JOHON 12 - Rabu Athar New Testament (BSI)

Jisu Bethanihan Sariak Annot

¹ Kanna ut thoranga nikaruk madon han Jisun Lazarus ama omna khuopui, Bethanihin alui che.

² Hangahan anmanin Jisu ha nitak bu neknaranga anluivar, han Marthan an sepa alui tho, Jisu le bu nek suam ranga Lazarus om an khat alui ni.

³ Meri ning Nard Sariak rimhui a man tam kilo her khat a hong choia Jisuke han anot hale a sam han anot hulpe hale arimha inna a sip marjui.

⁴ Jisu a thiamruoingai karra Juda Iskariot Jisu juar rangpa ning a ti.

⁵ Sariak rimhui mantamhi ruphai riathumma juar a ariang aroi ngai jiang pekmo satmak?

⁶ Ariang avai ngaiha a lungsiat jarra hiva chong hi ari nimak, tak-ha ama ko arukmi alui ni, jarra a puan kok a kei sua a man aluithunjot ani.

⁷ “Jisu a hong ti, Kei an na phum na rang nikhuo a tung maje, numeinu a lungdo han tho rase.

⁸ Ajarko, a riang avai ngaile nan om chak, tak-ha kei ko nang ni le om chak nonising.”

Lazarus Anjot Lui

⁹ Jiw mitam tak in Jisu hi Bethania a om ti chong an jet, anmanin an che jui, Jisu anmujot jak ni luia Jisun athi tenna phut a man ring Lazarus an en jot jarra an che ani.

¹⁰ Han thiampulianngain Lazarus that na ranga chong an kansiamjui.

¹¹ Ajarko ama jiang i suak chuan rakip ha Jiwngai a karra a tam lam min Jisu ha tak an ngai jui.

Jisu Lianpui tak Jerusalem Alut

¹² Jing ang nikhuo han kan na ut ranga a hong mitam min Jisu Jerusalem ma a hong ti an jet.

¹³ Nora na anlek ama le kan muranga anmanin an hong suak a an hong khek, Hosana! Puma minga a hong ama ha Israelngai rengpa ravan satke ani; anti.

¹⁴ Han Jisun sakuarkap khat amua achuanga ahong jui ajarko, chong thiang rabuhan hingahin an lui ri anga ani.

¹⁵ “Zion khopui chit maro!” Sakuarkap khat a chuanga nang jiang a hong.

¹⁶ A thiamruoi ngainko hava phatak hako lui jet ma u tak-ha Jisun lulian banlian tak a mu suale, ama jiang isuok rakip ruia an ngaidonjui.

¹⁷ Jisun than tenna Lazarus a kui suak, a thina tenna aman ring khirlai han mitammin shakhi an lui pek.

¹⁸ Hiva jarra, mitamngain puma ankanmupuia an khat om Jisun hiva chuan angakpa itho ke tiha an jet jui.

¹⁹ Pharisi ngai ning khat le khat an hong ti, enru, keinin ijum thotorlai maksing! Enru mirakip in a nuk an luijui.

Grik Aviar Ning Jisu Antok

²⁰ Ut sunga chubeibuk ranga a hong karra - Grik mi om aviar an lui kan chel.

²¹ Hiva jarra Galili ram ma Betsaida khuo han Philip jiang a honga anti, Oja, keini Jisu kan kan mupuijot.

²² Philip in Andria jiang a manjet hale Andria le Philipin Jisu kol la anripe.

²³ Jisun anmani jiang a sang, Mi Pasalnai Naiha lulian banlian narangphaha ahong jui.

²⁴ Adik tak kein nang ni jiang kari ani; Gehu ru khat in simleia achula athimak inko, mong khierma, tak-ha athi inko ara tam tak a nei.

²⁵ Athavang lungsiat ha ning a taksa a manmang, hale hiva ramuol chunga a thavang lungsiat lui ha ning amongtibui ringna ahongtungmaje hanga lui om nati.

²⁶ Tu ang mi kei kasepa thojotmi an om inko, na jui rase u, kei kaomna mun han kasuakngai om an om rang ani hale ka pa ning om ka suakngai ha manrit nati.

