1 KORINTH 4 - Rabu Athar New Testament (BSI)

Khrista tirlonngai

¹ Keini hi Khrista a tirlon khat tia nang nin na jetru, puma chuan tho ranga a na pek jui.

² Khrista a chuan tho rang lut mak jot lui khat ko, ama hi Pathian chong jui khat ani rang asuak.

³ Atun nang ni ning ijamo nan na en hi? Kei ranga ko a sin chuan khat ani, miring ning om ija mo an na en tihi kei jet making, ka tak tak ning om lui kan en making.

⁴ Kei ning imo ka suaina a om tihi kein kan jet making, tak-ha kein ka suai na a om chil lui leini noning. Pathian in ka chunga ana en chak.

⁵ Hiva jarra puma a hong mak karje chong jenna nei maru, puman ajhinga a om ha a var na han ado rang ke hale an lung rilla an lui ngaidon rakip ha kando na ta mirakip ning Pathian tenna chong pek ha mu nanti.

⁶ Ulenaingai kein hiva ngai hi Apollos le kan jui sua jui nang ni satna ranga. Kan na ripe rakip ha jui taru, hingahin tu khat ning om Apollos ha enda na kei lam na deidet ham om noning.

⁷ Tu ning mo nang ni ha nan kan khel anti? Nang ni jiang a om rakip ha pumman ana pek mo nimak? Ijarra mo Pathian kutchoi ha nan mu bak hin a mu lui anga nan om?

Tirlonngai dan en na

⁸ Nang nin irakip nan mu jui mo nimak? A renga nan nei pet jui mo nimak? Keini buia nang ni hi ring noni che u? Keini om nan reng chang na han kan chel kan ti.

⁹ Ajarko kein ka ngaidon puman keihi a torna tirlon athi ranga ka ni, ajarko ramuolla mi le thavang thiangai ning an na en chak jui.

¹⁰ Khrista jarra kei hi a pang ka ni jui, tak-ha nang niko Khrista jiang nan om hi nan ching, keini ko ranak nei masing tak-ha nang niko nan rat. Nangni ko mai pakna nan mu, keini lam enda ha kan mu.

¹¹ Atun ten nom keini hi von cham, tui ral la mol kan tonga amun khat le a mun khat a anna tuang.

¹² Hale ka kut a chuan ka sin ana kokngai jiang phual ka pek, khodengthei a na pekngai chunga ka lui khang.

¹³ Anamatek mingai jiang lungsiat a ka tho kei niko ramuol chunga a chokmi an pei, an jot lui mi ha kan ni jui.

¹⁴ Kein hingahin ka hong jiak hi nangni jak na rang nimak, ka lungsiat ulenaingai jiang na man chuna ani.

¹⁵ Nang nin Khrista jiang che na ranga lam a tam nan nei nom, nan pa ko tammak. Hiva jarra kein nan pa ka ni jui Jisu Khrista a chongsat jarra.

¹⁶ Kein ka na mathem, kei ka tho anga nang nin om thoru.

¹⁷ Hiva jarra kein Pathian chong jui nai pang Timothi ha nang ni jiang ka hong tir ani. A ma ning biakinn rakip a kein ka tho ka nunchan ngaiha nang ni jiang na ripe nati.

¹⁸ Mi aviar ningko kei hi nang ni phak hong noning tia tak tel luia an lui om.

¹⁹ Tak-ha kei nang ni jiang a rak tak a hong rang ka ni, pathian in a na jot pe inko, hale kein a man kan lian na a om mingai rat na ha i duk mo ani tiha ka jet rang ke.

²⁰ Puma rengram ha ko chong jek han nimak tak-ha ranak han ani.

²¹ Kei hi ija mo nang ni jiang hongro nanti? Kansual kanse le mo, animakle lung nemle a thiang Thavang le mo hongro nanti?