GALATIA 3 - Rabu Athar New Testament (BSI)

Che na dan ha mo animakle takngai ha mo

¹ O, a pang Galatia mingai! Nan madon tak a Jisu khrista ha khros chunga an that a om ha tu ning mo nan mitngai ha a na man vet pe jui?

² Kein nang ni jiang ka jet jot, nang nin chena dan nan jui han mo thavang thiang nan mu? animakle Pathian chongsat ha manjet da tak na ngai han mo nan mu?

³ Nang nin iduk mo nan pang? Pathian Thavanga nan phut da atun taksa ranak hin mo nan man tor rang?

⁴ Nang nin hivak han khodengthei na nan hong dui ha a riampa mo ani ta rang?

⁵ Hiva jarra puman nang ni jiang Thavang Thiang ana pek a nan karra tho torlui rang chuan nan tor ngaiha chena dan nan jui han mo aninmakle Pathian chong nan jet a nan jui han mo ani?

⁶ Abraham ning Pathian ha takngai na alui nei hale ama han takngai na a nei jarra pathian in a thiang mi khat alui manchang.

⁷ Enru Pathian jiang takngai na a nei mingai ha Abraham a naingai an ni jui.

⁸ Pathian chong thiang in ana lui manjet, Jatdangai om takngai na an nei inko a man thiang rang ke hale: “Abraham jiang alui pek Pathian phual rakip ha jat rakip ning mu nanti.”

⁹ Hiva jarra takngai na a nei mingai ha Abraham le phual an mu chun ani.

¹⁰ Ajarko chena dan na lungam na anei ngaiha kho khong tung nanti, hingahin chong thianga alui kan jiak.

¹¹ Atunko athinga kan jet jui, tu khat om Pathian madonna chena dan ning ma thiang tor mak, ajarko takngai na anei ama han a thianga ring tor nati.

¹² Chena dan ha ko takngai na jarra nimak, tak-ha irakip a jui mi han chena dan han ama ring rase.

¹³ Ajarko che na dan ha juia kho khong kan mu rang tenna Khrista ning keini hi ana tan ring jui, a man keini ranga kho khong a tung jui. Pathian chong thinga a lui kan jiak, thing kung chunga an khai mirakip ha Pathian kho khong ani.

¹⁴ Abraham jiang a om phual ha Jisu Khrista jarra jatdangai chunga hale keini takngai na jarra Pathian thavanga ring na mu rang kan ni.

Che na dan le Pathian Chongsan

¹⁵ U le naingai nan jet theina rang ri kati, mi anni ning an kan jot a che chunga suai an nam, nuk a tu khat ning om hap de le kei sua khir tor ma u.

¹⁶ Atunko Abraham le a naingai ranga puman chongsan na alui nei. A naingai tiko mitam ha luiti mak tak-ha a nai an khat alui ti, ama ko Jisu Khrista ani.

¹⁷ Pathian in Abraham le kan jot na chongsan alui nei. Kum re manli le kum somthum suale che na dan a hong pek, hava chena dan han Pathian chongsan ha manmang tor noning.

¹⁸ Ajarko Pathian kutchoi kum sot ring na ha, che na dan thuaia a om inko, Pathian chongsan ha kan ngai tui rang suak mak, hi ani nom Pathian ning Abraham jiang chongsan ha alui pek jui.

¹⁹ Chena dan ha Imo ani? Chena dan ning miringai an siatna ha a man kan jet. Hivahi Pathian chongsan na a hong rang Abraham achi a hong tung mak kar je kan put na ranga, chena dan hi thaneithiang in a man thianga a laija a om chongchoi pa jiang alui pek ani.

²⁰ Atunko chong choipa ha a nemna na om lai mak jui, Pathian ning a kan chel jui, hale pathian ko khat jak ani.

Che na dan Nei man na

²¹ Chena dan ning Pathian chongsan ha a khan mo? lui nimak, chena dan jarra mingai ning Pathian jiang ringna an mu aninko mirakip ning dan ha jui nan ta Pathian jiang an man kan thiang tor rang asuak.

²² Pathian chong thiang in ati, ramuol hi siatna thuaija a om, tak-ha Jisu jiang ring na a om tia Pathian chong san ha, takngai mirakip jiang a pek rang ke.

²³ Takngai a hong madonna, keini hi chena dan ning ana lui khit, takngai ha lui jet masing.

²⁴ Hiva jarra Khrista a hong khan na keini hi chena dan ning ana lui khap ha, takngai jarra keini man kan thiang na kan nei jui.

²⁵ Atunko takngai na ha kan nei jui. Chena dan ning na chur lai mak.

²⁶ Hiva jarra nang ni rakip Khrista ha takngai na nan nei jarra Pathian nai nan ni jui.

²⁷ Nang ni Khrista le tuija baptais a tho ngai rakip ning Khrista ha puan si anga si taru.

²⁸ Hiva ruia Jiw le Jatdangai le ariang le a nei, numei le pasal nan renga Khrista jiang khat jak nan ni jui.

²⁹ Hale nang ni Khrista jiang nan om aninko Abraham a naingai ha nan ni jui, hale Pathian a chong san ha nan mu rang ke.