JEMS 4 - Rabu Athar New Testament (BSI)

Ramuol le Sap chang

¹ Kan suol nale kan jei na rakipngai hi nang ni karra hon na an phut a hong suok mo? Hava ha nan tak sa shunga nan thei jak rang dei le ngai tui khop na rang ral a tho chak an phut nimak mo?

² Nang nin imo khat nan dei, tak-ha nei tor ma che u, hava jarra mi that ranga nan kan ning, mi nan en lal tak-ha mu tor ma che u, hava jarra nan kan suol la ral nan kan tho ani. Nan dei ha mu tor ma che u, ajarko hava ha Pathian jiang lam ma che u.

³ Hale nang nin nan lam pha han, nan lung ngaidon adik mak jarra nan lam ha mu tor ma che u, nang nin nan lam ha nan bing a hui na rang jak nan lam jarra nan mu torlui ani.

⁴ E takngai jot lui mingai, ramuol le sap chang hi Pathian enda ani tihi jet ma che mo? Tu a chang innom ramuol le sap chang rang a dei mi han Pathian a kan enda pui ani.

⁵ Pathian in kan shunga a na siak pe thavang ha adik khan na lungdo a nei ani; anti. Chong thiang ha i om ni lui a nan ngaidon mo?

⁶ Tak-ha Pathian a na pek manrit na ha angar det jui. Ajarko chong thiang in hingahin a ti, “Pathian in a man kan lian ngai a enda, tak-ha a man kan sin ngaiha a manrit ani.”

⁷ Hiva jarra nang ni Pathian jiang lutru. Seitan ha not cheiru, hale seitan ha nang ni tenna tan rang ani jui.

⁸ Nang nin Pathian nairu, hale a man a na dep rang ke. E, siat nei mingai; nan kut rasuk thiangru! A sat kan rol ngai, nan lung man thiangru!

⁹ Nan ning man dong nang chapru, nan nui na ha chayang siar na man changru hale nan ningsat na lam han chapna man changru.

¹⁰ Pathian mai kunga man kan sinru, ha aninko a man nang ni ha a na dom sang rang ke.

Ulenai Jiang Chongtan

¹¹ U le naingai, nang ni an khat le an khat kan risiat tho maru. Tu a chang innom a u anai a ri siat mi ha dan chunga chong a tan ani. Nang nin dan chunga chong nan tan a chang inko nang ni dan ajui ha ni lai ma che u.

¹² Pathian jak ha dan a pek le chongtan ha ani. Amajak in a na san tor, hale a na mang tor. Na sap chang pui chunga chong atan nang in imo ka ni tia na ngaidon?

Man kan lian na Chunga Manchuna

¹³ Ngairu! Nang ni aviar ning, “Ve en ni animakle jinga sova khuopuia son hong che in na kuminkum lal va uol tari, nanti.”

¹⁴ Jinga nan ringkhuo imo a suak rang nang nin jet ma che u! nang ni pha bongkhat suale a mang len rang sum phai anga nan ni ati.

¹⁵ Hiva jarra hingahin tiru Puman a na jot pe a chang inko, keini dam in lang, hi le hi: tho rei tiru.

¹⁶ Tak-ha nang ni man kan lian tak nan om aninko, hava anga man kan lian na rakip ha adik nimak.

¹⁷ Hiva jarra chuan asat tho rang a jet a, a tho mak mi ha siat nei ani.