1 KORINTH 5 - Rabu Athar New Testament (BSI)

Biakinn sunga omchan salui

¹ A thianga omchan salui hi nan karra a om jui tia an ri hingahin omchan salui hi Pathian jet lui mi jak nima u. Ajarko pasal ankhat ning a pa a numei le omchan salui alui che.

² Nanril sunga chong nan jui lui mo nimak? Hiva jarra nan lung a tok rang mo suak mak? A salui a che ama ha nan karra man om maru?

³ Kei ka tak hi nan karra ka om mak nom, ka thavang ko nan karra ka om, nan karra a om khat anga kein chongjen na ka nei ani.

⁴ Puma Jisu Khrista minga hava a salui tho mi chunga, nang nin nan kan chun karra, ka thavang om nan karra a om Jisu Khrista ranak le kan ruaia.

⁵ Nang nin hava miha seitan jiang pekru, a taksa ha manmang rase, tak-ha puma a hong karra a thavang ko aringna lui tho peru.

⁶ Nang nin man kan lian maru. Dei rang om lui omchan aviara a renga a man kanset tiha nang nin nan jet mo nimak?

⁷ A satlui omchan rakip ha man thiang taru, ajarko Jisu Khrista ning na man thiang na ranga a taksa ha a kan pek jui.

⁸ Keinin ningsat a ut ha thotari, a tunna a satlui siat nale an tho ut anga nima rase, lung thianga adik tak a, ningsat na ut ha tho rei.

Om chan Salui a che mingai chunga chong jenna

⁹ Kein Chithi hin ka hong jiak omchan salui ache mingai le kan top maru.

¹⁰ Pathian jet lui kut a sin Pathian chubeibuk hale omchan salui a chea pham rai siat mingai ha mak pet taru kati nimak, havangai nan mak aninko ramuol tenna nan suak rang a suak jui.

¹¹ Kein kati ko hi ani. Tu anga mi khat uh nai tia nan kuia omchan salui a ruk chuan, ju rui, kut a sin Pathian chubeibuk anmaningai le chak chun nek chun maru, om pui maru kati ani.

¹² Kei ija mo biakrup mi ani luingai chunga chong ka jen pe rang? Tak-ha biakrup sunga a om nan mingai chunga chong jen na nan nei pe lui rang mo?

¹³ Pathian in an chunga chong jen pe nati. Biakinn mi ani lui misatlui ngai ko nong suakru.