2 KORINTH 9 - Rabu Athar New Testament (BSI)

Mi thiang ngai ranga pek na

¹ Mi thiang ngai ranga nang nin nan pek na ruia kein chithi ka hong jiak rang ko suak mak.

² Ajarko keinin nan pek jot ti ka jet jarra Makidonia hin a om mingai jiang nangni ruia chong alian na kalui ri Grik hin a om mingai nom ni kum tenna phut anlui kan ning jui, nangni rui ha mingai rakip om thei lai ma u.

³ Atunko hiva u le naingai ka hong tir jui apek nan rat tia chong lian ka lui ri ha aman bui ko manchang maru. Nan kutchoi ha lui kan ningru.

⁴ Makidonia mingai le kei ka hong karra kutchoi nan lui kan ning mak aninko keini ranga jakna a om rang ke. Kan lung ana ngampuina rakip ha ite khat ri rang om noning.

⁵ Hiva jarra ka nai pangngai lam arapa ka hong tir ani, nang nin kutchoi ha nan lui kan ning thei na ranga. Kei kahong karra kutchoi ha mu kati, hale kein n kan na sutko chang mak tak-ha lungdo lian na nan pek chang rase.

Pathian in ningsat a a pek ha a dei

⁶ Jetru, Chimu aviarte a ling ama han aviarte amu rang ke hale chimu atam a ling ama han a tam amu rang ke.

⁷ Mirakip ning an lunga asat ha ngaidon rase u, pek mak jot luija apek, apek jot mak chunga apek, tak-ha pathian ko ningsat a apek ha adei ani.

⁸ Pathian in ator tibuia phual rakip ha ana pek tor, ajarko nang nin nom irakip amongtibuia nan mu ha chuansat tho na ranga ani.

⁹ Hingahin chong thianga alui kan jiak “A man lungdo lian na a riangngai jiang a mun le phat rakip alui pek. A man atho chuansat chuan dik ha amongti om mak.”

¹⁰ Hale chimu lingpa jiang chimu apek hale tal chakpa jiang tal apek, pathian ning chimu ham apek atam om aman tampe, hale adik chuansat nan tho ham na man khel pe nati

¹¹ Pathian in nang ni ha phat rakip ana man nei nati, lungdo lian na nan pek torna ranga, ajarko keini jiang nan na pek nan kutchoi ha an mu karra mitam ning Pathian ha manpak nanti.

¹² Ajarko hiva Pathian chuan tho hi mi thiangngai san na jak niluia Pathian jiang amongti omluia manpak na ani.

¹³ Hiva pekna chuan hin ana manjet, nang nin Khrista chuan sat ha nan tho, hale lungdo liana nan pek tor jarra mirakip ning Pathian lurna ha manpak na an nei.

¹⁴ Anmanin nangni ha an ning ana bui hale lam na an na neipe. Achung chuanna Pathian ami lungsiat theina ha nan chunga ado jui.

¹⁵ Ri a ri torlui rang Pathian kutchoi jarra Pathian ha manpak rei.