HEBRU 13 - Rabu Athar New Testament (BSI)

Pathian Lung Man tai na

¹ Khrista minga ulenaingai a chang nangni ankhat le an khat kan lungsiat chakru.

² Nan inna khual mi an hong tung karra asat nianga don na rang thoru, ha ang han mi her khat ning jet lui thai luia chung van Thavang Thiang ngai inna an man tunga an lui don.

³ Ren inna an khum ma an omngai ha nang nin anmani le an na khum de jui ke tia ngaidon ru; khodeng an thei ngaiha anmani anga keini om khodeng kan thei ke tia ngaidon ru.

⁴ Luhuong inn nei hi mirakip ning chit jak na nei rase u, hale sang ram a chang ngaiha an khat le an khat tak kan ngai chang rase u, mi chuk lui le omchan adik mak tho ha ko Pathian in chong a tan rang ke.

⁵ Peisa ruphai dei na ning ringkhuo chunga vaihom ma rase, na nei sa lep ha nan lungdo tung ha man changru. Ajarko Pathian ning a ti, “Kein nang ni ha na mak chil noning.”

⁶ Hiva jarra lung ngam tak hingahin kein in rirei; Puman kei ana kan ruaipui, kei chit noning miring in ka chunga imo an tho tor rang tirei.

⁷ Pathian chong nang ni jianga an na ripengai, lam a keia alui ngaiha ngaidon chakru, anmaningai hongan mo an lui ringa, hongan mo an lui thi tiha ngaidon chak un na, anmani takngai na ha juiru.

⁸ Jisu Khrista ha ko mi jan, ve en ni hale kum sot a anga ngai ani.

⁹ Adik lam ma an phut adik mak lam tianga tuang na ranga, adik lui man chuna tiang tuang ma rase u, chak le nek chung chang a dan jui ha chang luia Pathian manrit na han lam kan sin man ngar rang hi kan thavang ranga asat ha ani; hale dan a jui ngai han a nem na i jum nei pui det ma u.

¹⁰ Jiwngai biakinn sunga se pa tho thiampungai han keini mai cham chunga kan bol na hi chak jot mak.

¹¹ Jiwngai thiampulian han siat kan bol na a hong kat ani; tak-ha a tak sa pum ha ko khur sunga an ro ani.

¹² Han Jisu Khrista siatna man thiang na rang khopui tual tiang a hong thi ani,

¹³ Hiva jarra ama jak na nei pui ranga ama jiang khur tual tiang suak rei.

¹⁴ keini hiva ramuol chunga hin khopui a det ha nei mak sing; hava jarra kein in a hong rang khopui ha kan en chak ani.

¹⁵ Hiva jarra kein in Jisu Khrista kan bol na anga, Pathian jiang manpak na pek chak rei, kan rasa han a ming ha choi man sang rei.

¹⁶ An khat le an khat kan san suam ma chuan sat tho rang thei nima rei; ajarko Pathian lungtai na rang kan pek ver ha hi ani.

¹⁷ Nan lam kaingai chong jui le kan ruaia an chong na be ha juiru, anmanin an sepa tho na chung changa Pathian jiang an la pek rang ani jarra anmanin pong kan sak chil luia nan thavang chunga an na en chak ani, nang nin chong nan jui aninko anmanin ningsat tak chuan nan tho rang ani, hava ni luia an lunga ning dong pumma chuan an tho aninko nang ni ranga a nemna om noning.

¹⁸ Keini ranga lam na na nei pe chakru, pha rakip irakip kein in chuan adik ha kan tho jot tihi jet thei na ranga,

¹⁹ hale Pathian ning nang ni jiang keihi a rak a na hong tir na rang lam na na nei peru tia ka na ri.

A torna Lam na

²⁰ Belramsel a lian tak kan puma Jisu Khrista ha a thina han kum sot chong shakhi sil an nam jui ani. A ma Pathian in thina an phut a man ring jui.

²¹ Lunghip lungdai Pathian chuan man tho na rang, nan dei nan ngai tui rakip ama ning na man tung pe rase, Jisu Khrista chunga a man a tai na ha tho rase, han Khrista ha a phat a phat da mahok na ha om rase, Amen.

²² U le naingai hiva mathok na chong thang kui na hi nanngai ranga kei ning ka na ri ani,

²³ Kan u kan nai Timothi renin na an khum tenna an masua jui tihi nan jet rang ka dei, ama a rak tak a hong tung inko, nang ni le kan mu ranga a hong pha ama le kan hong kan ruai rang ke.

²⁴ Pathian mingai rakip le lam a keingai rakip kan chubei lui pekru, Itali a om sap le jar ngai ning chubei an na hong pek.

²⁵ Pathian manrit na han nan renga na om pui chak rase.