HEBRU 3 - Rabu Athar New Testament (BSI)

Mousi Nek Jisu A lian

¹ A e sap le jar, Pathian in a na kui Khristianngai, Pathian a hong tir thiampu chung nung, kan takngai Jisu hi enru.

² Ajarko Pathian inn sung pumpui ranga Mousi ha a chuan nuk jui takngai jot achang ang han, Jisu ham chuan sin ranga an thang suak Pathian takngai khat ha a chang jui.

³ Inn a hui tak a sin mi an khat ha a inn sin nek a asin pa ha asat det, hava ang han Mousi nek a Jisu ha alian det.

⁴ In rakip hi mi an khat a sin pu an om, hale i rakip a sin ha Pathian an khat jak ani.

⁵ Pathian inn sung pumpui chunga Mousi ha takngai om tak alui chang, a man nuk hong suok rang omchan ri rang ani.

⁶ Aninom Khrista ha Pathian in sunga put ranga takngai jot nai an khat ani, keinin kan ngaidon na chunga tak kan ngai le kan ningsat na jak ha a torna tunga kan otit inko, keni hi a inn sung kan ni.

Mi thiang Ngai Ranga Pong kan sak na

⁷ Ajarko Thavang Thiang in a ti anga, nang in ve enni Pathian rasa na jet inko.

⁸ Nan pa nan pungai anga om maru, nan lung man ngar maru, a tuan lai ramtonglian na Pathian ha an lui en sin anga en sin maru.

⁹ Hava mun han nan pa nan pungai ning kumsommanli ka chuan sin an mu ani nom, anmanin kei hi en sin na an na lui nei, tia Pathian in a ri.

¹⁰ Kei hiva ngai chunga lung thak na ka nei a anmanin an ngaidon na rakip ani lui tiang ngaidon na a nei, hale ka chong hi jui chil ma u.

¹¹ Kei ning ka lung a thak chong sam na khat ka neija kati, i tik aninom anmanin ka pong kan sak na mun na hong lut ma rase u.

¹² Sap le jar ngai, a ring chak Pathian na an phut tute an kan hei mak na rang, hi ang khan na an lung a samakle an takngai mak na nan karra a om mak na rang kan ning theiru.

¹³ Nan karra tute khat om siatna an chul mak na rang le a lung a ngar mak na rang ve enni nikhuo a om lai hin chong thiang nei man na khat le khat man kan churru.

¹⁴ Ajarko a phut lai tenna kein in tak kan ngaiha kan otit inko, keini kan renga Khrista le tum kan neisuom ani.

¹⁵ Chong thiang in a ri, “Nang nin ve enni Pathian rasa nan jet inko, ama le ral tho na rang nan lung man ngar maru”.

¹⁶ Pathian rasa a jet tak tel lui chong kan kher neipu tu ngai mo? Mousi ning ijip ram ma an phut a hong kai ruoi mingai ha ani.

¹⁷ Kumsommanli Pathian lung thak na ngaiha tu ngai mo? Mi sat mak ngai chunga a lung a thak hale ramtonglian na a thi ngaiha anni.

¹⁸ Pathian ning chong sam na anei a “Itik aninom anmaning ka pong kan sak na mun na hong lut ma rase u a ti ngaiha tu ngai mo? A ma le chong kan kherna an neija a en dangai chunga a ti ani.

¹⁹ Hiva jarra anmanin tak an luingai mak jarra hava ramma an lut tor mak ani, hivahi kein in kan mu ani.”