2 KORINTH 5 - Rabu Athar New Testament (BSI)

Thanuam tak a Pathian chuan tho

¹ Keini ning kan jet ramuol la kan om na kan in hiko mang rang ani jui Pathian jiang in hui khat ha kan nei, kut a sin inn ha nimak amongtibui vanram ma a om.

² A thianga keinin vanram ma kan om na rang mun ha puansi anga kan sijot jui.

³ Keinin puansi anga kansi aninko puan buia a omha ni nonsing.

⁴ Ramuol la inn hin kan om lai keinin ning dongna kan nei a chang nom taksa ramuol hi kan mak jot ko chang mak. Tak-ha vanram ma a om phur ha kan mu jot jarra ani. Hi aninko amang torlui phur ha kan ringkhuo hin om nati.

⁵ Atunko hiva ranga ana sin hei ama ha Pathian ani, a man keini jiang Thavanga a suailui rang ha ani jui.

⁶ Keinin phat rakip a thanuam ha neirei, taksa inna kan om lai lim Pathian le kan kanlak tihi jetrei.

⁷ Ajarko keini takngai jarra kan ring ani, kan mit a kan mu jarra nimak.

⁸ Keini hi thanuam mi khat kan ni. Tak sa om na inn ha mak a Pathian ina om rang kan ni.

⁹ Hiva jarra keini inn na mo kan om animakle om masing mo, keini ning kan not ha ko Pathian lung man khop na jak ha ani.

¹⁰ Ajarko Jisu Khrista ning mirakip chunga a man chong ilajen pe rang ke. Ramuol la taksa ringkhuo hin an lui tho nuk jui tho nukjuija asat aninom a salui aninom an tho nuk juia mu nanti.

¹¹ Pathian chithi hi imo ani ti keinin kan jet, hale midangngai ham man chit na ranga kan tho, pathian in anajetpet, hale nan lung sunga keihi om na na jet tia ka ngaidon.

¹² keinin nang ni jiang kan kan risel retko nimak, ajarko an sunga kan en luia ma pal tiang jak en na aman kan lian mingai jiang nang nin keini ruia man kan lian deru hale chongsang torna neiru.

¹³ Ajarko keinin lungril salui kan lui nei a chang nom hava ha Pathian ranga ani, hale keinin kan ngaidon ha alui dik aninom hava ha nang ni ranga ani.

¹⁴ Khrista lungsiat na han keini hi a na churra kan jot jui, ajarko mi khat ning mirakip rahut a alui thijui, hiva jarra mirakip an thijui.

¹⁵ A man amirakip ranga aringa a omngai ha an tak ranga an ring nimak tak-ha anmani ranga alui thipa ama ranga ani jui.

¹⁶ Atun tenna ko mirakip hi miring mit tenna en lai masing phat khat a Khrista hi om kein in miring mit en na kan lui en ha atunko en lai masing.

¹⁷ Hiva jarra tu khat ning Khrista jiang a om aninko, ama ha a tharra kutsin ha ani jui. A lui rakip ha a che jui enru athar rakip ha a hong jui.

¹⁸ Hiva rakip hi Pathian tenna ani, a man Khrista tenna keini le ama hi kan lungsiat khir na a na mannei jui, hale keini hi kan lungsiat khir na chuan tho ranga ana pek jui.

¹⁹ Hava Jisu Khrista jarra pathian in ramuol la miringngai le ama ha kan lungsiat khirna chong hui ha ana man ri jui.

²⁰ Hiva jarra keinin Khrista a rahut a chuan Pathian ning keini jiang ana man tho keini ning Khrista rahut Pathian le kan lungsiat khirna ranga kan ri ani.

²¹ Khrista ko siatna neimak, tak-ha keini jarra Pathian ning siatna a manchoi. A ma jarra keinin Pathian kolla adik ringkhuo a om tor kan ti.