1 KORINTH 15 - Rabu Athar New Testament (BSI)

A thi tenna a thui khir jui

¹ Atunko ulenaingai, kein nang ni jiang, Pathian chongsat ka lui ri ha nan lui jui ja adet a kein ka na manjet ret ani.

² Hiva Pathian chongsat hi nang nin a det a churru, ring na nan mu rang ke, hi animak inko nan takngai na rakip ha a nemna om noning.

³ Hiva jarra kein ka mu chongsat a man tam tak hi a rapatak nang ni jiang ka na pek ani. Ajarko chong thiang alui kan jiak nuk juia Khrista ning siatna jarra ana lui thi pe jui.

⁴ Kan puma an lui that tak-ha Pathian chong thiang nuk juia nithum chang na alui thui khir jui.

⁵ Hale ama han pitar le thiamruai somlei anningai jiang alui kando.

⁶ Hiva suale vei khat jak a mi re ranga khel la u naingai jiang alui kando. Anmani karra a tam lam an la ring, aviar ko an thi jui.

⁷ Hiva suale ama han Jems jiang a man kan mu, hale Pathian tirlon rakip jiang alui mankanmu.

⁸ A torna tak a aphat tung luia nai chang nai pang khat jiang om ama han alui man kan mu.

⁹ Hiva jarra kei ko tirlon karra a sin tak ha ka ni. Tirlon ti a an na kuirang hi om ka rahui chang mak, ajarko kein Pathian biakrupngai ha ka lui manmang.

¹⁰ Tak-ha kein hingahin ka om hi Pathian a mi lungsiat thei jarra ani. Kei chunga a na lungsiat na rakip hi a man bui ko nimak, hiva rahut a a dang tirlonngai nek a kein a khel la chuan ka tho. Kei ka tho chang mak, puma a mi lungsiat ha kei jianga a om jarra ani.

¹¹ Hale kei tenna aninom animakle a dang tirlonngai tenna ani nom, kein in Pathian chongsat kan ri jarra nang nin takngai na nan nei jui.

Thina Tenna Thui khir Rang A suak

¹² Atun kein in Khrista hi thina tenna a thui khir jui ti a chongsat kan ri aninko, ijarra mo mi aviar ning a thi ngaiha thui khir noni u nanti?

¹³ Thina tenna thui khir na a om mak inko, Jisu Khrista om lui thui khir noning.

¹⁴ Khrista hi thina tenna alui thui khir mak aninko, kein in chongsat ha ri nonising hale nang ni om tak nanngai rang suak mak.

¹⁵ Hijak ni lui a kein in Pathian ha leisei kan manchang jui, ajarko pathian in Khrista ha thina tenna a kei thui ti a kan ri, tak-ha adik tak a a thi ngai ha lui kei thui mak.

¹⁶ Ajarko a thi ngai ha a kei thui mak aninko Khrista ham lui kei thui noning.

¹⁷ Hale Khrista ning alui thui khir mak inko, takngai ham a man bui ani jui, a tun tenna nang nin siatna hin nan la om ani.

¹⁸ Hale Khrista jiang takngai na alui nei mi a thi ngai ham thui lai noni u.

¹⁹ Kein Khrista jiang lungdo ka nei hi hiva ringkhuo rang jak aninko, ramuol chunga lungsiat ruaitak ha keini kan ni jui.

Thina Tenna Thi khir Nanti Ati

²⁰ A thianga pathian in Khrista ha thina tenna a kei thui jui. Khrista ning athi ngai karra a rapatak athui ha ani jui.

²¹ Ajarko miring tenna thina a hong jarra miring tenna thui khir na ham a om.

²² Ajarko Adam jarra mirakip thina an nei tak-ha Khrista jarra mirakip thina tenna ring na mu nanti.

²³ Mirakip ning adon don na hong thui khir nanti ajarko Khrista ning a rapatak alui thui jui.

²⁴ A torna phat a hong karra Khrista ning Thavang che na dan han ramuol la ranak a neia salui rakip ha a manmang suale a reng ram ha pa pathian jiang a pek lut rang ani.

²⁵ Puma ning a torna tak a amanmang rang asalui ha ko thina ha ani.

²⁶ Pathian ning irakip hi Khrista ama ke thuaija a siak nom, Pathian a tak tak ko Khrista ke thuija om mak tihi kan jet.

²⁷ Tak-ha irakip Khrista ke thuaija a siak karra. Pathian in a renga ennata a nai Jisu Khrista om a neipu puma Pathian thuaija a om ani.

Thina Tenna A thikhirna Ruia Dingkelna

²⁸ Atunko athi mingai ranga baptais a tho ngaiha ijamo an om rang? Athi ngai han an thui chilmak aninko ijamo anmani ranga baptais an tho ani.

²⁹ Ita mo keini ranga anitin ning dong na rang asuak?

