1 PITAR 2 - Rabu Athar New Testament (BSI)

A ring Lungpui Le A thiang Yat

¹ Ajarko nangni a satlui rakip, ani lui ngaidon rakip, asat kan rol rakip mi ka lal hale a satlui chong jek rakip bang taru.

² Nai a chang thar naite ngai anga phat rakip a Thavang Thianga tui ral la in ranga om ru. Hivahi nan in karra nang nin nan hong lian rang ke, kan san ring na hi om nan nei rang ke.

³ Pathian chong thiang in a ti nangni ning nan kan jet pumahi iduk a mi lungsiat thei mo ani?

⁴ Hongru ama jiang a ring chak a om lungpui ha mingai ningko dei ma u, tak-ha Pathian mit en na ko a thang sa aman tam tak khat ani,

⁵ Jisu Khrista jarra Pathian jiang lut thei na ranga Thavang ranga kan pek theiru, a thianga Pathian chuan tho ha changru, nang ni nan taksa a ring lungpui anga Thavang Thianga in ha sinru.

⁶ Ajarko hivahi Pathian chong thianga a kan chel, enru kein Zion na lungpui khat ka phun an thang sa a man nei tak Lungpui ha ani, han ama takngai rakip ha ko jak na mu noni u.

⁷ Hiva lungpui hi nang ni ranga a man nei tak ha ani, ajarko nang nin takngairu, tak-ha tak a ngai lui ngaiha ko, in sin pa ning a dei luia nem na om lui lungpui ha, a man tam tak lungpui ha a hongni.

⁸ Chong thiang mun khat hin a ti, hiva lung hin mi kan lum na khat a man chang, ajarko anmani ning an kan lum na hin Pathian chong ha tak a luingai lui jarra ani, hiva ngai hi Pathian lungdo ani anmani ranga.

⁹ Tak-ha nangni ha a jing kar tenna puma ama ning a var na han ana kui, puma ama alian na rakip ha nang ni ri ranga ana thang sa jat phung ha nan ni, puma ranga a ngir mingai ha nan ni.

¹⁰ Phat khat a nangni hi Pathian mi lui nima che u tak-ha, atun ko ama mi nan ni jui, hale phat khat a Pathian lungsiat na ha lui jet ma che u, tak-ha atun ko alungsiat miha nannijui.

Pathian suakngai

¹¹ Ka lungsiat ka sap ngai kein nang ni ha ka na mathem, ramuol chunga khual mi khat anga nan taksa ning a dei ngai ha pek maru, hava ngaiha phat rakip a Thavang ning a jot lui ngaiha ani.

¹² Nan omchan ngaiha asat a om ru, Jatdangngai karra, han anmani ning adik lui nan tho tia an na ri siat in nom, nan chuan sat ha an mu karra Pathian a hong nikhuo han puma manpak nanti.

¹³ Puma ama jiang miring rakip ning an torna na rakip han kan pekru. Rengpa jiang aninom an torna rakip han kan pek rase u.

¹⁴ Puma ning rengpa ham a hong tir, siatna a tho ngai man pong ranga, asat a tho ngai ham manpak ranga ani.

¹⁵ Hivahi Pathian lungdo ani nan chuan sat tho han mi pangngai ham om chian rase u.

¹⁶ Mi thiang khat anga nang ni hi a rong a om ru. Tak-ha a rong a na om ha siatna tianga ko nei man maro han Pathian a suak khat anga omro.

¹⁷ Mirakip hi chitlejak neiro, na u na naingai ha lungsiat petro. Pathian hi chitlejak neiro, hale rengpa ham chitlejak neiro.

Khrista Khodengthei ha khi de na

¹⁸ Nang ni suakngai ning om rengpa chitlejak neiru, anmani jiang nan chit nan jak na ha jet rase u, nang ni asat a ahuia ana tho mi jiang jak ni luia ana man pong mingai jiang om chitlejak neiru.

¹⁹ Ajarko Pathian tianga nan lung a lut jarra ani luia anna man pong khodengthei na rakip chunga Pathian phual ana pek rang ke, ajarko nangni ning Pathian lungdo nan jui ani.

²⁰ Han ani lui adik lui chuan nan tho jarra an na man pong an na ve aninko nang na chuan sat tho ha imo ani? Tak-ha nang in chuan satna tho karra an na man pong aninko Pathian ning na chunga phual na pek nati.

²¹ Hiva jarra nangni hi ana hong kui ani, ajarko Jisu Khrista om pong na alui mu nang ni jarra, nang ni jet thei na ranga, han nang ni ning om hava han jui taru.

²² A ma ning siatna lui tho mak ani luia satlui ite khat a murra a suak lui mu ma u.

²³ A ma jiang non tak an pek karra ama ning om i om lui ti mak, ama jiang pong na an lui pek karra, ama ning ite khat lui man chit mak, hangahan Pathian ning chong jen rase tia Pathian jiang a pek lut.

²⁴ Jisu Khrista a tak tak ning kan siatna ngaiha Khros chunga alui choi, hava jarra kan siatna tenna kan thi rang ha chuan sat, chuan dik jarra ringna kan mu jui, ama a taksa a pop han keini ana man dam jui.

²⁵ Nangni hi belramngai ning lam jet luia an chei anga nan lui ni, tak-ha a tun nan belramsel a nuk jui ranga ana hong kui khir jui, hale nan Thavang ana sel pe pa ha ani.