3 JOHON 1 - Rabu Athar New Testament (BSI)

¹ Ulian khat chang a adik tak a ka lungsiat le ka manrit Gaius nang jiang a kan na hong manjet ani.

² Ka manrit ka sap nang ni Thavang a nan rat ka jet i rakip asat om thei nale dam ma nan om na ranga ka na lam pe ani.

³ U le nai Khristian aviar in an honga nan dik na ruia chong ngir na an nei kei a tam ka ning asat; ajarko, nang nin adik na han nan om chak.

⁴ Ka naingai adik na han nan om ti chong ka jet ningsat da a tam a hui, a dang ite khat om hiva khel la ningsat na ite na pek tor lai making.

Gaius Chunga Ning sat na

⁵ Ka sap manrit, nan chuan tho na han takngai rang a om, ajarko khual mingai ha a mel nan jet mak in nom nang nin u le naingai ranga chuan nan lui tho.

⁶ Biakrup ngai madonna nang nin chong ngir na nan pek jui. Pathian lung tai na ruia an khual che na rakip a nan ruoi chak inko; nang ni ha asat ana lui don nanti.

⁷ Ajarko an khual chena han Khristian mingai jarra a dangjatngai jiang ite khat lui luia an che lam asat ke ani.

⁸ Han keini ning adik le chuan tho suam kan chang rang hiva mingai hi kan san rang hi asat.

Diotrephos Le Demotris

⁹ Biakrup ngai jiang hiva chong hi a bong phet a ka jiak ani, tak-ha an karra lam kai a chang jot Deotrephis ha a chong lui pek noni u ka lui ti ani.

¹⁰ Kei ka hong karra a man atho atho na chuan nuk juia ka man mu rang ke, ama ning keini chunga a satlui chong, i na ri siat jak han khop tor luia, Khristianngai an hong ten nom man lut jot mak; hale a lut jot ngai ham a man a khan na mi kan chun na biakrup tenna a notchei.

¹¹ Ka lungsiat, ka manrit u le naingai, asat mak nun chan mak in lang asat nun cham ha na lui tho peru, tuang asat chuan tho han Pathian ta ke ani hale a satlui tho mi ha Pathian a la mu lui ani.

¹² Mirakip in hale adik tho rakip in Dimetria jiang chong an pek jui, O, keini in nom chong ngir na kan pek, hale kan chong ngir pek na hi adik tihi nang in na jet.

A torna Chubei

¹³ Kei ning nang jiang Ka jiak jot chong lam a tam a la om, tak-ha kein, che le kolom hina jiak lai noning.

¹⁴ Tak-ha kan tak khet kan kan mu a kan biak ranga kei ning ka ngaidon.

¹⁵ Na chunga ahip le adai ha om rase. Sap le jar ngain nang ha chubei an na pek sap le jar rakip jiang chubei na lui man tung pero.