2 KORINTH 12 - Rabu Athar New Testament (BSI)

Paul jiang a man mu nale a manjetna

¹ Kei chonglian ka ri rang asuak! hivahin a nem nako ommak, tak-ha Pathian in kei jiang a na man mu nale ana manjetna ha ki la ri rang ke.

² Kein Khristian nai khat ka jet, kumson le kummanli madonna ama ha an churra vanram anthum chang na hin an lui tuang. Ataksa akan chel mo akan chel lui mo kei jet making, pathian in a jet.

³ Hale kein ka jet hiva miha an churra paradais hin an tuang. Ataksa akan chel mo, akan chel lui mo kei jet making, pathian in a jet.

⁴ Hale ama han alui jet, miring murra an ri torlui rang chong alui ri.

⁵ A ma rahut a kein chong lian ri noning, kei ka sualna chong niluia.

⁶ Kein chong lian ri jot making. Ajarko a man ana mu ana jet pe hale a sanga mingai jiang man ngaidon jot making.

⁷ Hale kei jiang ana manjetna chunga a sanga chong lian chong lian ka ri mak na ranga ka tak sunga seitan ning ling khat ana pek jui, kei khodengthei nale chong lian ri mak na ranga ani.

⁸ Kein Pathian jiang vei khat tak ko na kel pero tia veithum tak lamna ka luinei.

⁹ Tak-ha a man kei jiang a luiti “Kein nang chunga lungsiat theina ka nanei han nang rang ko ajot jui ajarko kei ranak ning na sual rakip ha a man rat jui.” Kein Khrista jiang ningsat tak a ka sual na hin ka manpak rang ani. Ajarko Khrista ha ka sunga a om chak.

¹⁰ Hiva jarra kein ka sual na rakip hin lung khop na ka nei. Lung nat na, Thavang pong na rakip hi Khrista ama jarra ani. Ajarko ka sualna hin raat na a hong chang jui.

Paul hi tirlon a thiang ani ti jet na

¹¹ Kein a pang khat anga ka om! Nang nin nan na manpang ani. A thianga nang nin keihi tirlon khat ani tia nan na ri selrang asuak kei Pathian tirlon ulian ka ni atingai ning an na khel na om mak. Kei ite om ka nimak nom,

¹² athianga tirlon khat ka ni ti jetna nan karra ka om lai khang thei le kan ruaia, angakpa chuan mi ning an torlui rang chuan atam tak ka lui tho.

¹³ Nang ni jiang ijamo kein biakrup a dangngai nek a nang ni ha a salui a khella ka na thona mo a om? Nan chunga pongna mo ka na lui pek? Ka lui lal achang nom na ngaidamru.

¹⁴ Hivahi veithum changna nangni jiang hong ranga ka kan ning jui. Kein na man pong noning, ajarko kein nan nei phur ha dei making tak-ha nan tak ka dei ani; naingai ning nu le pa jiang lam a jot tak-ha nu le pa ning naingai jiang lam jot mak.

¹⁵ Ka tak le ka nei rakip hi ka na pek inko ningsat om nati nang ni na san na ranga. Kei ning atam ka na lungsiat a nangni ning aviar jak mo nan na lungsiat rang?

¹⁶ Nang nin lui jot nanti, kein nangni ha na man pong making, itik om a salui leisei ja nangni ha na lui chur making!

¹⁷ Nangni jiang ka hong tir mingai jiang kei ka nem na ranga imo ka lui tho?

¹⁸ Taitas ha nang ni jiang ka hong tir jui. Adang nai pangngai om ama le an lui hong. Taitas ning nang ni chunga ama a nemna rang mo a tho? Taitas le keihi lung khat jak a chuan kan tho mo nimak?

Paul ning lung thul na ranga a ri

¹⁹ Hale, nang nin keini hi kantak kan nem na ranga an tho tia mo nan lui? Pathian madonna Khrista jiang keinin nangni jiang kan ri ani. Keinin kan tho rakip hi ka lungsiat nangningai na san na ranga ani.

²⁰ Kein ka chit, ka hong karra nangni hi kei ngaidon anga lui nimak a jot hale kei om nang nin nan ngaidon anga lui nimak a jot, nan karra kansual, kanse, kan en lal, pham rai kan ri siat, kan matek asalui rakip ha lui om a jot.

²¹ Kein ka chit, veikhat ka hong karra ka puma ning nang ni madonna keihi nang ni jiang chubei na man buk a jot, ajarko anmanin arapa lai anluitho omchan salui, minu en lal, a dang siatna tenna an lung an thul mak aninko kein anmani ranga chai jang siara ka chap rang ke.