HEBRU 7 - Rabu Athar New Testament (BSI)

Thiampulian Melkijadek

¹ Hiva Melkijadek hi Salem ma reng alui chang thiampulian khat om alui ni, Abraham ning reng manli ha ral la ahong torra ahong kir han Melkijadek in alui don ravansat alui pek.

² Abraham ning a nei rakip ha semsomma sem khat ama jiang a pek, Melkijadek anti a ming hi adik rengpa tina ani, hale Salem reng a chang jarra lunghip reng tina om ani.

³ Melkijadek a pa le a nu ruia an jet na rabu om mak, apu apangai om rochi rabu om mak. A nai chang nale a thina om om mak, ama ko Pathian nai anga ani, thiampu an khat anga a om chak ani.

⁴ Hiva jarra ama ha i duk a lian mo tiha nang nin nan jet! Kan pa Abraham in ral mun na a hong mu rakip semsomma sem khat ama jiang a pek.

⁵ Levi atu a tengai thiampu a changngai han Israel naingai an phut semsomma sem khat chom na rang dan ning chong a pek jui, ti ko anmani Abraham tu le te an chang anin nom an ram mingai jiang an phut an chom ani.

⁶ Melkijadek ha Levi tu le te a chang mak innom Abraham Pathian chong shakhi atumpa an phut semsomma sem khat a luia ravansat na a pek jui.

⁷ Ravansat amupa nek ravansat na a pekpa ha alian det tihi lunga kei chi keiok na rang om mak.

⁸ Thiampungai ranga an chom ha ko a thi thei mi ranga an chom ani, tak-ha Melkijadek ranga an chom ha ko, a ring chak rengpa ranga semsomma sem khat an chom ani.

⁹ Hale Abraham ning semsomma sem khat a pek ha atu a chang Levi nom semsomma sem khat a chom pe ani tia an ri.

¹⁰ Taksa va an pu Abraham ha Melkijadek in alui don lai han Levi la nei ma u, tak-ha a man Abraham an phut semsomma sem khat a pek jui ke tia an ri jui.

¹¹ Levingai thiampu chang na chunga Israel naingai dan ha a pek jui, a tun Levi thiampungai chuan ha lungdo a tung a chang inko, Aaron a ruia, omchan nuk juia thiampu an khat chang jot mak.

¹² Ajarko thiampu a chang ha an thul pha, dan ha an thul jui ani.

¹³ Hale a tun kan pathian ama omchan chong an ri a phung dang khat mi ani, ama phung hin thiampu an khat achanga mai cham chunga sepa an lui tho chil lui ani.

¹⁴ A ma hi Juda phunga a hong kan jir mi an khat asat nianga a manjet chiak ani; hale Mousi ning thiampu chong alui ri lai han hiva phung hi lui man kan chel mak.

Melkijadek Anga Thiampulian

¹⁵ Melkijadek anga thiampu a dang khat a hong kando jui, ama ruia chong ha a thiang det jui.

¹⁶ A ma miring ngaidon nuk juia thiampu akhat a chang nimak; a tor ti buia ring chak ranak rat na han thiampu a chang jui ani.

¹⁷ Ajarko chong thiang in, “Nang Melkijadek anga amongtibui thiampu an khat chang theng pet rang na ni,”

¹⁸ hava jarra dan alui ha nei man jot lui a chang jarra, an siak jui ani.

¹⁹ Ajarko Mousi dan han i jum lungdo tung tor mak hale atun ko asat det an khat a hong choi jui, hava han kein in Pathian jiang kan nai det jui.

²⁰ Hava han Pathian chong shakhi ham a om de jui. Midangngai han thiampu an chang lai han hava anga Pathian chong shakhi ha lui om mak.

²¹ Tak-ha Jisu ha chong shakhi jarra thiampu an khat a hong chang jui. Ajarko Pathian ning ama jianga; Puma chong shakhi an khat a neia, a man a lung thul noning; nang kum sot thiampu na chang rang ke a ti.

²² Hiva jarra Jisu hi asat det chong shakhi rang ankhat le kan ruaia chong shakhi a dang an khat a sin ani.

²³ Hivahi ngak rang a om ankhat ani, thiampu a dang a tam takngai ha ko an thi jui jarra an chuan tho ha man kan jom tor ma u.

²⁴ Tak-ha Jisu ha ko kum sot a ring chak hale thiampu chuan ha midang an khat jiang pek mak.

²⁵ Hale aman tu nom kum sot ama jiang an phut Pathian jiang a hong nan ta kum sot ring na a tho tor, ajarko ama kum sot aring chak jarra anmani ranga Pathian jiang a lam pe chak jui.

²⁶ Hiva jarra kan dei kan dei na pek tor ranga Jisu ha thiampu alian tak a chang jui, ama a thiang ani, a man siat nale suk set na le asaluina ommak; mi sa mak ngai tenna an phut an khui sen na an siak jui.

²⁷ A ma ko thiampulian a dangngai anga nimak; ti ko ama ranga ama sat tak havasua mi pui ngai ranga siatna jarra ani tin na kan bol na a man ngai tui mak, a man a tak a thei jak a kan pek pha, mirakip rang vei khat jak kan bol na a changa a kan pek jui.

²⁸ Mousi dan in a man chang thiampu chung nung mi ha lungdo tung tor mak, tak-ha, dan nuk juia a hong Pathian nai ha ong na rang mun an pek jui.