EPHESIA 3 - Rabu Athar New Testament (BSI)

Paul jatdangai ranga chuan a tho na

¹ Paul kei ning Jisu Khrista chongsat ruia jatdangai rahut a ren inn na ka om.

² Ajarko nang ni ning nan jet Pathian ning ana lungsiat jarra hiva chuan hi nangni satna ranga a na pek ani.

³ Pathian ning a tho jot a lungdo chuan rakip ha ruk a ana lui ri han kei ning akip a che chunga ka lui jiak ani.

⁴ Kei ning ka jiak rakip ha nan pa karra Khrista ning kei jiang ina manjet rakip ha jet nanti.

⁵ Hiva Pathian chong ruk hi a chesa phat han tute khat jiang lui ripe mak tak-ha atunko Pathian Thavang Thiang hin tirlonngai le Pathian chong lui ringai jiang a man mu jui.

⁶ Pathian chong ruk ha ko, nang ni jatdangai ngaihi, Jiwngai le tak khat anga ana man om jui, Jisu Khrista chongsat jarra Pathian phual rakip ha Jiwngai le a kan ang rip amu rang nan ni.

⁷ Puma a chongsat ngaiha ri ranga keihi ana thang suak jui, hiva chuan tho torna ranga ranak ana pek.

⁸ Keihi mi thiangai karra asin tak kani nom tok a mu torlui rang Jisu Khrista a chongsat ha jatdangai jiang ana manri.

⁹ Hale mi ning an lui jet torlui puma a lungdo, ruk a alui ngaidon chuan mirual rakip jiang athup a alui siak puma jiang alui om chongsat le phur rakip hi ama kut sin alui ni.

¹⁰ Pathian tenna ahong chingna phual rakip ha biakrup tenna ramuol aput reng ator mingai jiang man jetru, vanram ringkhuo anga ni rase.

¹¹ Amongti bui Pathian lungdo ngaiha kan puma Jisu Khrista jiang a om.

¹² Jisu Khrista jarra ama takngai le kan ruaia keini hi Pathian kol la ningsat tak a kan lut tor jui.

¹³ Kein nang ni, jiang ka na ri ani, khodengthei na ka dui rakip chunga nan lung man sin maru, nang ni lurna lian na ranga ani.

Thavang Thiang tenna rat na

¹⁴ Hiva jarra kein puma madonna chubei ka lui buk.

¹⁵ A ma jiang han ramuol le vanram ma a om hale insung rakip ning an ming rakip alui mu.

¹⁶ Kein nang ni ranga lamna ka nei, puma rat na ranak han nangni ha na man rat nati hale ama Thavang Thiang ning nan sunga om rase.

¹⁷ Hale nan takngai na jarra Khrista ning nan lung sunga om rase han lungsiat han a det tak a ngirru.

¹⁸ Pathian lungsiat ha iduk mo asei iduk mo a lian, iduk mo, athup tiha nangni le Pathian mi thiangai ning jet nanti.

¹⁹ Jisu Khrista a mi lungsiat thei na nan jet han nan chunga Pathian omchan nunchan ha sip rase.

²⁰ Puma ama ranak han kan sunga a om kan lui ngaidon phak lui tho torlui rakip ha kan tho tor jui.

²¹ Puma lurna lian na rakip biakrup le Jisu Khrista jiang mirual mirual la ator ti buia om rase.