JOHON 14 - Rabu Athar New Testament (BSI)

Jisu a Pa tenna lam pui ha ani

¹ “Nang ni nan lung manponga lung kannok a om maru,” ajarko, Pathian ha takngairu hale kei om tak nangairu,

² Ka pa inn na om na rang mun atam a om, kein che kata nang ni ranga ki sin kivar rang ani, hava a om mak inko kein nang ni jiang ka na riluirang ani.

³ Han kei chekata nang ni rang omna mun ka sin suale, kei ka omna mun na nang ni omna ranga, Kein vei khat kana hong tuang rangke.

⁴ “Kei ka chena mun ha nang nin nan jet.”

⁵ Thoma ning ama jiang a ti, Puma, keini nache na rang mun ha jetmasing, hava mun lut na rang ha ija mo kan jet rang?

⁶ Jisun a hong sang, “Kei lam ha ka ni adik hale ring na ham ka ni, keini luia tu khat innom ka pa kol la che noni u.”

⁷ Nang nin keihi nan na lui jet inko, nang nin ka pa ham nan lui jet aninko; a tun tenna nan jet nan mu jui ani.

⁸ Philip ning ama jiang a ti, “Puma kan pa na man muro, han ko ka lungdo itungranke.”

⁹ Jisun a hong sang hiduksot kein nang ni le kaomjui, hale, a tun tenna nilajet lui mo Philip?

¹⁰ Kein ka pa jiang ka om ka pa ning kei jiang a om tihi tak ngaimachemo? Kein nang ni jiang kinarihi, “Jisun a ti, kei ranga ka ri nimak. Tak-ha kei jianga a om ka pa chuan ha kithoke ani.”

¹¹ Kein ka pa jiang ka om, hale ka Pan kei jiang a om ti chong hi takngairu, animakle kei ka chuan jarra takngairu.

¹² “Kein nang ni jiang adik ki na ri ani, tu an khat ning keihi tak ana ngai miha kei ki tho rakip ha a man tho nati, hale, hiva nek alian chuan ha a man tho nati, ajarko kei kapakolla ka che.

¹³ Kaminga nang nin imo khat nan lam inko kein thokati, A pasalnai tenna A pa lianpui na ha nan muthei na rang, nang nin nan nalam rakip ha kei ning ki tho rang ke.

¹⁴ Kei ka minga imo khat nan na lam inko, hava kein ki tho rang ke.”

Thavang Thiang Chongsanna

¹⁵ Nang nin kei nan na lungsiat inko ka chongngai hi nan lui nanngai rang ke.

¹⁶ Kein ka pa jiang lamkata hale a man nang ni a na san rang le a na om pui theng pet rangkhat na pek nati.

¹⁷ Hava adik thavang ha nang ni ana om puichak, ramuol inko mutorma, jet om jet mak, nang ninko puma ama ha nan jet; ajarko, puma ama ha nang ni le nankanruoichak hale nan sunga a om jarra nan jet ani.

¹⁸ Kei ka che karra, nang ni ha nan thei jak na mak noning.

¹⁹ A pha bongkhat ko ramuol in keihi namulai noning, tak-ha, nang ninko na mu nanti, kei ka ring jarra nang ni om ring nanti.

²⁰ Hava nikhuo a hong tung phale, kei ka pa jiang ka om, nang nin kei jiang nan om tiha jet nanti.

²¹ “Tu ang min ka chong pek a jet a jui mi ha kei ana lungsiat ani, kei ana lungsiat ama ha ka Pan nom lungsiat nati; kei innom ka lungsiat na ha ama jiang do rang ka ni.”

²² Iskariot Juda niluia Juda ning a ti, “Puma ija mo ramuol jak niluia keini jiang na thei jak a nikando rang?”

²³ Jisun ama jiang a sang, “Tu ang kei ana lungsiat ha kei ka man chuha a jet a ajui ani. Ka pa innom ama lungsiat nati han, Kapa le kein ama jiang chekanta a kol la om rang kan ni.”

²⁴ Tu ang mi keihi lung anasiatlui ama ha kachongngaihi juimak. Nang nin chong nan jet a nan jui rakip hi kei jiang tenna nimak, tak-ha kei anahongtier ka pa tenna ani,

²⁵ Hiva hi “Kein nang ni le ka om lai kinari ani.”

²⁶ Nang ni ranga ka pa ning, santheina an khat hong tir nati, a man kein kaluiri rakip na manchu nati.

²⁷ Kein nang ni jiang kalunghip ha ka na pek, ramuol in ka na pek ang chat nimak. Nang ni ning pong le ning dong nanei maru han chit maru.

²⁸ Kei nang ni na mak kata che rang kanitihi nan jet jui ani nom, nang jiang kilahong keirret rang ke, nang in nan na lungsiat inko, ka pa jianga kiche rang hi nan ning man satru, ama ko kei nek a alian ani.

²⁹ Hiva ngaihi a hong suak karra tak nanngai na rang, tun a suak mak ma kein nang ni jiang kinaripe ani.

³⁰ Kein nang ni jiang a sot ri lai noning, ramuol vaihompa honga kei jiang ranak na pek laima.

³¹ kein Pathian ramuol ka lung asiat jarra ama chong pek thoro ati rakip kein ka tho, “Hongru kei nin hiva mun tenna phut che tarei.”