2 TIMOTHI 3 - Rabu Athar New Testament (BSI)

A torna Nikhuo

¹ A torna nikhuo hin a tam pong nale khodengthei na a om tihi nangni ning ngaidon ru.

² Mingai ning an tak jak ha an lung a kan siat rang ke, an karam rang ke, an man kanlian rang ke. Chong khel la khel rinan ta an nu an pa enda mingai ha an la hong ni rang ke.

³ Anmani ning chongsat ha an la matir rang ke, hale lungsiat hi jet noni u, kan sual kan se ngai dam thei luia an la om rang ke.

⁴ An na enda mingai lam san nan ta, man kanlian nan ta anmani ning ramuol hui na lam Pathian nek a an lung a la siat rang ke.

⁵ Anmani ning ma pal tiang jak Pathian an jet rang ke, tak-ha a thianga Pathian ranak ha ko mu noni u. Hiva ngaiha nang ni ning kan ning theiru.

⁶ Mi aviar ning mei thai a pong ngaiha san rang rahut a, an tak sa hui na lam anmani ning an la tho rang ke.

⁷ Numeingai ning jet na ranga an lui tok tak-ha anmani ning adik ha jet tor noni u.

⁸ Jannes le Jambres ning Mousi an lui jot lui anga hiva mingai ning om adik chuan hi lui jot ma u, mingai lung ha an man vet a an takngai rakip ha an manmang pe jui.

⁹ Mirakip ning anmani hi iduk mo an pang tihi an la jet rang ke, ajarko Jannes le Jambres jiang alui suak anga ala ni rang ke.

A torna chong lam ngai

¹⁰ Nang nin kei ka chong rakip, ka omchan rakip ka ringkhuo hin khodengthei ka dei na rakip, ka lungsiat na rakip ha nan jui.

¹¹ Kei ka pong na irakip nang ni ning nan jet, kein Antiok, Ikonium hale Lystra hin Iduk a pongna ka duija ka lui om hin puma ning ana lui san.

¹² Tu tu a changa Pathian le a ring suam jot Khrista Jisu le a kan chun jot mi han pong na a dui rang a suak.

¹³ Chuan siat tho mingai ning an chuan siatna tenna phut a khel la chuan siat ha an tho de, mingai ning, midangai ha an lui huang hale an tak tak om an kan huang ani.

¹⁴ Tutu jiang nang in ni hong kan chu ngai rakip ha, asat a na takngai na ha man omro.

¹⁵ Nang ni ning nai pang nan chang lai tenna phut Pathian chong ruk hi ijamo nan lui jet, hale hivahin kum sot ring na a om tia nang ni Jesu Khrista jiang tenna takngai na nan lui nei.

¹⁶ Pathian chong thiang rakip hin a om, hivahi lui a jot adik chong lam ha ani, anilui ha jot mak, adik lui ha a man dik, hale asat a ring na ranga chong lam ha ani.

¹⁷ Hiva jarra Pathian chuan tho mingai ha ko Pathian ning a vaichak, hale chuan sat rakip ha an tho tor.