2 PITAR 2 - Rabu Athar New Testament (BSI)

A ni lui Manchu

¹ Adik lui Pathian chong ri kan rol ngai a tuan lai hin nom alui om, hingahin nang ni karra hin nom an la hong suak rang ke, anmani ning an na manmang rang ke, ani lui chong lam ngai hin, hale anmani a san ring pu ten nom en jot noni u.

² Mitam tak ning anmani omchan salui ha an jui rang ke, anmanin hangahan an tho jarra midangngai ning a satlui an jek rang ke.

³ Hale anmani ning an pham rai jarra anmani ning ani lui chong lal an oul rang ke phat sot tak a anmani ha chong jen ranga an hong karra an mang rang ke, a mong ti om noning.

⁴ Ajarko Thavang Thiang ten nom siatna an tho karra Pathian ning a hui lui mei khurra atir, hale chong jen ranga an ngak ngaiha Pathian ning a jing na mun na a siak.

⁵ Pathian ning a tuan lai hin nom lui hoi mak, tuilian a hong ti ra Pathian jet luingai ranga, Noa a thei jak a le Pathian jet adik chuan tho mi sa ri jak ha an lui ring.

⁶ Hale Sodom le Gomara khopui anni hi vut alui man oulla alui manmang jui, hingahin Pathian jet luingai chunga ija mo a hong suak rang ti a manjetna ani.

⁷ A ma ning mi sat lot ha a san siat nei ngai a saluingai ning an lui man pong innom.

⁸ Chuansat a tho ama han imo a mu hale imo a jet a satlui anmani kara, ama ning a khel la pong na ha alui nei anmani a salui nun chan ngai a mu a jet karra.

⁹ Hiva jarra Pathian ning a jet asat mingai ha ija mo a san ring, hale asat lui tho ngaiha chong jen nikhuo hin pong nale khodengthei pek rang a suak.

¹⁰ Tak sa hui na tianga a tak a manmang a Pathian chit luingai jiang a man pong rang ani, ajarko hiva asat kan rol Ojangai ning Pathian chit luija esella an lui om.

¹¹ Thavang thiang ngai ning anmani nek a an ra ot det, hale an tor det tak-ha anmani ning Pathian madonna chong salui lui ri pe ma u.

¹² Tak-ha anmani ngai ko manmang na rang jak ha an tho, anmani hi ram ma sa anga churra that ranga a suak. Anmani ning mirakip man mangrang an tok chit luija, anmani hi sangai anga man mut rang a suak.

¹³ Anmani ning khodengthei na chuan an tho jarra khodeng man thei rang a suak, ajarko anmani ning sunvara tak sa khop na rang chuan an tho, an man huija an om nang le bu nek chuan na a omngai ha ravan bui anni ajarko anmani ning chuan salui ha an jui.

¹⁴ Anmani ning numei chuk luingai jak ha an tok anmani ning a satlui tho han an lung lui khop pe mak, a jet lui ngaiha pong na an man nei, an lungai ha a tam tak ka ram na an nei sua jui, anmani hi Pathian kho khong tung rang an ni jui.

¹⁵ Anmani ning lam adik ha an mak a Balam a nai Beor a lam pui ha an ro jui, ama ning adik lui chuan tho a peisa an lui dei.

¹⁶ A ma ring na a mu thei na ranga a sakor ning mi rasa anga a hong khek a Pathian tashanthei ha alui khap jui.

¹⁷ Hiva mingai hi tui ning rua phaivou a choi anga an ni jui, anmani ranga Pathian ning a jing na mun ha a siak pe.

¹⁸ Ajarko a nem lui mi pang chong an ri la anmani ning ani luia a ring ngai chunga anmani ning tak sa lungdo tianga an man lut.

¹⁹ Anmani ning an ning an kha tho na ranga chong sam na an lui nei tak-ha anmani ngaiha ko chuan salui a tho suak ha an lui ni, ajarko mingai rakip a man tor ama han a suak om a man chang ani.

²⁰ Jisu ana san ring pa ani ti jet a mingai ning ramuol chunga a salui tenna an tan torra hava suale anmani ning a salui chuan ha vei khat an tho ret aninko anmani omchan ha a rapa nek a, nuk a omchan lam sa det noning.

²¹ Ajarko Pathian chuan sat tho na lam ha anmani ning an jet a, anmani jiang an lui ripe chong thiang ngai rahut an lui jet chil lui lam ning alui sat det rang ani.

²² A ching chonga an lui ri, ui ning a luak ha a chak khir, hale vok ning an rasuk suale bual karra a lut khir.