EPHESIA 6 - Rabu Athar New Testament (BSI)

Naipangngai le nu le pangai

¹ Naipangai Pathian jiang nan nu nan pa ning an nari ha juiru, hivahi adik tak ani.

² Nang nin ravansat muna rang le ramuol la ringkhuo sot nan om thei na ranga nan nu nan pa ha chitlejak neiru, hivahi a rapa tak chena dan le puma chong pek ani.

³ Hi aninko nang ni ningsat a ramuol hin asot om nanti.

⁴ Hale pangai ning om nan naingai lung tokna tho pe maru han puma jet thei nale ching thei na ranga man churu.

⁵ Suakngai ning om ramuol la nan neipungai ha chitlejak ha neiru hale Pathian jiang om, hingahin ni ru.

⁶ Ramuol mit en rang le mi lung khop na rang jak ni luija Khrista chuan sin kan ni tia nan lung lut a Khrista lungdo ha thoru.

⁷ Miringngai chuan nan tho chang mak, Pathian lungdo chuan sat ha thoru.

⁸ Nang nin jetru chuan sat atho mingai chunga Pathian ning chuan sat a pek rang ke, kan chong pa ani nom suakpa aninom.

⁹ Suak neipu nang ni ning om nan suakngain anga thoru man ritru, vanram ma a om puma ama ko a renga a neipu ani, ama jiang mi chang mi kha om mak.

Khristianngai ral tho na chem le pho

¹⁰ Puma jiang nang nin adet a om ru.

¹¹ Puma jiang a om ral tho na chem le pho ngaiha lek taru siatna a salui madonna nan ngir torna rang.

¹² Keini ning kan tho ral hi thisen le taksa ral chang mak, Seitan ning ramuol la alian a rangai jiang ani lui chuan lam aman tho, hiva Thavang salui ning ramuol aman jing ngai chunga ral kan tho ani.

¹³ Nang nin hava nikhuo a hong tung karra a satlui ning ana tor mak na ranga ral chem le puan si ngaiha tho taru.

¹⁴ Hiva jarra nan tak sunga chuan dik le chunsat ngaiha thun nang,

¹⁵ nan ke ning Pathian chongsat le lunghip na ha choinang kan ning taru.

¹⁶ Phat rakip a Pathian tak nan ngai na ha nan kut a nan khit aninko a satlui meithal ning natok noning.

¹⁷ Kum sot ringna chong ha nan lu hup man changru, Pathian Thavang Thiang lam nan chemsei man changru.

¹⁸ Phat rakip a lam na neiru Thavang Thiang ning a torna khan na khang thei nale kan ning thei na na pek rase, mi thiang ngai rang om lam deru.

¹⁹ Han kei rang om Pathian lam na na nei peru, Pathian chongsat ranak nei a ka ri torna ranga.

²⁰ Kei Pathian chong ri ranga ama rahut a natir ani, hiva jarra kein ren inn na thir rui le ka om. Lam na na nei peru kein Pathian chong ha ranak neia la ri tor kati.

A torna Chong pek

²¹ Atunko nang nin nom keihi ija mo ka om tiha Taichikas Pathian chuan tho ama ning a renga nari pe rang ani.

²² Hiva jarra ama hi nang ni jiang ka hong tir ani, hale ama ning keini ruia nari pe na ta nan lung sunga thanuam na na pek nati.

²³ Puma Pathian le Jisu Khrista tenna lunghip na han ka u ka naingai chunga lunghip le takngai na om rase.

²⁴ Pathian ami lungsiat thei nale Jisu Khrista a lungsiat ha nan chunga om rase.