1 KORINTH 6 - Rabu Athar New Testament (BSI)

Khristianngai karra kan nokna

¹ Nang ni Khristianngai karra khat le khat chunga kan nok na a om karra, ijamo Pathian jet lui mi jiang chong nan man jen mo? Hiva rahut a pathian jet mi jiang chong manjet mo jot mak?

² Pathian mi ning ramuol la chong an jen rang ke tihi nang nin jet ma che u mo? Hale nang nin ramuolla chong nanjen rang aninko, hiva asin tet chong jen ranga matik chami nan nei lui mo?

³ Keinin ning Thavang Thiang om chong kanjen rang asuak tihi nang nin jet ma che u mo? Hiva khel la ri rang a dang om mak.

⁴ Hingahin chong jenna a hong karra nang nin biakrup ani luingai ham nan man kan chel rang mo?

⁵ Jakna mo om mak! Nan karra biakrup mikhat nan sunga chong jen tor mi an lui om rang ke.

⁶ Tak-ha ulenai khat ning ulenai chunga Pathian jet lui mi jiang chong jen a che mo?

⁷ Nang ni khat le khat chunga chong jenna a om hi nang ni sual na khat ani ita mo adik lui ha nan jot pe lui? Nang ni chunga nan kan hunga a om lam sat mak mo?

⁸ Tiko nang ni nan tak masia nan kan huang hin nan u nan naingai ham huang deru!

Pathian lur na ha tak sa ning thoru

⁹ A thianga a om lui ama ning Pathian rengram mu noning tihi nang nin Jetma che u mo? Nangni kan huang maru, omchan salui, kut a sin Pathian ha chubeibuk maru, mi numei en lal maru.

¹⁰ Hale a ruk pham rai siat ju rui, chong ngal ringai ning puma rengram ha mu noni u.

¹¹ Hiva ngaihi nan karra aviar ko an om tak-ha hava ngaiha ko puma Jisu Khrista a thiang Thavang ning a rasuk jui.

¹² keini rang ko irakip tho a jot pet, tak-ha a renga asat pet ko nimak, hava jarra kein ite khat thoa ama suak changa om noning.

¹³ “Bu hi von ranga ani, hale von ning bu ranga ani” Pathian ning a renga ala manmang rang ke, taksa ko omchan salui tho na ranga nimak, Pathian chuan tho na ranga ani, Pathian nom taksa ranga ani.

¹⁴ Pathian in kan puma Jisu Khrista ha thina tenna a kei thui hale ama ranak han keini hi a na kei thui rang ke.

¹⁵ Nang nin nan jet nan taksa aher khat hi Khrista a taksa ha nimak mo? Kein Khrista atak aher khat lui baka numei chukluinu tak chunga ka siak tor rang mo? Hivahi ni thei noning.

¹⁶ Pasal khat ning omchan saluinu le a om karra taksa khat jak anni tihi nang nin jet ma che u mo? Pathian chong thianga alui kan jiak taksa anni ha khat jak chang rang an ni jui.

¹⁷ Pathian le a kan kop, a om ama ha Pathian le lung khat chang nanti.

¹⁸ Omchan salui ha bangru, siatna rakip a tho ama han a taksa mang mak tak-ha numei le omchan salui ache ama ko a tak aman kan mang ani.

¹⁹ Pathian Thavang Thiang ha nan sunga a om tihi nang nin jet ma che u mo? Nan tak sa ha nan thei ja nan ta nimak.

²⁰ Puma ning nang ni ha a man na ana lui chok jui. Hiva jarra nan taksa han Pathian lurna lian na ha thoru.