1 PITAR 3 - Rabu Athar New Testament (BSI)

Lomnu le Lompa

¹ Hingahin nang ni numeingai ning nan pasal jiang kan pek lutru hingahin aninko anmani ning Pathian chong ha tak an luingai mak innom nang na omchan sat han anmani ha tak an ngai rang ke. Chongle la nang in ripe rang ngai mak.

² Ajarko iduk a athiang asat omchan ha anmani ning an mu rang ke.

³ Nang in ma pal tiang jak han asat na ranga kan sin hei sa na bet ha ni maro,

⁴ Hava nek a ko nangni kan sin hei ngaiha nan lung sung tianga ruk a lunghip, lungdai Thavang ranga a mang torlui puansat tho ha ni ru, hivahi Pathian mit en na a man tam tak ani.

⁵ Ajarko hingahin a tuan lai Pathian a jet a alui om numeingai ning ngom an pasalngai thuaija an lui om ma an duk an lut a asat an lui om.

⁶ Hingahin Sara ning om a pasal Abraham ha puma tia a kuia a chong ri alui jui, nangni ning om asat atho in lang, chit rang ham chit luija nang ni ning ama anai changru.

⁷ Hingahin nang ni Pasalngai ning om nan numeingai lung ha jet a nangni nek a sual anni tihi jet le kan ruaia ompuiru, ajarko anmani om Pathian kutchoi ring na ha nang le kan ruaia an mu rang ani.

Chuansat tho jarra apongngai

⁸ A torna hin nangni nan renga lung khat jak changru na u na nai anga lung kan siatru, Lunghip le lungdaija om ru.

⁹ A satlui a tho ngai jiang a satlui tho maru khua a na khong ngai jiang khua khong maru, hava rahut a phual pekru. Ajarko nangni phual mu na ranga nangni ha a na kui ani.

¹⁰ Ajarko a ringkhuo a lungsiat hale phat hui amu jot ama ning a mur ha kan khap rase.

¹¹ Hale a satlui tenna lung kan hei bak a chuan sat ha tho rase, ama ning lunghip ha tok sen nang om rase.

¹² Ajarko, Pathian ko ama a jet ngai chunga a en, hale an lam ngai chunga ajet pe, hale puma ning chuan sat tho luingai ha ko a enda.

¹³ Nang in chuan sat ha na tho jot jarra tu ning mo an na manmang rang?

¹⁴ Han chuan sat na tho jarra an na man pong innom nang ranga i duk ahui ha mo ani! Nang ni ning tu khat om chit maru, nan ning man dong maru.

¹⁵ Tak-ha na lung sunga Pathian ha a thianga siakro, hale chitlejak ha neiro, phat rakip a kan ning chakro, mi ning na chunga Jisu Khrista ranga na lungdo na nei ruia, an na dingkel karra ripe theiro.

¹⁶ Nang in chitlejak neinang lung nem tak a thoro, hale na lung ha man thiangro, ha aninko anmani ning nang ha non tak an na pek karra Pathian nuk jui ngai jiang a satlui chong ri ngaiha an chong ri dan na jak na an mu rang ke.

¹⁷ Ajarko chuan sat a tho a pong na a mu lam asat det chuan salui tho va khodengthei hi Pathian lungdo nimak.

¹⁸ Khrista ning alui thi vei khat jak a thi han chuan sat tho anga siat nei ngai rakip rahut a Pathian jiang tung thei na ranga, a taksa thina alui nei, tak-ha Thavang Thianga ring na ana man nei jui.

¹⁹ Puma ning thavanga achea a jing karra a om thavangngai jiang chongsat ha alui ri jui.

²⁰ A tuan lai Noa phat lai rokuang alui kan ning lai han Pathian ning a sot alui man khang jarra, anmani ning ngak tor luia thavangngai ning ri luingai ma u. Hiva jarra ro kuang sunga mi ka riat jak ning ri an luingai jarra an lui ring.

²¹ Tui han hava anga jet thei na ha ani. Ti ko baptais nan tho jarra san ring na nan mu jui, taksa a chok ha man thiang na rang jak nimak, Jisu Khrista a hong ringkir jarra ani, Pathian jiang adik dik lui jet na ranga lungdo a tok ha ani.

²² Jisu ko vanram ma alui che jui, han Pathian kut chang tiang han a om jui, Thavang Thiangai liana rat na rakip chunga ama a om jui.