hong, honne kiche, tihi.

¹⁵ Nangnihko miring tak sa omchan nuk jui a chong nan tan; Keinko tu khat chunga chong tanmaking.

¹⁶ Tak-ha kein chong kitan inko, ka chongtan ha adik tak inirangke, ajarko ka binga chong kitannimak; anahongtirpu kapale chong kantanrangke.

¹⁷ Nan dannako hingahin nan lui jiak, tiko, chong shakhi mi anni ha ning adik tia an jot inko adik ani.

¹⁸ Kein ka binga chong shakhi ki pek hale kei ana hong tirpu ka Pan nom ka chunga chong shakhi ana pek.”

¹⁹ Han anmanihan an hong ti, “Napa hon mo a om?” Jisun alui sang, “Nang nin kei ham, ka pa ham jet ma che u; Nang nin kei ha nannajet aninko, ka pa ham nan lui jet rang ani.”

²⁰ Jisun ning hava chonglim alui ri biakinn sunga peisakok. Sekhui manchunna a mun han iri ani; Jisu ha a pha latung takmak tu khat innom ama churlaimau.

Nang ni kei che na mun na chetor noni che u

²¹ Jisun veikhat anmani jiang a luitiret, “Kei cheretrang ka ni, nang nin kei natok nanti, tak-ha nang ni nan siatna jarra thinanti; kei ka chena mun han nang ni chetor hongtor noni che u.”

²² Hava han Jiwngai an hong ti, “A man ‘Kei che na mun na nang ni chetor noni che u’ itihi imo itina ani, a binga kan that rang mo itina ani?”

²³ Jisun anmani jiang a luiti, “Nang ni ko ramuol la an phut mingai ha nanni, tak-ha keiko chunga an phut a hong ha kani. Nang ni ko hiva ramuol la an phut nan ni, tak-ha kei ko hiva ramuol la an phut ni making.

²⁴ Hava rang jarra nang ni nansiatnahin nan thi rang ke, tia kein kinaripe ani, “Kei hi kei ka ni tihi tak nanngaimak aninko, nan siatna jarra thinanti.”

²⁵ Anmanin an lui dingkelret, “Nang tumo nani?” Jisun alui sang; “A ma sat nang ni jiang ka ri hava tak hake.

²⁶ Nan tak chunga chongtan ranga le ri ranga a tam innom a na hong tirpu ama ha adik ani, hale kein ama jiang an phut ki jet kijetha ramuol siatnaram hin kimanjet ani.”

²⁷ Jisun a pa chong ri ha anmanin imo ani tihi luijet theimau.

²⁸ Hiva jarra Jisun anmani jiang alui ti, “Nang nin minai pasalnaiha nandomsang phat han, ‘Kei hi kei ke’ tihi nan na jet rang ke, kabingjak lungdoa kein tho making, ka pa ha ning ina manchu jak ha keinkari, nang ni rang ani jui.”

²⁹ Kei ana hong tirpahale kan om suam, a man kei ha namakma ajarko lungdo ha kein kathochak.

³⁰ Jisun a ti chong angai mirakip in takngai na an lui nei.

Suakngai Masuana

³¹ Jisun takngai mingaijianghan a ti, ka chong ringai hi nan jui inko: Kathiamruoi takbal nan ni.

³² Nang ni adik ha nan jet rang ke, hale adik ha ning na san nati.

³³ “keini Abraham vonchoi rui hake kan ni,” tia an sang, “Hale keini tu khat jak suak ham lachang masing, tu ning mo an na manchang rang ke tia an ri?”

³⁴ Jisun anmani jiang a ti, “Kein nang ni jiang adik tak kinarike ani. Tu ang siatnei miha ko siatna suak ke ani.

³⁵ Suak ha ko insungmi nitheng noning, tak-ha Naihako insungmi nithengnati.

³⁶ Mi Pasalnai ha ning nangni ha ana masu aninko nang ni ha tak balla ana ma sua jui ke.

