JOHON 18 - Rabu Athar New Testament (BSI)

Jisu Achur

¹ Jisun hiva rakip a lam suale hava mun ha a thiamruoingai le an mak a kidron varaltiang han Jisu le a thiamruoingain an che jui.

² Jisu juar rangpa Juda Iskariot ning om hava mun ha a jet ajarko a thiamruoingai le an lui che chachak ani.

³ Hiva jarra Juda ning thiampulianngai le Pharisingai biakinn a ngakngai Rom sipairup khat an tirra hava rahuan na an che han, anmanin thai mei le meiser le ral chem le pho kan ruaia an hong ani.

⁴ Jisu ning achunga asuak rakip hi a jet; han an madonna a chea a ading kel, “Tumo ani nang nin nantok ha? a ti.”

⁵ Anmanin an sang, ‘Nazaret Jisu,’ anti, a man a ri “Keike ka ni,” a ti. Jisu juarpa Juda ham anmani le han anngirsuam.

⁶ Hiva jarra Jisun kei ke ka ni a ti suale anmanin an nuk ankirra Simlei chunga an kan lum verjui.

⁷ Veikhat Jisun anmani jiang ading kel ret, “Nang nin nantokha tuha mo ani?” “Nazaret Jisu ti a an sang.”

⁸ “Kein nang ni jiang kanarijui kei ka ni tia Jisun a sang,” nang nin kei nannatok aninko mingai hi chebak dirase u.

⁹ A man hivahi a ti, ajarko, “A pa nang in ninapek hi tute khat om mang noning tihi na chong ri tung na ranga ke ani.”

¹⁰ Simon ning achemsei khat a nei ha, a kei sua, thiampulian suakpa a kuar a chang tiang atukthakpejui, hava suakpa a ming ha Malchus ani.

¹¹ Jisun Pitar jiang, ‘Na chemsei ha akok a thunkhirro a ti! Ka pa ning ina pek koklai hi kei in noning tia mo na ngaidon?’

Jisu Anna Maikunga Angir

¹² Rom sipairup lamkeipa le Jiw ralmingain Jisu ha an churra anluikhit.

¹³ Han anmani Jisu ha ama sat Anna jiang an tuang, ama hava kumsunga thiampulian a chang kajapha atarpu ani.

¹⁴ Hiva kajapha hi ko Jiwngai jiang mirakip ranga mikhat in athilam asat tipa ha ani.

Pitar Ning Jisu Ijot Lui

¹⁵ Simon Pitar le a thiamruoi dang khat in Jisu nuk anjuihan thiamruoi khatpa ha ko thiampulian le asat an kan jet jarra, thiampulianpa tualmai tenna Jisu le an kan ruaijui.

¹⁶ Pitar in tual varal kot han a ngirra, thiamruoi dang khat thiampulian kanjetpa, a suak kot angak numei jiang a ti, Pitar ha hongman lutro.

¹⁷ Kot angaknu han Pitar jiang ading kel, ‘Nangom Jisu thiamruoi karra akhat nimak che mo?’ Pitar a sang, “keini making a ti.”

¹⁸ Adairei jarra suakngai le a ngak rakip in an ngirra mei anluioa an om han Pitar nom anmani mei o na karra alui kan chel.

Thiampulian Ning Jisu Chong Ading Kel

¹⁹ Thiampulian han Jisu jiang a thiamruoingai le a mi man chuna ruia chong ading kel.

²⁰ Jisun a sang kei mirakip jiang phuang a chong kari Jiwngai kan chuna Sainagok kimanchuha, i te ruk a kari om mak.

²¹ Hiva jarra kei jiang chong na dingkel maru, ka chong ri a jet ngai jiang dingkelru kei imo ka ri tiha anmanin an jet.

²² Jisun hi aripha, hava mun na a ngak an khat in ama hi abenna a ti. “Nang in thiampulian khat jianghi ang hin naritor,” a ti.

²³ Jisun a sang kei hiva ka ri hi adik lui aninko adik luinahan, chong ngirro, tak-ha aluidik a chang inko i ruia mo nang in kei ninaben?

²⁴ Hiva jarra ama ning kajapha thiampulian jiang an khit puma ha an tir jui.

Pitar ning Jishuha Veikhat Ijot Lui

²⁵ Pitar ning hinga mei a o va ala om jarra mi aviar in ama jiang an hong ti, ‘Nang hiva mipa hi om thiamruoi karra khat nimak che mo?’ tia an dingkel, tak-ha Pitar ning alui ti “keini making tia alui sang.”

²⁶ Thiampulian suakpa, Pitar ning a kuar atukthak pepahan, nang rahuan sunga han ama le nankanruoia ka na mu nimak mo? tia ading kel.

²⁷ Pitar ning a ti “keini making,” hava lai tak han arkhong pa ning akhuangjui.

Pilat Ma don na Jisu an hong Tuang

²⁸ Hava han jin tiang man alui ni, anmani ning Jisu ha kajapha in tenna phut ram vaihompa Pilat chang kualla ankei ruia an hong tuang jui. Jiw ngai ko kan na ut ani jarra an man kan thianga luilut ma u.

²⁹ Pilat in anmani le kanmupui ranga a hong suak, hiva mipahi? Imo nanlo jot hin nanhongtuang?

³⁰ Anmanin an sang, hiva mipahi chuan satlui a lui thomakinko keinin na kol la hong tuangno nising, anti.

³¹ Pilat in anmani jiang a ti, “Han ko nang ni nan dan nuk juia tu ang in lang ama chunga chong ha tanru.” Jiwngai an sang, keini tute that na rang ranak neimaksing.

³² Hivahi Jisu ning ija mo kithi rang tia chong iluiri ha tung na ranga hiva chuan hi a hong suak ani.

³³ Pilat ning reng ong na han alutret a Jisu akuia “Nang Jiwngai reng ha mo na ni?” tia ading kel.

³⁴ Jisun a sang, “Hiva nina dingkelhi nathei jak na lunga isuak mo animakle kei ruia midangngai ning an na ri mo?” a ti.

³⁵ Pilat ning asangret, “Kei om Jiw ka ni tia mo na ngaidon? Najat mingai le thiampulianngai ning kei ka kut an na hong pek ani, nang imo naluithojui?” a ti.

³⁶ “Hiva ramuol hi kei ka rengram chang mak; hiva ramuol hi ka rengram a chang inko Jiwngai in kanuk na jui nan ta ral katorrang ani, hiva ramuol hi kei rengram nimak a ti.”

³⁷ Han Pilat in ading kelret, han ko “Nang rengko na ni mo?” Jisun a sang, “Reng na ti ha kei kani, hiva ranga kei nai ka hong changke ani, hale adik chong ngirna rang jarra hiva ramuol la kihong ani, adik mingai ning kei ka chong ha an jet.”

³⁸ “Han ko Adik ha ko imo ani?” tia Pilat in ading kel. Han Pilat ning tual a suak Jiwngai jiang a ri, “A ma a siatna adik mak na ite kein mu making.

Jisu That na Rang Chong Tanna

³⁹ Tak-ha Nang ni kan na ut racham kein ren inna a om mi khat hi kimasuahi a ngai ani, hiva jarra Jiwngai renghi kein nang ni rang kamasua rang mo nan dei?”

⁴⁰ Anmanin rasa ring tak an hong khek ama ha “Nimak Barabaske Barabas masua ranghi kan dei an ti (Barabas ko a ruk mi that ani)!”