Jisu a thi ranga a ri

²⁷ “Atun kei ka lung a pong jui imo kitirang? ‘A pa hiva phathi kei jiang hong ma rase?’ Tak-ha hiva pong khodeng theiranga kei hi ka hong ani.

²⁸ Apa, ‘Puming lianpui na ha nirase, han vanram tenna rasa an khat in a hong ti,’ kein hava mahok lianpui na ha ka man lianjui, hale vei khat kala man lian rang ke.”

²⁹ Han mitam a ngirra a kol la an ngaija ruo arike aviar ning vanran tenna a man i kan biak puike an hong ti.

³⁰ “Jisun anmani jiang a hong sang, rasahi kei ranga i hong nimak, nang ni ranga ani.

³¹ Atunhi ramuol chunga chongtan na rang le vaihompa deng juan napha ani.

³² Kei ngal lom hiva simlei tenna annadom inko, mirakip om kei jiang kikei lutde rang ke.

³³ Hiva atinahiko a man ija mo aponga athirang hi atinake.

³⁴ Mitam ning ama jiang a hong sang, keini dan rabuhan a ti ha ko Mesaia ko amongtibuia a ring theng petrangke. Mi Pasalnai ha ko andomsangke nitihako, tu ha mo ani pasalnai?”

³⁵ Jisun a sang, ‘Varha nan karra a pha bongkhat jak a om, ajieng in ananangmak na rang nang nin a var lai hin lonru, ajarko ajieng karra a om mi han hon mo kiche tiha jet tor mak’.

³⁶ Nang nin var ha nanneilai, var ha takngairu; ha aninko nang ni varra om miha chang nanti. Jisun hivahi a ri suale, anmani tenna phut a kan thup jui.

Jiw Ngai Tak Ngaimakna

³⁷ Anmani mai kunga angakpa chuanngaihi a tho pe aninom, amaha tak luingai ma u.

³⁸ Tashanthei Isaia ning aluiria hong tung na rang ani, “Puma tuning mo tak an ngai rang kan chong rihi? Hale tu jiang mo puma ranak ha namanjetjui?

³⁹ Hiva jarra anmanin tak lui ngaitormau, Isaia ning veikhat a ti ret.

⁴⁰ Pathian ning an mit amanjingpejui, hale ansalungom a dong jui, hiva jarra an mit in mu noni u, ansalungin jet tor noni u, hale anmanin keitiang hong kan hei noni u, tia pathian ning a ti, kei ko anmani ha mandamkati.

⁴¹ Tashanthei Isaia ning Jisu mahok lianpui na ruia Jisu chung changa aluiriha ani.

⁴² Ha aninom Jiw ulianrupngain Jisu ha tak an ngai tak-ha Pharisingai Sainagok sunga an nanotcheimak na rang, anta an lui om chian;

⁴³ ajarko anmanin Pathian ning manpak nek miring in an manpak ha a khel la an dei.

Jisu Chunga Chong Tanna

⁴⁴ Jisun rasa ringa a hong ti, “Tu ang keihi tak a na ngai miha kei jak niluia kei ana hong tir puham tak a ngaiani.

⁴⁵ Tu a chang innom kei a na mu miha, kei a na hong tir puham a mu ani.”

⁴⁶ Kei tak a na ngai mirakip in veikhat ajieng karra om mak na rang, Kei ramuol la varra ka hong ani.

⁴⁷ Tu ang mi ning ka chong a jet, a jui lui miha, kein ama jiang chong tan noning. Chongtan rang kei ramuol la ka hong nimak, tak-ha, sanring ranga ka hong ani.

⁴⁸ Kei tak anatel luia ka chong luijotlui miha, ama rang chongtanna ankhat aom; ramuol la kei kirisuak chong hi a torna nikhuo han chongtan nati.

⁴⁹ Hivahi adik ani, ajarko Kein kabing rang jak kari nimak, tak-ha, kei a na hong tirpu Ka pa chong pek nuk juia kari ani.

⁵⁰ Han ama chongpekhako, kum sot ringna ani tihi kein Kajet, hiva jarra, “Ka pa ning a na ri chong rakip ha kein kari ani.”