HEBRU 12 - Rabu Athar New Testament (BSI)

Kan pa Pathian

¹ Keini ranga takngai na jet thei na ranga sakhi lian atam tak in kan sir kan panga a na tan jui ani. Siatna a o tit na rang om a lam rakip kan nok na ngai deng jaun pet innang, kan madonna a om kan lungdo mun tiang jong innang risiat tho innang tanrei.

² A phut na tenna an phut kan takngai na kan lung ngam na, Jisu ha a torna tunga keini en chak rei, a man Khros chunga mel siat a athi rang ha i jum ngaidon luia, a ral torna ningsat nan a na ngak chak lam ha a ngaidon na Khros lam ha a roa, tun hin Pathian lam lian inn ong na chang tiang ama aongna han a om jui.

³ Mi sa mak ngai ning Jisu ha hava ang khan an enda nom a khang ha ngaidon ru, hava jarra nangni nan tak nan thei jak hui na ranga nan tha man siat maru,

⁴ Ajarko nang nin siat khanga ral nan kan tho puina sunga hin thina tunga ral la khang mak che u.

⁵ Nan lungam na rang Pathian a nai anga ana man chu na chong ha nan thei ni jui mo? “Ka nai Puma ning ana man chu pha, asat ngairo, a na ran pha han, na lung man sin maro.”

⁶ Ajarko Puma han a lungsiat ngai jak ha a na man chu ani, hale a man a nai a man chang jak a ve a a man chu ani.

⁷ Pa ning ana man chu na ngai ha a dui ratru, ajarko pong khodeng na thei na ha Pathian in a nai anga ina man chu ani, a pan a nai a man chu mak mi an omngai mo?

⁸ Nang ni hiva ngai rakip hin a na man chu mak a chang inko, nang ni anai tak chang ma che, cha zai nai ngaiha nan ni.

⁹ Kan tak sa ramuol ta a chang ngai ning keini an na man chua an na man dik chit jak na kan nei, ha a chang inko, a khel det ka tha vai ranga pa a chang ha ko kan lut kan ring rang a suak!

¹⁰ Tak sa ramuol pangai ning pha bongkhat jak an na man chu ke ani, tak-ha keini Pathian a thiang na ha kan tum pui thei na rang hivahi keini satna ranga Pathianin ina var ani.

¹¹ Keini tanti a na pek pha, keini kan lung a kan nok pha bongkhat ko kan ningsat lai mak, ha a chang innom hava anga man dik na ngaiha nuk ako lunghip lungdai na lo man ringkhuo adik a pek jui.

Manchu Nale Ranna

¹² Na kut ban ha domru, hale, nan khup biling ham man ngarru!

¹³ Hale nan ke thon na rang lam man tunru, hale nan kut nan ke ngaiha zeng lai noning, dam ver rang ani jui, hale a ke kiak ngain lam ha asat an ro thei na rang le kutsuikesui an nei mak na rang, nan che na lam ha sin man tunru.

¹⁴ Mirakip le kan top thei na rang le ringkhuo a thianga om na rang thoru, ajarko hava niluia tu ten Puma mu tor noning.

¹⁵ Pathian manrit na an phut tute nuk tiang an kir mak na rang, hale, ramsul a kha anga a hong kei sua a turin mirakip a man chok mak na rang kan ching theiru.

¹⁶ Esau ning nai ulian a chang na a tum rang ha bulom khat jak a juor anga taksa ramuol tho salui le omchan adik mak tute a hong mak na rang kan ning theiru.

¹⁷ Ajarko nuk a pa ning phual a pek rang ha a man a dei a mit tui suak pumma a hong a chang innom alui theng sa ani thul ret na rang om om mak jarra a kir jui tihi nang in na jet.

¹⁸ Israel naingai ning Sinai tangbunga mei chuan rori a jing, Pengkul a ring rasa karra an hong anga nang nin hong mak che u.

¹⁹ Anmanin rasa ngaiha an jet pha a dang rasa an jet mak na rang an lui ri jui,

²⁰ Ajarko, anmanin chong an ri a khang tor ma u, chong pek ha hingahin an ri, Jiba a tha vai pal an khat in tangbunga a hong sit pha, hava thavang pal ha lunga deng rang ke, anti,

²¹ Hava an mu ha iduk chit a om, ajarko Mousi ning kei a tam tak ka chit ka kan nok jui a ti.

²² Nangni ko hava nek a ring chak Pathian om na khopui Zion tang, chung van Jerusalem Thavang Thiang lising lising om na,

²³ chung van na ming jiak man lut na Pathian nai ulianngai ningsat an kan chun na ningsat mirakip chongtan Pathian jiang, hale adik mingai Thavang Thiang lungdo tunga an sin na mun,

²⁴ chong shakhi thar a sin Jisu jiang, Abel thi sen nek asat det a ri thisen a chai thuan na mu na a hong man nei,

²⁵ Hiva jarra chong a ri pan man ngai siat mak na rang kan ning theiru. Ramuol la chong thang kui pa chong a ngai mak ngal lom ngaidam a om lui inko chunga an phut chong ahong ripa chong a ngai mak ha ko a khel la ngaidam na i mu lui rang ani.

²⁶ Hava lai tak han a man ramuol a man kan nok jui, tak-ha a tun ko chong sham chong a san na a ri kein a tharra ramuol jak ni luia chung van nom ka man kan nok rang ke.

²⁷ Han a tharra vei khat a kan tir an ti ret hin a man kan nok phur ngai jak a om ma, a kan tir a kan nok kut sin rakip ha a manmang rang hi a thiang khet a kando jui.

²⁸ Hiva jarra kein in a kan thit mak rengram ha kan tum jui a chang jarra ningsat tak choi man sang rei, Pathian ha kein in chit tak le jak tak a lung kan man tai na rang chubeibuk a manpak rei;

²⁹ Ajarko han Pathian ha roman mang na mei khet ha ani.