1 JOHON 5 - Rabu Athar New Testament (BSI)

Takngai Hi ramuol Ral Tor na A ni

¹ Tu a chang innom Jisu hi Khrista ke tia takngai mi ha Pathian nai ke anni, Pathian lungsiat miha anai ham a lung a siat.

² Pathian na lungsiat le a chong pek ni jui han, Pathian naingai na lungsiat tihi kein in kan jet.

³ Ajarko Pathian chong pek kan jui hi Pathian ha kan lungsiat ani, han a chong pek ngaiha Keini ranga arik phur chang mak.

⁴ Ajarko Pathian naingai rakip ning ramuol hi ral an tor thei ani, keini takngai le kan ruaija ramuol hi kan tor jui.

⁵ Ramuol hi tu ning mo an tor rang? Jisu Pathian nai ke tia tak angaipu mi jak han ramuol ha tor tor nati.

Jisu Khrista Rui Chong Ngir

⁶ Jisu Khrista ha a juanga tuija alui lut han thisen luanga a thi jui ama tuija a hong chang luia tak sa le tui le thi sen hale a bing jak a man kan thianga adik jui ajarko, a thavang ha adik ani,

⁷ Hiva hin shakhi an thum alui om;

⁸ Hava ngaiha ko, Thavang, tui, hale thisen ani, hivalim hi an khat jak anni.

⁹ Keini ning miring chong ngir pek na ha tak kan ngai, tak-ha Pathian chong ngir pek ha angar det ani, hivahi Pathian pasalnai chunga chong ngir pek ha ani.

¹⁰ Hiva jarra; tu a chang innom Pathian pasalnai tak a ngai mi han, a lung sunga hiva chong ngir nahi a nei; tak-ha tu ang aninom Pathian tak a ngai lui mi han Pathian kol la mi leisei ani, ajarko Pathian nin a pasalnai chung changa a rila tak angai lui ani.

¹¹ Hiva jarra keini kum sot ring na a na pek jui, hivahi a pasalnai tenna ring na a hong suak tia jet na ani.

¹² Tu a chang innom a pasalnai a mu mi han ring na an nei jui, tak-ha a pasalnai a mu lui mi han ring na nei noning.

Kum sot a Ring na

¹³ Pathian Pasalnai ha tak nan ngai a nang nin kum sot ring na nan nei jui tihi nan jet thei na ranga kein ki na manjet ani.

¹⁴ Kei ning Pathian lungdo nuk juia kan lam na rakip a na jet pe rang ke tihi kan jet jarra Pathian mai kunga lungam na kan nei.

¹⁵ Keni kan lam nai a man a na jet pe tihi adik tak kan jet tor a chang inko, keinin kan lam na hi ana pek jui tihi kan jet rang ani.

¹⁶ Mi an khat ning a u a nai siatna tho a mua, a siat tho na ha thina rang khan siatna animak inko, ring na Pek na ranga Pathian jiang lam pe rase, hang an han mi han thina tunga siatna ning a ruoi mak na rang ani.

¹⁷ Adik lui chuan tho rakip siatna ani, tak-ha, thina tung na hale tung lui na siatna a om.

¹⁸ Pathian mi a chang sa miha siat nan jom lai noning tihi kein in kan jet, ajarko a satlui an khat han ama siatna a chul mak na rang Pathian pasalnai han a san ring ani.

¹⁹ keini ko Pathian ta kan ni; han ramuol pumpui hin a satmak an khat ning vai ahom nuai a kan om ani tihi keini ning kan jet.

²⁰ keinin adik Pathian ha kan jet na rang, a pasalnai ha a juanga jet na ranga a na pek jui. A pasalnai Jisu Khrista, jarra adik Pathian ha keini kan mu jui. Hivahi Pathian tenna kum sot ring na ha ani.

²¹ Ka naingai, adik lui Pathian tenna nan bing na bing a kan ning theiru.