EPHESIA 5 - Rabu Athar New Testament (BSI)

Avarna mun na om na

¹ Nangni Pathian in anadei a naingai nan ni jarra ama anga ni ru.

² Pathian madonna Jisu Khrista ning thairim hui anga a taksa hi nangni ranga alui kan pek anga nang nin nom lungsiat tak a kan pekru.

³ Nan karra a salui chuan tho minu en, mi en lal kan ti ngaihi mak taru athiang karra mi thiang ha chang taru.

⁴ Hale chong ngal a pang chong jek chiam chong asalui ite khat ri lai maru, hiva rahut a Pathian ha man pakru.

⁵ Nang nin nan jet mi risiat chuan salui tho mi en lal, kut asin Pathian chubei bukngai ranga Pathian rengram ma an mu rang tum om mak.

⁶ Ani lui chong han nangni tu khat ning om man kan huang maru, chong jui lui mingai chunga Pathian lung thakna a om.

⁷ Hiva jarra nangni anmani le kan ang maru.

⁸ Ajarko phat khat a nangni a jing na inna nan lui om tak-ha a tun ko Pathian a varna hin nan om jui.

⁹ Avar ning imanra ngaiha ko adik, asat, chuan sat, ngaiha ani.

¹⁰ Puma lungdo ha imo ani tiha tokru.

¹¹ A man buia ajing chuan ngaiha tho maru, hava ngaiha ko ajinga a om miranga ani; hiva rahut a salui ama ha kando rase.

¹² Hivahi jek a jak rang a om ruk a an tho chuan ani.

¹³ A satlui rakip ha avarna an hong do karra anmani an omchan le an nun chan ha a hong kando.

¹⁴ Hingahin chong thianga alui om, ajalla a omngai thuitaru, thina tenna thuitaru hale Khrista ama ning avar ha na pek nati.

¹⁵ Kan ning theiru, apangngai anga om maru, tak-ha aching mi anga omru.

¹⁶ Aphat hi asat a neiman theiru ajarko a phat hi seitan phat ani jui.

¹⁷ Apanga om lai maru, pathian in imo a na man tho jot ha tokru.

¹⁸ Hale ju inna rui maru nangni mang na rang ke, tak-ha Thavang Thiang ha nan sunga mansipru.

¹⁹ Khat le khat jiang la hui le rol hui tak a Pathian chong thianga la ngaiha kan tho peru hale Pathian ha nan lung sunga man pakru.

²⁰ Phat rakip a irakip a Pa Pathian ha man pakru Jisu Khrista minga.

Lomnu le Lompa

²¹ Nangni khat le khat chitlejak a Khrista jiang man kan ritru.

²² Numeingain nan pasalngai ha chitlejak neiru, Pathian jiang chitlejak nan nei anga.

²³ Ajarko numeingai luko nan pasalngai ha anni, Khrista ning biakrupngai lu ha ani. Biakrup hi ama taksa ani, hale biakrupngai a neipu ko Khrista ha ani.

²⁴ Khrista thuaija biakrup a om ang hin numeingai ning om irakip a nan pasalngai thuaija om ru.

²⁵ Pasalngai ning nan numeingai ha lungsiatru Jisu Khrista ning om biakrup ha a lungsiat a atak pumpui alui kan pek.

²⁶ Biakrup hi puma Pathian jiang pek lut na ranga tuija an rasuk suale Pathian ama chongsat han a rasuk jui.

²⁷ Puma Pathian a tak tak om na a jot na ranga apo, a kiak, akui, ite om luia athianga asiak jui.

²⁸ Pasalngai ning an numeingai ha an tak an kan lungsiat anga lungsiat rase u.

²⁹ Tu khat ning om an tak mang na ranga a salui tho ma u, hale an taksa asat na ranga manrit le lungsiat tak a an tho anga Khrista ning om biakrup ha a lungsiat.

³⁰ Ajarko keini hi ama a taksa biakrup mi kan ni.

³¹ Pathian chong thiang han a ti pasal ning a nu le a pa mak nata a numei le om rase hale anmani anni tak khat chang rase u.

³² Hivahi Pathian chong dik Khrista tenna biakrup jiang kari ani.

³³ Hivahi nang nin nom mirakip ning om an numeingai ha chitlejak a lungsiat rase u.