HEBRU 4 - Rabu Athar New Testament (BSI)

¹ Atunko ama le pong kan sak suom na rang Pathian in keini pong kan sak na mun na lut na ranga chong shakhi a na mak pe jui, hale pong kan sak na mun tung rang tute khat in ama sial mak na rang kan ning thei ri.

² Ajarko anmanin an lui jet anga, kein in nom chongsat ha kan jet jui, anmanin chong thiang ha an jet a chang innom, an jet han an nem na rang i jum tho ma u, hale anmanin chong ha an jet pha takngai le kan ruaia lei lui ma u.

³ Hiva jarra a takngai kein in Pathian le pong kan sak na kan lut ani, A man hingahin a ti, “kei ka lung a thak pha chongsan an khat ka nei ani; i tik om anmani ka pong kan shak na mun na hong lut ma rase u, a man ramuol a sin suale a chuan a tor jui aninom hivahi a ri ani.”

⁴ Ajarko ni sa ri chang na chung changa chong thiang mun khat hingahin a ti, “Pathian ha a chuan rakip an phut ni sa ri chang na pong a kan shak.”

⁵ Hi ang hin a ti ret, pha rakip a kei le pong kan sak suom ranga anmani hi ka pong kan shak na han hong lut noni u.

⁶ A ma sat chongsat an jet ngai han tak a ngai mak jarra, Pathian le pong kan shak na han an lut mak rang an om ajarko tak an ngai mak jarra ani, aninom a dang aviar ko an lut rang an om.

⁷ Han na a kando ha ko. “Ve enni nikhuo anti nikhuo an khat hi Pathian in a sin na a siak jui,” kum a tam tak suale chong thianga a om sa Pathian in David Jiang a ti, “Nang nin ve enni Pathian rasa nan jet inko, nan lung man ngar maru.”

⁸ Ajarko Josua nin Pathian mingai ha a pong kan shak na mun na alui man lut inko, nikhuo dang chung changa Pathian in vei khat lui ri ret noning.

⁹ Hi a chang innom ni sa ri chang na Pathian pong kan shak anga, Pathian mingai pong kan sak na a la om ani.

¹⁰ Ajarko Pathian in a chuan ha pong a kan shak anga, tu aninom Pathian pong kan shak na mun na a lut mi ha a chuan na an phut pong kan shak na a mu jui.

¹¹ Hiva jarra puma le pong kan sak na mun tung na rang kan tor khan na asat ha thori, tu khat om anmani anga chong jui lui jarra a lut torlui kan chang mak na rang chong jui lui chang ma ri.

¹² Ajarko Pathian chong ha a ring chak le chuan tho chak ani, chemsei vei le chang a ngei nek a thuk tak a at tor, tak sha le thavang a kan chun na hale sarule a hang sun khui tor, miring lung ngaidon le dei rakip a jet tor ha ani.

¹³ Pathian jiang a kan thup tor ite khat om mak, a kut sin rakip a mai kunga a kando ani, hale keini kan tak kan theijak a kan omchan kan kan jet na ha kan renga Pathian jiang kan la pek lut rang ani.

Thiampulian tak Jisu A ni

¹⁴ Hiva jarra keinin kan nei tak kan takngai na ha o tit rei, ajarko thiampu a lian tak an khat Pathian jiang a tunga, a che rang Pathian nai Jisu ha keinin kan nei jui.

¹⁵ Kan thiampulian han keini kan ma sial na ha a jet mak nimak, keini anga a lam rakip mathemna a kan tong pui ani Tak-ha a man siatna ite khat nei mak; Siatna a nei chillui thiampulian ha kein in kan nei ani.

¹⁶ Hiva jarra manrit na mun Pathian chung nung tak ong na tiang lungam tak le ningsat tak a che rei. Hava mun na han keini kan dei le kan ngai tui na chunga ana kan ruai pui rang manrit nale tum rang ha kan mu rang ke.