1 KORINTH 1 - Rabu Athar New Testament (BSI)

¹ Pathian lungdoa a kui suak paul Jisu Khrista tirlon kan u kan nai Sosthenes ning,

² Korinth na a om Pathian biakrup mithiangai Jisu Khrista jianga a om chak amun rakip a ama le a kan ruai mi, kan puma anmani puma an man chang Jisu Khrista chubei abukngai,

³ Kan pa Pathian le puma Jisu Khrista ning nan chunga lunghip le lungsiat theina ha na pek rase.

Jisu Khrista jiang phual a om

⁴ Kei ning phat rakip a nang ni ranga Pathian ka manpak ajarko ama ami lungsiat thei na ha Jisu Khrista tenna nangi Jiang ana pek jui.

⁵ Ajarko nangni Khrista jiang nan om han chong jek thei nale ching thei na nan hong nei jui.

⁶ Jisu Khrista aruia chongsat ha nan chunga a det tak a, a om jui.

⁷ Hava jarra nang nin thavangai kutchoi Jisu Khrista tenna nan lui ngak ha nan mu pet jui.

⁸ A man a torna nikhuo han nom na san na ta Jisu Khrista a hong karra nang ni ha a thianga asuaina buia om nanti.

⁹ Pathian ko takngai rang asuak, nangni hi a nai kan puma Jisu Khrista le om suam ranga a na kui ani.

Biakinn sunga kan senna ruia

¹⁰ U le naingai kein Jisu Khrista minga ka na mathem hi nan renga na jot peru, nan karra kan senna a bing a binga om maru, tak-ha nangni lung khat changa ngaidon khat jak hin om ru.

¹¹ Nangni ruia kloes a mingai ning nan karra kansual kanse a om tia kei jiang an na lui ri jui.

¹² Kein ka jet, nang nin nanti ha, kei Paul jiang ka om, kein Apollos hale kei kephas jiang hale kein Khrista jiang ka om nanti.

¹³ Khrista ning hingahin ana lui man kan sen mo? Paul ham nang ni ranga thing khros chunga alui thi mo, hale paul minga tuilutna nan lui nei mo?

¹⁴ Pathian ka manpak, Krispus le Gaius ni luia tu khat om baptais man tho making.

¹⁵ Tu khat ning om Paul minga tui kan lut ti jot mak.

¹⁶ Hale Stephanas le a insung mingai ko kein baptais ka man tho, a dang ko ngaidon phak making.

¹⁷ Khrista ning keihi baptais man tho ranga na hong tir mak, a chongsat ri ranga ana hong tir ani, hale miring chong jek thei nain ka ri chang mak, Khrista ning khros chunga athi hi anemna bui nimak ti ranga chongsat ka ri ani.

¹⁸ Khrista a chongsat le thing khros chunga athina ha a mangsha mingai rang ko a nem lui ani, tak-ha sanring na a mungai keini rang ko Pathian ranak ani.

¹⁹ Pathian chong thiang hin alui kan jiak kein aching atheingai ching na ha ka manmang rang ke hale a chingngai karra aching tak ha an theia ka siak rang ke.

²⁰ A ching a theingai hon mo an om? Ramuol la chong jek theingai hon mo an om? Pathian in ramuol la ching na thei na ngaiha a nem lui ranga a sin mo nimak?

²¹ Miringngai chingna theina han Pathian jet torna rang ranak lui pek mak a pangngai ning Pathian chongsat an ri ha takngai na a nei mingai sanring rang hi Pathian lungdo ani.

²² A thianga Jiwngai ning jet thei na an lui tok, Grikngai ning chingna theina ha an lui tok.

²³ Keinin Jisu Khrista ha khros chunga alui thi tia kan lui ri ha Jiwngai ranga lung thak na aluini, jatdangai ngai rang lam a nem na bui chong aluini.

²⁴ Tak-ha Pathian le Jisu Khrista ranak jarra Jiw le jatdangai ana lui kui ani.

²⁵ Ajarko puma a pang na han miringngai ching na nek a ala sang, hale Pathian arat mak na ham miringngai ranak nek om ala rat det.

²⁶ Ulenaingai nang ni ana kui ha kan ngaidon ru tiko ramuolla aching athei atam lui om ma u, a tak asat a ratngai ham lui tok mak, anei kan chong ham lui tok mak.

²⁷ Tak-ha puman alui thang suak apangngai ha achingngai le aman kan ang rip, hale arat le asual ham ramuolla aman kan ang rip.

²⁸ Pathian in ramuolla atualla a om miha a kui suak, ajarko ramuolla alian na a omngai ha i manmang rang ke.

²⁹ Tu khat ning om Pathian madonna man kan lian ma rase.

³⁰ Pathian ning nang niha Jisu Khrista jiang ana juang tuang jui, ama hi nan ringkhuo hong suak na ani, Jisu Khrista tenna ama han theina tangbung ha a sin, adik lam ma om na ranga ana manthianga ana sanring jui.

³¹ Pathian chong thiang in hingahin alui kan jiak a man kan lian jot ama ha Pathian jarra man kan lian rase.