1 KORINTH 11 - Rabu Athar New Testament (BSI)

¹ Kein Khrista omchan ka lui anga, nang ni om kei nun chan ha luiru.

Biakinn hin numei lukhuna chong pek

² Kein nang ni ha ka na manpak, ajarko irakip a keihi nan na ngaidon hale nang nin chenadan rakip ha nanjutit jarra ka na manpak.

³ Tak-ha kein nang ni jiang ka na manjet jot. Khrista ning pasalngai lu ha ani, hale pasalngai ning numeingai lu ha ani, hale Pathian ning Khrista lu ha ani.

⁴ Pasal ning lam na a nei karra, Pathian chonga a ri karra a lu akhum inko, a lu ha chitlejak neimak.

⁵ Tak-ha numeingai ning lukhum luia lam na an nei animakle Pathian chong an ri inko a lu ha chitlejak neimak. Ajarko ama ha alukok sambuinu le a kan angjui.

⁶ Ajarko numei ning a lu akhum mak inko a sam ha epkok rase, hale a epjot mak inko a lu ha khum rase.

⁷ Pasal lukhum jot mak, ajarko anmanin Pathian mel anga an om hale Pathian lur na ha anni, hingahin numei ning pasal lur na ha anni.

⁸ Ajarko pasal hi numei tenna an sin nimak hale numei ko pasal tenna an lui sin ani.

⁹ Pasal hi numei ranga an lui sin nimak, numei ko pasal ranga an lui sin ani.

¹⁰ Hiva jarra thaneithiangngai jarra numei ning an lukhum rase, pasal thuaija an om ti jet na ani.

¹¹ Hingahin aninom Pathian jiang ko pasal ning om numei chunga e sel jot mak, numei ning om pasal chunga e sel jot mak.

¹² Ajarko numei hi pasal tenna an sin ani tak-ha pasal hi numei tenna nai a hong chang, hale irakip hi Pathian tenna a hong kan thui ani.

¹³ Nan tak nan tak ning chong kanjenru. Numei ning lukhum luia lam na an nei hi adik mo?

¹⁴ Pasal ning a sam asei inko jak na a om tiha atuwnlai tenna alui om sa nimak mo?

¹⁵ Tak-ha numei a sam asei inko, ama ranga lian na ani, ajarko a sam ha a lukhum na ranga alui pek ani.

¹⁶ Hivahi tu ang khat ning a jot mak aninko keini le biakinn che na ni luia che na a dang om mak.

Puma bu Kholai khangna

¹⁷ Athuai chong lam ka na pekngai hin nang nin khat jak chang nan lui om chun ha nan man detna nimak nan mankan setna ani. Hiva jarra kein nang ni ha na lui manpak making.

¹⁸ Ajarko nang nin biakrup khat jak sunga nan lui om lai han, nang nin arup arup a nan lui om ti chong aviar ka jet, hale takngai na om ka lui nei.

¹⁹ Arup arup a nan om tiha ni a jot ajarko nan karra a cham manchejot mingain han midang anmankanjet jot jarra ani.

²⁰ Nang ni nan renga nan kan mu a nan chak chun ha puma le nan chak chun nimak.

²¹ Ajarko nang nin nan kan chun han mirakip ning anta anta an lui chak jui aviar ning ju an lui rui, aviar ning von cham ma an lui om.

²² Hi imo ani? Nang nin chak nek na ranga in neima che u mo? Animakle Pathian in thiang ha nan e sel mo? Animakle chak rang aneiluingai nan manjak mo? Kein nang ni jiang imo ka ri rang? Kein nang ni ha ka na manpak rang mo? Kein na lui manpak making.

²³ Ajarko kein puma jiang ka mu ha nang ni ka na pek ani, puma Jisu ha an lui juarni jan han, tal khat puman a luia.

²⁴ Pathian jiang alui manpak, hale tal ha ametkhuija alui ti, “Hivahi kei ka taksa, nang ni ranga ani, kei nan na ngaidon na ranga chakru”.

²⁵ Hiva ang hin tal an chak suale puma ning kheng kam khat aluiret a alui ti, “Hivahi kei kathisin na Pathian le a tharra kan jot na ha ani. Keina ngaidon thei na ranga nang nin inru”

²⁶ Ajarko hiva tal nan chak a thisen hi nan in karlim, nang nin puma a thina ruia lui riru a hong mak kar je.

²⁷ Tu ang khat ning puma tal le thisen ha chit jak buia a in a chak aninko, ama han puma jiang siatna a tho ani?

²⁸ Mirakip ning an tak a sunga kan ngaidon bak a tal chak rase hale thisen hi in rase.

²⁹ Ajarko ama han puma taksa ka chak hale thisen hi ka in ti a aluimak inko ama chunga chong jen na om nati.

³⁰ Hiva jarra nang nin nannat, nansual, hale mitam nan thi jui.

³¹ keinin kan sunga a rapatak kan lui ngaidon aninko, Pathian kan chunga chong jen noning.

³² Tak-ha puman kan chunga chong anajen inko kein in ramuol siatna mingai le kan ruiaija mangno nising.

³³ Ulenaingai nang nin puma bu kholai khang rang nan hong karra nang nin khat le khat kan ngakru.

³⁴ Tu khat ning a von a cham aninko inna chak nek rase. Nang nin puma le nan chak chun jarra, pathian in nan chunga chong jen ma rase. Adang chong pek ha ko ka hong karra na pek kati.