2 PITAR 1 - Rabu Athar New Testament (BSI)

¹ Jisu Khrista a tirlon le a suak lui chang Simon Pitar ning alui ti, kan puma Pathian jiang tenna adik lui tho ngai Jisu Khrista ning takngai na hi ana lui pek hava ha a man tam tak keini ranga ani.

² Puma Pathian hale kein in a na lui san ringpa Jisu ha asat a jet thei na ranga chuan le lunghip ha nang ni jiang om rase.

Pathian Kui le Thang suok

³ Pathian rat na ha keini jiang akip a ana pek jui. Keini Pathian jet a ring na ranga ching na jet na hi keini a na kuipu ama tenna ani, ama asat nale a torna, lianpui na mu na ranga ani.

⁴ Hingahin ama ning a man tam tak kutchoi le chongsan ha a na lui pek, hale hiva kutchoi tenna keini ning ramuol chunga thina mang na tenna kan pial tor ani, hale Pathian ngaidon a rapa anga om na ranga ani.

⁵ Hiva jarra nang ni chuan sat ha thoru hale tak nan ngaiha man khelru, ching nale jet na kan ruaia chuan sat thoru.

⁶ Nan jet na han nan tak kan chur theiru, nan tak nan kan chur thei na han a khang theiru, a khang nan thei na han Pathian jetru.

⁷ Nang ni Pathian nan jet han na u na nai anga asat a thoru. Na u na nai anga asat a na tho na han na lungsiat ha hap dero.

⁸ Hiva ngaihi nang nin nan tho rang suak ani, hale nang in hiva rakip na tor inko puma ning nang ha aching athei, puma Jisu a jet mi ha na manchang nati.

⁹ Ajarko hiva rakip a torlui mi ha ko a siatna alui ngai ha a rasuk pa a thei nia ama kol la a om bak a mitdel ha ani.

¹⁰ Hiva jarra ka u ka naingai nang ni ana kuia ana lui thang pa ha a khel la jet na ranga ri theiru. Ajarko nang ni ning hiva ngai hi nan tho inko itik om pong na mu noni che u.

¹¹ Ajarko hingahin keini kan puma Jisu ama om san ringpa khat chang a kum sot ring na ha nang ni jiang amongtibuia ana pek rang ke.

¹² Hiva jarra kei ning phat rakip a hiva ruia ka na manjet rang ke, nang ni ning adik ha nan luia nan jet a chang nom,

¹³ Kei ning ka ngaidon, ramuol chunga ka om lai lim ko hiva ruija hi nang ni ka na man ngaidon hi adik tia ka lui.

¹⁴ Ajarko kan puma Jisu Khrista ning ana lui ripe nuk juia kei ning hiva ramuol hi ka mak na rang sot lai mak tihi ka jet.

¹⁵ Kei ning ka thi khan na ki na ri ka thi madonna, nan ringkhuo sot a hiva a ruia phat rakip a nan ngaidon thei na ranga ani.

Khrista Lianpuina Shakhi

¹⁶ Keini ning mi chong thang kan luia nang ni kan na manjet nimak, Jisu Khrista alian na hong rang hi, ka mit tak a kan mu jui ama alian nale a torna ha.

¹⁷ Pa Pathian ning ama lianpui na a pek lai han keini kan lui om, rasa khat ama jiang alui hong, Puma lian nale kan ruaia hivahi kei ka nai ka dei tak pasalnai ha ani, kei ama jiang ka lung a be!

¹⁸ Keini ning vanram tenna rasa ha kan jet, keini ning puma le a sot tashanthei kan lui om lai han.

¹⁹ Hiva jarra keini ning a khel la chit lai masing Pathian, tashantheingai ning an lui ri ha nang ni nan lung a lut inko asat a nan jet rang ke, ajarko hivahi a jing karra mei var ning khua a varmaje a om anga ani, hale jing tianga khovar ning nan lung sunga a man var.

²⁰ Nang ni ning nan jet rang khat ko Pathian tashantheingai ning, Pathian chongsat ngaiha, anmani lungdo va an lui ri nimak.

²¹ Pathian tashantheingai ning an lui ri ha mi tenna a hong nimak, tak-ha mingai chunga athiang thavang ning alui chuanga, anmani ning an ri ngaiha Pathian tenna ahong ani.