1 JOHON 4 - Rabu Athar New Testament (BSI)

Adikle Adik lui Thavang

¹ Ka sap manritngai, Thavang rakip takngai maru anmani ha Pathian tenna mo ani tihi dan en sinru ajarko, Pathian chong ri tashanthei tam tak ramuol chung rakip a adik lui tianga an hong suak a anche jui.

² Tak-ha Jisu chunga a jot lui Thavang ha Pathian tenna phut nimak, Khrista a jot lui ha ani, nang ni ning a juang rang chong nan jet ha tun ramuol la a om jui.

³ Tak-ha Jisu chunga a om Thavang hi tu khat ning Pathian tenna nimak a ti inko, ama ning Jisu ha ramuol chunga a hong hi a mu rang ke hale a jet rang ke ani.

⁴ Tak-ha Pathian ta a chang ka naingai, nang nin adik lui tashantheingai ha nan tor jui ani, ajarko nan chunga a om Thavang ha ramuol la a om thavang nek a alian det.

⁵ Ajarko, anmanin ramuol ta an chang jarra, ramuol chong an ri han, ramuol mingain an ngai ani.

⁶ Tak-ha Keini ko Pathian ta ke kan ni, tu ang mi ning kan chong ri a ngai ha Pathian ta ke Pathian ta ani lui mi han kan chong ri ngai ma u. Hingahin thavang adik le dik lui hi keinin kan jet tor ani.

Pathian hi Lungsiat A ni

⁷ Ka sap manritngai, Keini khat le khat kan lungsiat rei, ajarko lungsiat hi Pathian tenna ani, tu ang mi khat ning lungsiat a nei mi ha Pathian nai le Pathian jet ha anni.

⁸ Lungsiat na a nei lui mi ha Pathian jet mak, ajarko Pathian ko lungsiat Pathian ha ani.

⁹ Keini ring na kan nei thei na rang, Pathian ning keini ana lungsiat na a pasalnai an khat jak ramuol chunga ana juang tirpe ani,

¹⁰ lungsiat ha hi ani, keinin Pathian kan lungsiat jui ti ni luia, a man keini ana lungsiat jarra Kan siatna ngai rakip ngaidam na ranga a pasalnai ha a juang tir jui.

¹¹ Ka manrit ka sap ngai Pathian ning hiang khan a na lungsiat a chang inko keini khat le khat kan lung i kan siat rang a suak.

¹² Tu khat in nom Pathian la mu chil ma u, keini an khat le an khat kan lung a kan siat inko. Pathian ning ana om pui chak. Hale puma ama a lungsiat na ha keini jiang lungdo a tung.

¹³ Pathian ning a na pek sa Thavang han, keini Pathian le kan om chun jui Pathian ning keini a na om pui chak tihi kan jet.

¹⁴ Pathian ning a pasalnai ha ramuol san ring na rang a juang tirha Keini ning kan mu jui, hale midangngai jiang om kan ri jui.

¹⁵ Tu a chang innom Jisu Khrista ha Pathian nai ke a ti mi ha Pathian jiang a om, ani han Pathian ning ama jiang a om pui chak.

¹⁶ Keini ruia Pathian lungsiat na a om tihi keinin kan jet hale tak kan ngai, Pathian ko lungsiat ke hiva jarra lungsiat ha a chunga a om chak mi ha Pathian jiang a om chak, Pathian ning a om pui chak.

¹⁷ Hiva ramuol chunga kan ringkho hi Khrista ang khat ka ni jarra chongtan na ni han lung ngam tak kan ngir tor ra lungdo a tung rang hi lungsiat jarra ani.

¹⁸ lungsiat in chit na nei mak, tak-ha lungsiat ha chit na rakip a deng juan, ajarko chit na a nei mi ha lungsiat na han lungdo tung ma, hale tanti an tho rang ha a chit ani.

¹⁹ keini Pathian in a rapa a na lungsiat jarra, keini nom kan lungsiat ani.

²⁰ Tu ang mi an khat in kei Pathian ka lungsiat ti sen lang, a u anai ko a enda ama tir aninko ama ha leisei ke ani, ajarko a man a u anai ngal jom lungsiat lui a amit a mu lui Pathian ha ijamo a lung i siat rang?

²¹ Pathian a lungsiat mi han a u anai ham lungsiat nati tihi puma Khrista tenna chong pek ani.