HEBRU 5 - Rabu Athar New Testament (BSI)

¹ Thiampulian rakip mingai rahut a, Pathian sepa tho rang an karra an thang suak a an manchang ani, thiampu ning siat ngaidam nale kutchoi pek ngaiha a va kat ani;

² Thiampu a tak tak om ama sial na atam jarra a jet mak ngaile ama sial ngai jiang a nun chan man hui torna a nei.

³ Hale aman lam atam tak ama sial na jarra mingai siat choi na jak ni luia ama a bing om a kan choi chiak rang ani.

⁴ Thiampulian tak an khat achanga chit jak na ranga tu khat om a bing a kan thang suak mak, Aron a kui ang han mi an khat ha Pathian ning a kui le jak thiampu an chang chachak ani.

⁵ Hale a kan ang rip Khrista ning om Thiampulian tak an khat achanga chit jak na ha abinga kan lui mak. Tak-ha Pathian ning a ti nang ka nai na ni; ve enni kei na pa ka chang jui.

⁶ A man mun dang an khat hingahin a ti ret, “Melkijadek omchan nuk juia nang thiampu an khat chang rang na ni.”

⁷ A ma thina an phut tu ning mo a san tor rang? Tia Pathian jiang Jisun ramuol chunga a ring lai mit tui suak pumma a khek a ri; man kan sin tak a binga a kan pek a chang jarra Pathian ning a lam na ha a jet pe jui.

⁸ A man Pathian nai a chang in nom a khodengthei na han chong jui a chang na rang a kan chu ani.

⁹ A ma irakip a lungdo tunga chuan a sin Suapha ama a tak a ngai rakip ranga irakip kan san ring na kung ha a chang jui.

¹⁰ Hale Melkijadek anga ama thiampulian tak achang na Pathian ning a do pe jui.

Nuk Kirmak Na rang Man Chuna

¹¹ Keinin hiva ruia ri rang atam tak kan nei aninom jet na lam hi hi ang khan anut reija nari man thiang pe rang hi a tat.

¹² A tun na a pha hin ko nang ni mi man chu oja nan chang thei rang ani jui. Tak-ha a tun tunga Pathian chong a phut na jak ha man chu rang a la suak, burum nek a shelkhom tui lam nei rang hi a la om ani.

¹³ Tu aninom a tun tunga shelkhom tui ala in mi ha Siat na i jum ala jet lui nai pang an khat a la chang ani.

¹⁴ Hale burum a nek jui mi ha ko a siatna a jet jui, lungdo tung mi ha a chang jui.