2 TIMOTHI 1 - Rabu Athar New Testament (BSI)

¹ Jisu Khrista a nuk jui Paul jiang Pathian lungdo a hong tirra Puma a chong san rakip hi ri ranga, keihi Jisu Khrista le khat jak a om suam na kan nei.

² Ka lungsiat ka nai Timothi jiang Puma Pathian le kan puma Jisu Khrista lungsiat le lungdai ha na pek rase.

Mathokna le Manpakna

³ Kei ning Pathian ka manpak, ama chuan ha ka lung thianga ka tho, kan pa kan pungai ning an lui tho anga, puma ka manpak, hale nang ni ha sun le jan na Pathian jiang ka na lam de chak.

⁴ Kein nang ni ha ka ning ana bui chak, hale nan pong ngaiha ka hong ngaidon na nan mel ka na mu aninko a tam lung khop om nati.

⁵ Kein ka jet nangni hi lung thianga tak nanngai hale nanpi Lois le nan nu Eunice an takngai na anga nangni om hingahin tak nanngai rang ani tia ka lui.

⁶ Hiva jar hin kein nang ni jiang ka na ma jet ani, Pathian ning nang ni jiang ana pek kutchoi ha manring chakru, kein nang ni chunga ranak ka na pek.

⁷ Ajarko Pathian ning keini jiang ana pek thavang han chit na na man nei mak, hale hiva thavang le lungsiat nale lung kanchoi torna ranak a na pek.

⁸ Nang in Pathian chong ri rang hi jak maro, kei ning Pathian ruia pong na ka mu hi om na jak pui maru, hiva rahut a Pathian chongsat ruia nang ni om kan chelru, Pathian ning nan chunga ranak ana pek.

⁹ Puma ning keini hi a mi khat chang ranga a na kui keini kan chuan tho jarra chang mak tak-ha ama a na lungsiat na jarra ani, ama ning Jisu Khrista jiang a rat na ha a phut na tenna alui hong tir.

¹⁰ Atunko Jisu Khrista ning keini sanring ranga a hong hin a kan dang jui hale ama athija a thui khir han Pathian chong thiang ha amongtibui ringkhuo ha ani jui.

¹¹ Pathian ning kei hi ama chong sem ranga le ama tirlon chang ranga ana hong tir jui.

¹² Hiva jarra kein khodengthei na ka mu ani. Tak-ha kei hi ka lung a ngam ajarko kein ka jet tu mo tak ka ngai ha, hale kein ka jet tor a man kei hi ana ngam na jui, a man kei hi a torna nikhuo hin nom ana san tor.

¹³ Kein adik chong lam ha ka na ri ani, asat a luiru nang ni ning jui thei na ranga thoru hale takngai le lungsiat han keini Khrista jiang om rei.

¹⁴ Hiva A thiang Thavang ha keini jiang a om, asat phur ha nang ni jiang a na pek jui.

¹⁵ Nang nin nan jet, Asia sunga a om Phygeilus le Hermogenes ngai ning kei hi na man lut ma u.

¹⁶ Pathian lungsiat na ha Onesiphorus inn sunga om rase ajarko kei hi anmani ning an na lui don, kei ning pong na mun na ka lui om lai han nom na jak pui mak.

¹⁷ A man Rom khopuia a hong tung han kei hi ana mu mak kar je ana lui tok.

¹⁸ Puma ning ama ha lungsiat mu rase a torna nikhuo hin, nang nin nan jet a man kei ranga Ephesia hin chuan adik khan alui tho.