1 KORINTH 13 - Rabu Athar New Testament (BSI)

Lungsiat

¹ Kein chong rakip le thaneithiangngai chong ka jet nom lungsiat ka nei mak inko, keihi a rasa tam thirbell anga ka ni.

² Hale kein Pathian chongringai ranak ka neija, hale a hong suak rang chong rakip ka jet nom, takngai na ka neija chingtum ka man kan thon tor aninom, lungsiat ka nei mak inko kei i om ni making.

³ Kanei rakip ka pek tor aninom, hale ka taksa mei chunga rovam ranga ka jot nom, kein lungsiat ha ka nei mak inko, kei i om ni making.

⁴ Lungsiat ko khang thei ha ani, hale chuan sat ha ani, hale lungsiat ning mi enhalmak hale man kan lian mak.

⁵ A ni lui omchan chemak pham rai tho mak, lung thak nei mak, a salui rakip ha a mak.

⁶ Lungsiat ko anilui chuan dei mak, tak-ha adik han ningsat na a nei.

⁷ Lungsiat ko a renga a choi tor, a renga takngai a renga lungdo a nei, a renga a dui tor.

⁸ Lungsiat ko a mong ti om mak; Pathian chongsiat alui ri ngaiha an lamang rang ke, chong rakip alui jet ngai ha an lamang rang ke, chingna theina ham a mangrang ke.

⁹ Ajarko keini chingna ko aviar jak ke, hale Pathian chong kan ri ham aviar jak ke.

¹⁰ Tak-ha a renga kan jet karra aviar kan jet hi amangrang ke.

¹¹ Kein nai pang kani lai nai pang anga ka lui om, nai pang anga chong ka lui ri, kein ulian kani karra nai pang nun chan ha ka mak.

¹² Ajarko, mel le mel kan kan mu nek a meng sialla kan kan mu lam a thiang a vat det. Atunko aviar jak ka jet ani, tak-ha nuk a ko kein a renga jet rang kani. Ajarko ama han kei hi a thianga a na jet jui.

¹³ Hingahin lungsiat, takngai, lungdo an thum sunga alian chung nung ko lungsiat ha ani.