1 TIMOTHI 5 - Rabu Athar New Testament (BSI)

Takngai mi jiang chun tho

¹ Ulianngai ha ran maro, hale nang na pa tak anga ngaidonro, han na thuai tianga naipangai ha na nai pang tak anga thoro.

² Numei ulianngai ham na nu anga hale na thuai tianga numeingai ham na naipangnu, anga a thianga om puiro.

³ Mei thai numei an thei jak a omngai ha chitlejak neiro,

⁴ tak-ha meithai ngai ning nai le te an nei inko a rapa tak hin Pathian jet omchan ha jet rase u, an inn sunga, hi aninko, antu ante ngai ning, anmani ha an la san rang ke, hivahi Pathian lungdo ani.

⁵ Mei thai an thei jak a om en rang buingai ranga Pathian hi an lungdo ani, sun le jan na Pathian lam puiro.

⁶ Tak-ha an man huija a om mei thai ngai ko an ring chunga athi ha an ni jui.

⁷ Anmani jiang hiva chong lam hi ripero, hi aninko tu khat ning anmani ma sial na mu noni u.

⁸ Tu khat ning a inkuo mingai a en mak aninko hale a insung mi tak a en mak aninko, ama ning Pathian ha tak la ngai mak, hale Pathian jet lui mingai nek a ama lam sa det mak.

⁹ Kumsom ka ruk tung lui mei thai ning mei thai tia lui jot mak, hale a pasal khat jak ani rang a suak.

¹⁰ Chuansat jak alui tho numei ha ni rase, hale a naingai ha asat a alui don numei, hale a pong mingai alui san na chuan sat jak alui tho numei alui ninko ama ha mei thai karra kan chel a jot.

¹¹ Tak-ha nai pang mei thai ngai ko mei thai ti la jot mak, ajarko anmani ning pasal an tok a in an nei jot karra Khrista lungdo ha jet ma u.

¹² Ajarko anmani ning a rapa an chong sam ha an makhui jarra chuan sat ha tho ma u.

¹³ Hijak hi ni luia anmani ning in inna an chea a phat an manmang: an tha siat jak ni luia anmani ning ri lui rang chong an lui ri a ani lui mi tha siat an lui chang.

¹⁴ Hiva jarra kei ning ka dei ko, numei nai pang mei thai ngai ha in nei rase u, nai nei rase u, hale an nai ngaile in asat a en rase u. Hi aninko keini ana enda ngai ning ani lui chong i te khat ritor noni u.

¹⁵ Ajarko mei thai aviar ko seitan nuk lam an juia ani luija an che jui.

¹⁶ Tu anga numei an khat ning mei thai ani inko, ama ning san thei rase, hale a thianga ama biakrupngai chunga phur rik ha manchoi ma rase.

¹⁷ Hale asat a lam ana kei ulianngai ha, Pathian chong ri a, hale mi man chu hin anmani jiang han, matik nei a anmani jiang chitlejak ha ni ru a loman ha pekru.

¹⁸ Ajarko Pathian chong thiang hin a om, chuan na sin na serat ha a bai khit jot mak, ajarko chuan tho rat mi han a lom an amu rang a suak.

¹⁹ Ulian khat chunga ani lui an hong ti ha lui maro, mi anni an thum ning an ti mak inko.

²⁰ Siatna a tho mingai ha mitam madonna riperu, hi aninko midangngai om an chit rang ke.

²¹ Pathian kan chel la Jisu Khrista le thaneithiangngai le, kein nang ni hi kui na ka na nei, hiva chong lam hi juiru, nang nin nan chuan tho na rakip a khat le khat man kan khel maru.

²² Tu ang khat chunga nan kut ha a rak a siak maru, hale midangngai chuan siat ha nang ni ning om choi de maru, nan taksa a thianga omru.

²³ Tui riam jak ha in lai maro, na tak sa damthei na ranga ju aviar in dero, ajarko nang hi na nat cha chak.

²⁴ Mi aviar ko an siatna ha chong jen madonna an lui jet, tak-ha mi aviar ko an siatna ngaiha nuk at ala hong kando.

²⁵ Hingahin chuan sat ngaiha ko a thianga kan mu tor, an thup a chang innom ala hong kando ani.