1 PITAR 5 - Rabu Athar New Testament (BSI)

Pathian belram rup

¹ Kei ning ulian khat changa biakrup ulianngai jiang ka na ri ani, kein Khrista a khodengthei na shakhi ha ka jet, hale ama lianpui na ham ka mu rang ke, ama a hong karra, hiva jar hin kein nang ni jiang ka na ri ani.

² Belramngai sel ranga Pathian ning belramsel ranga nang ni jiang a na pek jui hale asat a en ranga hivahi Pathian ning nang ni jiang adei ani, han lung lut lui ko tho maru; nan chuan ha a man rang jak nima rase, tak-ha athianga lung lut a nan tho jot ha ni rase.

³ Nang nin nan thuaija a omngai chunga a khel la ea sel ha tho maru, hale nan chuan sat ha anmani ning mu rase u.

⁴ Belramsel a lu tir Pahan a hong karra nang ni ning ama lianpui na nan mu rang ke, ama a var ha mang chil noning.

⁵ Hingahin nang ni nai pangngai ning om nan chunga mingai an duk lutru, nang ni nan renga khat le khat ning chitlejak tak a kan sanru, ajarko Pathian chong thiangin a ti, “A man kan lian ngaiha Pathian ning jot mak, hale a man kan sin ngai chunga Pathian ning a san.”

⁶ Hiva jarra Pathian ama phat han nang ni ha a na man lian rang ke, hale ama a kut rat na thuaija ana man om rang ke.

⁷ Nangni nan ning adongna rakip ha Pathian jiang pek lutru. Ajarko ama ning nang ni ha na san nati.

⁸ Ka ning theiru, en chakru, nang ni ana manmang jot seitan ning a chea, nong sha ning a khek ang han a khek a om, tu ang khat manmang ranga a en na a om.

⁹ Nangni tak nan ngaiha adik ngai nang om ru, ajarko, hiva ang hin khodengthei a pong le ramuol la alui om na u nan naingai jiang om alui ruak sa ani tihi nang ni ning jetru.

¹⁰ Hale Pathian lianpui na ranga Khrista ning nang ni ha a na lui kui ani, hiva phat bongkhat hin nang ni ning khodeng nan thei suale nang ni ha na man rat rang ani, hale na man lian na ta na man ngir rang ani jui.

¹¹ Amongtibui ring na ha puma jiang ni rase Amen.

A torna Chubei

¹² Kei ning hivahi nang ni ranga takngai jot Ulenai Sila ning om a na san na Pathian chuan tianga nan lung man ngarru; han kei jom ama chuan sin ranga ka dei tihi ka na manjet jot.

¹³ Babilon na nan char nu inna biakinn sunga om hale Pathian ning i thang suak ka nai Mark ning om nang ni ha chubei an na hong pek.

¹⁴ Khristian kan lungsiat jet thei na anga khat le khat chubeija kan tumru. Khrista jiang a om nang ni rakip chunga lunghip na om rase.