2 KORINTH 6 - Rabu Athar New Testament (BSI)

Khodengthei a Pathian chuan tho

¹ Pathian jiang keinin chuan kan tho na hin ama ami lungsiat thei na phual ha a man buia ariampa ko manchang ma rei tia nangni jiang ka na ri ani.

² Ajarko pathian in a ti “Aphat a jot lai hin kei nangni ha ka na ngai, hale kum sot ringna nikhuo han ka na lui san” Enru “Atuntak hi phat hui ha ani” kan san ringna phat ha ani.

³ Keinin tu khat chena lam ha khan masing, hiva jarra tu khat om keini kan chuan tho asuaina man mu jot masing.

⁴ Tak-ha irakip a Pathian chuan tho khat changa keinin khodengthei lui anga chong kan lui ri. Atam tak khang theina, Thavang pong atatna rakip kan lui mu.

⁵ An na lui veh, ren inna kan om, chuan a khella kan lui sin, jal luia bu nek luia kan lui om.

⁶ Pathian chuan tho khat changa keinin lung thianga, chingtheile, khang theina chuansat tho hale Thavang Thianga lungsiat ha kan nei.

⁷ Kan chong ri adik le Pathian ranak le athiang omchan han keini ral tho na chem pho kan lui manchang. Ral lut nale ral khan na kan man chang.

⁸ Chit le jak an na lui nei, hale an na matek an na lui kok hale an na man lian. Keini hi leisei an na manchang tak-ha adik chong kan lui ri.

⁹ An na jet lui anga an lui tho, tak-ha mirakip ning keini hi an na lui jet, Keini athisa anga an na lui mu; tak-ha kan om, pongna ijat an na lui pek tak-ha lui thi masing.

¹⁰ Ning dong na an na lui pek tak-ha kan ning alui sat phat rakip a, ariang anga kan om tak-ha mitamtak kan man nei jui, ite khat anei lui anga kan om tak-ha irakip kan nei.

¹¹ O Korinth mingai nang ni ranga kan mur kan lung inkhar kan long.

¹² keinin nangni ha kan nakhan chang mak, nang nin nan lung ha keini jiang hong ranga nan khap ani.

¹³ Kein hiva hi ka naingai anga ka ri ani, nan lung ngaiha long taru.

Pathian tak a ngai mi ha Pathian in thiang ani

¹⁴ Nang nin Pathian jet lui mingai le chuan tho chun maru ijamo adik le adik lui ha an om chun rang? Ija mo avar le a jhing ha an om chun rang?

¹⁵ Ija mo Khrista le khonam an kan jot rang? Ija mo Pathian jet le Pathian jet lui mi ha an kan ruai rang?

¹⁶ Pathian in thiang han, kut a sin Pathian ha om jot nati mo? Ajarko Pathian ning a man thiang in thiang ha keini kan ni. Pathian ning a ti “kein an karra ka om rang ke hale chuan ki tho rang ke, hale kein anmani Pathian ka ni rang ke, hale anmani ha ka mi ka manchang rang ke.”

¹⁷ Hiva jarra nang nin hong suakru anmani tenna, hale kan sen puiru ti a pathian in a ti, hale a thiang lui phur ngaiha sit maru; kein nang ni ha ka na lui don rang ke.

¹⁸ Hale kein nang ni nan pa ka ni rang ke hale nang nin ka naingai ha nan ni rang ke pathian in a ti.