1 TIMOTHI 4 - Rabu Athar New Testament (BSI)

A ni lui Man chu

¹ Thavang thiang in adik a ri, mi aviar ko an takngai na manmang nan ta adik lui thavang chong ri lam ha an la jui rang ke.

² Hiva chong lam ngaihi asat kan rol mingai ning an man suak ani, anmani an lung ril la an ngaidon ngaihi thina rang lam ani, thir ning a linga akang anga ani.

³ Hiva mingai ning lu huong hi adik lui ke ani an lui ti hale Pathian chubei an buk suale chak nek jot mak an lui ti pe, tak-ha Pathian a jet ngai ningko ningsat tak a Pathian ning ina pek hi an lui rang a suak.

⁴ Pathian ning a sin phur rakip hi asat rong ani, Ite khat a satlui om mak, tak-ha irakip hi Pathian manpak le kan ruaia an lui rang a suak.

⁵ Ajarko Pathian chong le Pathian manpak na chong hin Pathian lungdo ha ani.

Khrista Jisu Suoksat

⁶ Nang in hiva chong lam hi na nai pangngai jiang na pek inko nang ni Khrista chuan tho asat mi ha na ni, ti ko nang in thavang ring na ha tak na ngai le kan ruaia na jui ani.

⁷ Tak-ha Pathian kan chel lui chong lam rochi ngaiha mak taro.

⁸ Tak sa chuan tho hi asat, tak-ha thavang chuan tho lam ning asat det, ajarko hivahi a tun rang le nuk ranga asat ha ani.

⁹ Hiva chong hi a renga lui rang a suak hale takngai rang a suak ani.

¹⁰ keini ning hivahin chuan a tam kan tho rang a suak, ajarko a ring Pathian jiang kan lungdo ha a om, hale tak a ngai mirakip ranga ama hi ramuol la san ringpa ha ani.

¹¹ Hiva chong lam ngaihi riperu hale man churu.

¹² Hale tu khat om man kan ea sel maro, nai pang na chang jarra, hale na chong ri ha na omchan na, na lungsiat han tak na ngai na han, a thianga man jetro.

¹³ Kei ka hong kir mak kar je nang in mitam jiang lui man churo, Pathian chong thiang ha lui ripero, chuan adik khan na lui sinro.

¹⁴ Nang in Pathian kutchoi nang jiang a om ha thei ni maro, nang chunga thiampu alian ngaile ulianngai ning an kut ansiak a na chunga an lui ri chong ha juiro.

¹⁵ Nang in ni khat ni khat a na kan son na ha mi ning mu rase u, nang in hiva chuan adik a sinro hale na tak hi anmani rang kan pekro.

¹⁶ Na tak sa le na mi man chuna ruia kan ning theiro, hiva chuan mun hi mak chil maro, hivahi nang in tho in lang nang le na chong jui mirakipngai ha san ring na mu nanti.