HEBRU 10 - Rabu Athar New Testament (BSI)

¹ Jiwngai dan ha lungdo tunga takngai rang lui chang mak; nuk a tak khet asat det an khat a hong rang melpua ha ani. Akum racham kan bol na ha hangahan anga ngaija a om chak ani, ha aninko Pathian jiang a che mingai ha hiva kan bol na dan ha ijamo lungdo a tung tor rang ani jui.

² Hingahin an tho va Pathian chubeibuk mingai an siatna a thiang aninko, anmanin an dik mak an siatna ha an lunga ning dong pui rang om mak, hale kan bol na rakip an lui bang rang ani jui,

³ Tak-ha a kum racham ma mingai an lunga an siatna ngaiha an ngaidam ma an lui kan bol chak ani.

⁴ Ajarko serat a challe kel ngai thisen han an siatna kum sot ranga man thiang tor mak.

⁵ Hiva jarra Khristan ramuol chunga a hong rang tiang a man Pathian jiang a ri, “Nang in kan bol la an khat ha dei mak che, tak-ha, kei ranga tak sha an khat na na kan ning pe jui.”

⁶ Nang in meija anro siatna jarra an khat han na lung taimak.

⁷ Hiva jarra kein kari, dan rabu a kei ka chunga ani anga, a e “Pathian, nang na na man tho jot tho ranga kei ka hong jui.”

⁸ A man ama sat tak a ri; nang in an khat kan bol le siat jarra roman vam ranga dei mak che, na lung tai na om mak a ti, dan nuk juia pek na rakipngai ham dei mak che.

⁹ Hava suale a man a ti, “A e Pathian, na lungdo tho ranga kei ka hong jui,” Hiva jarra kan bol na aluisa rakip Pathian ning a manmang a Khrista ning a man thiang jui.

¹⁰ Jisu Khrista a taksa a hong kan pek, Pathian a dei ha ahong tho jarra keini kan renga siatna an phut a na man thiang jui.

¹¹ Jiwngai thiampu rakip ning anitin sepa an tho na mun na an ngir chak jui, hale kan bol na anga ngaija vei khat an thoa an kan pek, tak-ha hiva kan bol na siatna ngaiha manmang tor mak,

¹² Tak-ha Khrista ning kum sot ranga vei khat jak kan bol na achanga a hong kan pek pha, ama Pathian chang tiang ahong jui.

¹³ A ma i kan enda pui ngaiha Pathian ning a ke thoija asir dea a siak mak kar je hava mun han a man a ngak a om ani.

¹⁴ Hiva jarra vei khat kan bol na han siatna a na man thiang mingai ranga kum sot lungdo tung na a sin jui.

¹⁵ Ajarko Thavang Thiang in nom shakhi a pek; hava ni khuongai ha a theng suale, kein anmani le chong shakhi kan nei rang ani.

¹⁶ Kei ning an lung sunga ka dan siak pe rang ka ni, hale an lung rilla, an ngaidon na ha ka jiak man lut pe rang ke, han Puma ning a ti,

¹⁷ “A man an siatna ngaile an chuan salui tho ngaiha kei ngaidon ret lai noning” a ti.

¹⁸ Hiva jarra siatna ngaihi a ngaidam suapha, siatna a choi ngai ranga kan bol na vei khat ngar ret lai mak jui.

Pathian Jiang Hong dep na

¹⁹ Hiva jarra ulenaingai Jisu a thisen tenna phut, mun thiang na han tung rang kan ni.

²⁰ Jisu a taksa khet in ponlep hi a long a ring na lam thar khat hi keini ranga ana pe jui.

²¹ keinin thiampulian Pathian inn sunga an phut kan nei jui ani.

²² Hiva jarra asat le a siat jet thei na lung adik mak le tak sa ngaihi, lung a thianga takngai le nei man rei.

²³ keinin kan lung ngampui ha a det otit rei, ajarko chong shakhi a na pek pe Pathian ha takngai rang a om tak ani.

²⁴ Chuan asat tho na rang le kan san suam ma lungsiat do na rang, khat le khat lung kan ma thok peru.

²⁵ Mi her khat an tho anga, kein in a ngai a kan kan chu chak hi bang marei, Puma hong na rang a nai jui tihi nan lui mu jarra a khel det an khat le an khat kan chu na ranga lung kan ma thok chak ri.

²⁶ Ajarko keinin adik ha kan jet sua nuk, kan jet pu pumma siatna kan la tho chak a chang inko, siatna choi rang madonna kan bol na om ret lai noning.

²⁷ Pathian a enda ngai manmang na ranga chongtan nale mei ranak a kang, chit na om tak ha a om jui.

²⁸ Tu a chang innom Mousi dan a jui lui mi ha, chongtan na an nei pha, mi anni an thum shakhi tenna alui dik mak a chang inko, lungsiat na om chil luia that rang ani jui.

²⁹ Ha aninko Pathian Pasalnai ha a nuisova, Pathian chong shakhi thisen thiang ha ama a siatna tenna i man thiang tor ha a man om mak inko? Thavang thiang manrit na ham i jot lui mi ha i duk khodengthei na mo i mu rang ha ngaidonro.

³⁰ Ajarko a man a ti, “kein a phu ki lui rang ke,” hale hingahin nom a ri, Puman a mi ngaiha chongtan na nei nati.

³¹ A ring chak Pathian kut chunga kan kan tong pui rang ha chit om tak ani.

³² Man lai a man nang ni le alui om ha ngaidon ru, hava lai Pathian in nan chunga a man varra han nang nin pong khodeng nan thei rang ha an in nom pong khodengthei han na lui tor mak.

³³ Nang nin mitam mai kung a kan sual nale esella an na lui tho, han pha khat han nom nang ni jiang a na man pong ngai kar han nom nang ni nan kan chel jot.

³⁴ Nang nin imo asat det na nei ha nan jet jarra ren inna omngai nan phur rakip an na sut innom nan dui puisuam tor.

³⁵ Nan ningsat na ha manmang maru, ajarko nan tum rang alian tak ha hong choi rang ani.

³⁶ Pathian chong shakhi tum na rang le a lungdo tho ranga nan khang rat rang hi a suak jui.

³⁷ Ajarko chong thiang in hinga a ri, a pha bongkhat suale a hong rang ama ha hong rang ani, ama hong sot noning.

³⁸ Aninnom ka mi adik ngai han tak an ngai rang ke hale an ring rang ani, tak-ha an karra an nuk an kir an om inko, kei an chunga ka lung tai noning.

³⁹ Keini ko nuk kir a mang ngaiha ni maksing, hava nek a takngai mi kan san ring ha kan ni.