HEBRU 8 - Rabu Athar New Testament (BSI)

Jisu keini Thiampulian A ni

¹ Hivahin keinin kan ri a chongpui ha a om: Vanram a alian ong na chang tianga an ong thiampu alian tak an khat keinin kan nei;

² Miring in an man sat inhuiha Puma a man sat an phut biakinn adik tak sunga a thiang tak mun na han thiampu alian tak achang aman sepa a tho ani.

³ Thiampu alian takngai Pathian jiang kan rasuk thianga, kan bol kan sem le kutchoi a pek ranga anmani a phun jui ani; hava keini thiampu alian tak han nom imo khat kat rang anei chiak rang a suak.

⁴ A man ramuol chunga a om lai Jiwngai sunga dan nuk juia kutchoi a kat rang thiampungai an om jarra ama thiampu an khat lui chang mak.

⁵ Thiampungai chuan lui tho ha Vanram ma omchan adik tak a ramil ankhat a man chu ani. Mousi le kan ruaia omchan an tho ha hava anga ani, biakinn na a tung rang pha, Pathian in Mousi jiang, “Tangbung chunga na mu anga tak balla sin na rang man thiangro,” a ti.

⁶ Ha a chang innom, Jisu ha anmani nek alian det thiampu chuan ha a pek, ajarko asat det ngai khat chunga chong shakhi a chang jarra Pathian le miring karra asat det an khat ani.

⁷ Chong shakhi phut na han adik mak na i jum alui om mak achang inko, anni chang na hin nom i ngai lui rang ani.

⁸ Tak-ha Pathian ning a mingai an ma sial na a mu pha hingahin a ri, “Enru, ani khuo a hong tung jui, Puma han a ti, Kein Israel mingai le Juda phung ngai, chong san na a thar an khat kan sin ha kan nei man rang ani jui.”

⁹ An pu an pa ngaile chong san na kan lui sin anga ni lai noning, hava lai han ijip ram ma an phut a kut a na lui kei suak ani, anmanin kan chong san na han takngai thei na lui nei ma u.

¹⁰ Hiva jarra Puman a ti, kein anmani ha tak luitel lai making, hiva ni khuongai ha a theng suapha Israel mingai le nei man rang chong shan ha hivahi ani, an lung sunga ka dan ha ka jiak pe rang ke, an lung sunga kai man lut pe rang ke; kei an Pathian ka chang rang ke, anmani ka mi chang rang anni.

¹¹ Puma ha jetro a ti, a u a nai jiang tu ten ri lai noni u, hale an ram mingai jiang om, tu ten ri lai noni u, ajarko, a sin tet an phut a lian tak tunga an jet sua pet rang ani jui.

¹² An ma sial na chunga lungsiat na nei rang ka ni jui, hale an siatna ngaiha, ngaidon lai noning; a ti.

¹³ Chong shakhi thar an ri chung changa hin, ama sat chong san na ha alui sa chang rang ani; hale, alui ha mangranga anai jui.