³⁷ Nang ni ha Abraham vonchoi ngai nan ni tiha kanajet, tak-ha nang nin kei lam nathat na rang nan tho; ajarko nang nin kina manchu hi luima che u.

³⁸ Kei a na hongtirpu ka pa ruia kari ani, tak-ha nang niko nan pangai an ri lam ha nan tho.

³⁹ keini kanpako Abrahamke tia an hong sang. Jisun anmani jiang a ti, nang ni Abraham a naingai nanninko ama ning itho anga nan lui tho rang ke.

⁴⁰ Kein Pathian tenna kahongjet adik ha na manjetna ranga ka tho ani, tak-ha kei lam nathat na rang nan tho; Abraham ko hi anga lui tho mak.

⁴¹ Nang nin nan pa atho anga nan tho han anmanin an hong sang; Pathian jak ke kan pa kein in kan nei, ha jarra ama anaingai ha kan ni.

⁴² Jisun anmani jiang a ti, Pathian ha kan pa alui ninko nan lung inasiat rang ke; ajarko, kei Pathian tenna ka honga hin ka om. Kei ka ranak ka hong nimak, a man a na hong tirke.

⁴³ Kachongrihi ita mo nan jet torlui? Ajarko ka chong ri nang nin jet thei ma che u.

⁴⁴ Nang ni nan pa ko Seitan hake ani, hiva jarra ama lungdo ha nang nin nan jui; a phut lai tenna a mako mi thatke ani, hale adik natianghan om mak. A ma jiang adik na ha om mak, a man a tho na rakip leisei jak a ri, ajarko leiseipa ani jarra, leiseiri rakip rang om an pa ani.

⁴⁵ Tak-ha kein adik tak a kari ani, hiva jarra nang nin tak na ngai ma che u.

⁴⁶ Keihi siatnei ka ni tia nang ni nan karra an khat in nan na titormo? Kein adik ha kari, ita mo nang nin tak nan na ngai lui?

⁴⁷ Pathian tenna a hong ha ning Pathian chong ha angai, nang niko Pathian tenna nimak che u; hiva jarra Nang nin ngaimakcheu.

Jisu le Abraham

⁴⁸ Amanin Jisu jiang an hong ti, nang ko Samaritan mike Seitan choi nani tia Kannari lui mo ani?

⁴⁹ Jisun a hong sang, kei seitan nei making, ka pa chit jak ka nei ani, tak-ha nang niko chitlejak na nei mak che u.

⁵⁰ Kei ranga chitlejak ka dei nimak tak-ha, atokrangle le chongtan an khat a om.

⁵¹ Kein adik ha kari ani, ka chong ri angai rakip in thino ni u.

⁵² Amanin an hong ti, nang ko na lung sunga a om tihi kan jet jui; Abraham le Pathian tashantheingai om an thi jui, tak-ha Nang na mi man chu a jui ngai ko thino ni u nati.

⁵³ Abraham Kanpako a thi jui, ama nek kalianko timakche tak-ha ama nek nalianmo? Hale, tashantheingai om anithijui nang ko tumo kani tia na ngaidon?

⁵⁴ Jisun a hong sang, kei ka thei jak ranga chitlejak ka kan nei inko, havaha iom nimak; kein chitlejak na nei ha ko Ka pa ke ani, amahake nang nin kan Pathian nanti ha.

⁵⁵ Nang nin ama ha luijetmachu Keinko Kajet, kein ama ha jet making katinko; nang ni anga leiseiha ka ni jui. Tak-ha kein ama ha ka jet a chong om ka jui.

⁵⁶ Nan pa Abraham ko kei ka hong rang pha ha a mu jot aning aluisat, hale a mu jarra a ning a satjui.

⁵⁷ Anmanin an hong ti, kumsom rangajom latunglui nang in Abraham mo na mu?

⁵⁸ Jisun anmani jiang a hong ti, kein nang jiang adik kari ani, Abraham an nei mak ma ka lui om jui.

⁵⁹ Han anmanin lung anrut dengrang anti pha, Jisun a kan thup biakinn a mak a ache jui.