JEMS 5 - Rabu Athar New Testament (BSI)

A nei Ngai Chunga Manchuna

¹ Atun, aneimi kan chong ngai ning ngairu! Nan chunga khodengthei na angakpa ahong rang a chang jarra chap nang chajang siarru!

² Nan neingai ha a mang suo jui, nan puon nan diar ngaiha ra lung in a chak so jui.

³ Nan sana, nan ruphai ngaiha thir e ak in a kal suo jui, hale hiva thir e ak hin nan taksa meia na kang anga rona rang shakhi a chang rang ani. Hiva nikhuo a hong tung tiang hin nang nin phurpai a tam tak nan buk jui.

⁴ Nang nin nan luia ranak nan ma sul ngaiha a man pe ma che u. Nan chang atngai an lung hui mak an khek rasa ngairu! An chap rasa ha a lian chung nung Pathian in a jet jui ani.

⁵ Hiva ramuol chunga hui thei nale ningsat na ringkhuo nan nei man suo jui. Mi that na rang nikhuo han nan tak nan thei jak a nan kan that.

⁶ Hiva jarra nang nin mi dik ngaiha siatna nei anga nan that, hale a man i jum na jiat lai mak.

Dui rat le Lam na

⁷ Hiva jarra u le naingai! Puma ahong mak kar je a dui ratru, lui tho mi ning aluia a suak rang chang a ngak ha enru. A man chuk lai tha mang ruo le phaivuo a dai a duija phur le pai achoia a ngak ani.

⁸ Nang nin nom hava ang han a dui ratru. Puma hong na rang nikhuo a nai jui, tia ngaidon ru.

⁹ U le naingai, an khat le an khat kan ri siat maru! Hi aninko Pathian in nan chunga chong tan noning: chongtan rang phat a hong nai jui.

¹⁰ U le naingai, Puma minga chong ri Pathian tashantheingai ha ngaidon ru. Anmanin khodengthei nale pong na chunga dui rat an nei ha kan churu.

¹¹ Anmanin anrat jarra ravansat tia kan kui. Job a dui rat ha nang nin nan jet jui, hale a torna Job ranga imo Pathian in a siak pe ham nan jet jui. Ajarko Puma manrit nale lungsiat na a sip ani.

¹² Ka u ka naingai, irakip chunga, nang ni chong shakhi nan nei pha han, khuo kan khong maru; vanram pal la, ramuol pal la, khuo kan khong maru. Nan jot na ha, O, nan tile tiru, ‘ai nan tile,’ ti chianru, ha aninko nang ni Pathian chongtan na thuoia om noni che u.

¹³ A ning dong a thavang pong nan karra an om mo? A man lam rase. A ningsat an om mo? A man manpak na la tho rase.

¹⁴ Nan karra a nat an om mo? Puma ming na sariak an not pe rang le an lam pe rang biakrup ulianngai kui rase.

¹⁵ Takngaija a lam na han a nat mi ha dam nati, Puma ning ama ha chung jang nale, a siatna ngaiha ngaidam na nei nati.

¹⁶ Hiva jarra nang ni an khat le an khat nan siatna ngaiha kan riru hale, nan dam thei na rang kan lam peru. Adikmi lam na han ranak nei tak chaun a tho.

¹⁷ Elija ha keini le a kan ang miring an khat ani. A man rua tho mak na rang a lam pha han, kumthum le tha ka ruk rua lui tho mak.

¹⁸ A man rua tho ret na rang a lam ret pha han chung van na an phut rua alui tho jui, han ramuol chunga chimu a hong ra ret ani.

¹⁹ Ka u ka naingai! Nan karra mi an khat in adik lam a manmang a, midang an khat in ama ha a hong tuang khir ret aninko,

²⁰ a man lam ani luia a che mi an khat ha Thavang thina ranga an phut asan ring jui ani. Hale mi hong tuang khir pa tu a chang innom, siatna tam tak ngaidam na rang chuan a tho ani tihi ngaidon ru.