2 KORINTH 1 - Rabu Athar New Testament (BSI)

Chongphutna

¹ Pathian in alui thang suak Jisu Khrista tirlon paul le ka u ka nai Timothi ning Korinth na biakrup hale Akaia hin a om mi thiang rakip jiang,

² Pathian a mi lungsiat thei nale lunghip ha Pathian le Jisu Khrista ning nan chunga mansip rase.

³ Kan puma Jisu Khrista a pa Pathian ha manpak tarei, mi lungsiat puma Pathian ama tenna phual rakip alui hong.

⁴ A ma ning kan khodengthei na rakip a ana luisan jarra kein in nom a dang khodengthei mingai ha kan san tor ani, puma tenna misantor ranak ha kan mu jui.

⁵ Ajarko Khrista ning amongtibuia khodengthei na aluidui anga, kein in nom ama jiang lungam na kan nei hi a mong ti om mak.

⁶ Tak-ha kein in khodengthei na kan mu rakip hi nang ni lungam nale kumsot ringa ani. Pathian in keini ana san inko, nang ni ham a nasan hale khangtorna ranak han ana pek. Hava pong na ha kein in nom kan lui dui jui.

⁷ Keinin nan chunga lungdo kan nei ha aladet, keinin kan jet pong na rakip keini le nan duisuam anga lungam na ham keini le nan nei suam rang ani.

⁸ Ajarko ulenaingai keinin Asia sunga khodengthei na kan lui mu rakip ha thuisalui tho maru. Keinin kan choi torlui khan na pongna kan lui mu, ringkanti tia lui ngaidon masing.

⁹ Keini kan tak ning kan kan jet jui kan binga om mak na rang hale athi aman thui tor Pathian ama jiang om na ranga ani tia jet na ani.

¹⁰ Puma ama ning thina tenna ana sanjui, hale analasan rang ke, puma ning analasan ret rang ke tia keinin ama jiang lungdo a lian na ka nei.

¹¹ Nang nin nom keini ranga lam na in na sanru; hi aninko keini ning phual kan mu na chunga mitam ning keini rahut a Pathian ha manpak nanti. Hivahi mitam ning an lam ha anasang ani.

Pual ning a chuan athulna

¹² Kein ka thuaitor nako hi ani. Kalungril la Pathian shakhi kachoi hale Pathian kan chella a thianga chuan ka tho ani, ramuolla chingna han ni luia Pathian ami lungsiat thei na jarra ani, kan omchan hi ramuolla kan lui dojui, a chung chuan na nang ni jiang ani.

¹³ Hiva jarra nang ni jiang chithi kan hong jiak i om nimak, tak-ha nang nin nan pa tor hale nan jet tor. Kein ka ngaidon nang nin a renga lui jet nanti.

¹⁴ Nang nin aviar keini ruia nan jet han thuaitor nanti, keini om nang ni ruia thuaitor kan ti puma nikhuo han.

¹⁵ Kein a rapatak nang ni jiang suai luija ka hong jot, hi aninko nang ni ning veinitak Pathian phual ha mu nanti.

¹⁶ Nang ni jiang ka hong suale Makidonia hin ka che rang ani hale Makidonia tenna nang ni jiang honga judia tung na rang ha na riperu.

¹⁷ Hingahin kein ka ngaidon hi ka lung a det lui mo a pua? Animakle taksa lungdo hin mo ka om animakle ani lui mo kati ani?

¹⁸ Kein nang ni jiang ka ri chong ha o timaking, nimak om timaking, pathian ko tho rang ati ha a tho tor, takngai rang asuak.

¹⁹ Ajarko pathian nai Jisu Khrista ama rui ha kein nang ni jiang ka lui ri. Kei le Silvanus hale Timothi ning o lui ti masing tak-ha pathian ning o ajot aluiti ani.

²⁰ Ajarko Pathian a chong luisanna rakip ha ama han o ajot a ti ani.

²¹ Tak-ha hivahi Pathian ama ning keini hi nangni le Jisu Khrista jiang ana man kan kop jui hale pathian in kan chunga thai ana not jui.

²² Pathian in kan chunga amata kanni ti jet na dak amun ana siak jui hale ama thavang thiang han kan sunga a suailui ranga ana pek jui.

²³ Pa pathian in ka lung hi a jet, A man shakhi chang rase. Kein nangni ha namahok na ranga Korinth hin ka hong lui ani.

²⁴ Keini hi nang ni chunga puma jiang takngai mak jotma kan ti changma, tak-ha nangni le ningsat tak a chuan thochun mi kan ni. Nan takngai na ha a det tiha kan jet.