³⁰ Ulenaingai kan puma Jisu Khrista jiang kein nangi ruia lu lianna chong ha ka ri, hale kei ning ama jiang anitin a thianga ka ri ani.

³¹ Miring omchan nuk juia kein Ephesia hin ram sangai le kansaul kanse anga ka lui tho kein imo ka lui mu? Athi ngai ning an thui khir makrang aninko, chaktarei, nektakrei, manhui tarei, ajarko jinga kan thirang ani.

³² Nang ni man kan huang maru. Mi salui omchan ache ngaihi mang na ani.

³³ Nang ni achinga omru, Siatna ha maaktaru, ajarko nan jak na ranga ka ri ani, nan karra Pathian a jet mi mu making.

Thina tenna a hong thui khir ngai tak sa

³⁴ Mi aviar ning anti rang ke, athi ngai ha ijamo an hong thui khir? An taksa ko ijamo ati?

³⁵ Nangni a pangngai! Nang nin nan ling chimu ha athimak aninko ringkhir mak.

³⁶ Nangning naling chimu ha a tak tak ahong suak ranga ling mache. Chimu aninom a dang chimu aninom, hingahin arujak ha naling ani.

³⁷ Tak-ha nang in naling nuk juia, pathian in ngaidon nata chimuru nuk juia akung ngaiha aman mong rang ke.

³⁸ Taksa rakip hi kan chunmak. Miring tak sa khat, sangai taksa khat, vatengai taksa khat, ngangai taksa khat ani.

³⁹ Ramuol la taksa le vanram ma taksa ko a kan khel, hale vanram ma taksa ning ramuol la taksa nek a lurna le varna a neidet.

⁴⁰ Sun na ni ning asat ha atheia ani, hale jan na sortha ning avar ha atheia ani, hale arsingai karra om an sat hi abi binga ani.

⁴¹ Hiva anga athi ngai ning an hong thui khir karra a khel la ansat, ajarko athi tiha om lai noning.

⁴² Athi ngai ha anphum karra, an sual chitlejak rang om mak; athi tenna an hong thui karra akhel la an sat anrat det.

⁴³ Athi ngai anphum karra tak sa anphum ani, an thui khir karra ko Thavang taksa ha ani. Miring taksa a om anga Thavang hin om taksa a om.

⁴⁴ Pathian chong thianga alui kan jaik “Arapa Adam ha ko miring alui ni” Tak-ha atorna Adam hiko thavanga ringkhuo a pek ha aluini.

⁴⁵ Hi aninom Thavang omchan chena ha a rapa a hong nimak, taksa omchan lam a rapa a hong ani hale Thavang omchan ahong ani.

⁴⁶ Arapa miha ko ramuol simlei tenna an sin ani hale anni chang na miha ko vanram tenna a hong ani.

⁴⁷ Ramuol simleia an sin ha ko, ramuol simlei anga ani rang ke, Vanram ma an sin ha ko vanram ma ahong anga anti rang ke.

⁴⁸ Hale kein in sinleija an sin mel kanpua anga vanram ma an sin ngai ham vanram ma asinmel kanpua rang ke.

⁴⁹ Kein ulenaingai jiang ka na ri ani. Taksa le thisen a om mi ning Pathian rengram ha mu tor noni u. Hale a mang thei rang phur han a mang torlui rang phur ha mu tor noning.

Thina tenna thui khirra ningsat na

⁵⁰ Enru, kein chong ruk a thiang tak-ha na ri pek ati. Keini hi thino nising, tak-ha keini kan renga kan kan thul rang ke.

^51-52 Aphat khat jak a, mitsing khat sunga atorna pengkul an hong tum karra, pengkul rasahan athi ngai rakip ha thi lui ranga an hong thui rang ani, hale keini hi ina man kan thul rang ke.

⁵³ Ajarko a mang rang phurning a mang thei lui ranga hale alui thi ngai ning athi torlui ranga ana man kan thul rang ani.

⁵⁴ Amang rang phurning a mang thei lui ranga, athi ngai ning athi torlui ranga an hong kan thul karra, Pathian chong thianga alui om ha adik tak a ahong tung rang ke. Thina ha ama han a lemjui.

Thina ha ama han a tor jui

⁵⁵ O thina, nang na lianna hon mo a om? O thina nang in na manmang torna ranak hon mo a om?

⁵⁶ Thina ranak ha ko siatna tenna ani, hale siatna ranak ha ko che na dan tenna ani.

⁵⁷ Tak-ha pa Pathian ha manpakri. A man thina ana mantor hi kan puma Jisu Khrista jarra ni rase.

⁵⁸ Hiva jarra ka lungsiat ka u ka naingai nang nin Pathian chuan sin na, nan chuan man kan dengru lung lut tak a adet a ngirru. Ajarko Pathian chuan nan tho rakip ha ariam ma mang noning tihi nan jet.