1 TIMOTHI 1 - Rabu Athar New Testament (BSI)

¹ Jisu Khrista a nuk jui Paul tenna keini ana San ringpa Pathian ning alui ti, Khrista jak hi keini lungdo ha manchang rei tia Paul ning Timothi jiang ati ani.

² Ka lungsiat Timothi Pathian takngai nang chunga Pathian le Jisu Khrista ning lunghip nale lungsiat na om rase.

A ni lui Man chu Tena Kan ning Thei na

³ Kei ning Makidonia hin ka che tiang kari anga Ephesia hin lui om ru, ani lui chong nang ni jiang an na ripe mak na ranga,

⁴ nang nin mingai jiang riperu, mingai ha amongtibui mirual mirual chong ngaile ani lui chong rochi ngaiha man ri maru. Ajarko, anmani ning Pathian lungdo ha tho ma u, hale anmani ning an tho jak ha adik tia an lui ani.

⁵ Hiva kati na ajarko, lungsiat hi a thianga an lung sung tenna hong rase hale anmani jiang a thiang an takngai na ha om tit rase.

⁶ Mi aviar ko hiva chong lam hi anmak a ani lui lam tianga chong ri ngai lam ha an lui jui.

⁷ Anmani ning Pathian chong ri dan oja lam an chang jot. Tak-ha anmani ning an chong ri la kan jet ma u, an chong jek rakip han a khel la lungam na an lui nei.

⁸ Chongsan hi asat, keini ning asat a kan nei man rang ani anti.

⁹ Hivahi kan ngaidon rang a suak tiko dan hi misat ngai ranga an lui sin nimak, chong jui luingai mi that Pathian jet lui ranga an lui sin ani.

¹⁰ Hale ani lui omchan salui ache mi leisei, miruk hale adik lui chuan na mi manmang ngai ranga an sin ani.

¹¹ Hiva chong lam hi Pathian chong thiang hin kan mu, han Pathian lianpui nale phual hi mingai jiang ri ranga kei jiang ana ngam na ani jui.

Pathian Manrit jarra Man pak

¹² Kei ning puma Jisu Khrista ka manpak, kei ka chuan chunga rat na ranak ana pek, keihi ama chuan tho ranga rahui a na pek jarra ka manpak.

¹³ A che sa phat a kei ning ani lui chuan ka lui tho a chang innom, Khristianngai manmang rang ka lui ti nom, kein Pathian ha tak ka luingai mak in nom, Pathian ning kei hi ana lungsiat ka tho ngaiha lui kan jet making.

¹⁴ Puma ning kei chunga amongtibui lungsiat ha ana pek jui, Khrista Jisu le kan chun thei na ranga lungsiat le takngai hi keini ranga ani.

¹⁵ Hivahi a thiang chong lam ani, tak kan ngai rang asuak a renga kan lui rang asuak Jisu ning ramuol la alui hong hi siat nei ngai san ring ranga alui ni. Kei hi siat nei tak ha ka lui ni.

¹⁶ Khrista alian na manrit thei na ranga Pathian ning keihi lungsiat a na mu, siatnei karra siatnei tak ning nuk tiang ahong mingai ha takngai na a man ngaija, kum sot ring na ha a man mu jui.

¹⁷ Amongtibui rengpa a chuai thei lui, an khat jak ani mit a mutor lui pa amongtibuija manpak rei Amen.

¹⁸ Ka nai Timothi hiva chong lam hi nang jiang ka na ngam na ani jui, hivahi a tuan laia Pathian chong lui ri ngai ning an lui ri nuk juia ani, Hiva chuan ngaihi na chuan man changro, asat a omro.

¹⁹ Hale nang in na lung ril la na jet ha takngairo, mi aviar ningko an lung ril la an jet ha tak an ngai lui jarra mang pui na lam an nei.

²⁰ Anmani karra Haimenia le Aleksandar anni, anmani ning an jet thei na ranga le chong salui an ri mak na ranga kein anmani ha seitan jiang ka pek lut jui.