1 JOHON 2 - Rabu Athar New Testament (BSI)

Khrista keini Na san pu

¹ Ka naingai nang nin siatna nan tho mak na ranga kein nang ni jiang ka jiak ani, miring khat in siatna a tho inko hava ha Pathian jiang ngaidam thei na ranga keini rahut adik chuan tho Jisu Khrista ha kan nei.

² Keini siatna rakip ngaidam na ranga Jisu Khrista ha a om.

³ keini Pathian chong pek ha kan jui inko, ama kan jet jui tia kan kan jet.

⁴ Mi ankhat in Pathian ka jet a ti tak-ha a chong pek a jui mak a chang inko, ama ha leisei ke hale adik ha ama jiang om mak.

⁵ Tak-ha a chong pek jui mi ha ko Pathian lungsiat na han lungdo tunga a sin mi ha a chang jui. Keini Pathian le kan om chun jui.

⁶ Pathian jiang ka om chak a ti mi ha, Jisu Khrista ning alui tho ang han tho chak rase.

⁷ Ka sap lungsiatngai hiva chong pek ki na hong manjet hi a thar nimak; a phut na tenna nan nei chong pek alui sa ha ko, nan lui jet sa chong ngaiha ani.

⁸ Ha aninom a tunna kan na manjet chong pek ngai hi ko a thar ani, hava dik na ha Khrista le nang ni sunga an mu ani, ajarko a jing ha a che sua jui a tun a var asat khet ha a var jui.

⁹ Avarra ka om jui ati mi han a sua pui a u a nai a enda a chang inko, a tun tunga ama ajing karra a la om ani.

¹⁰ A sua pui a u anai a lungsiat mi ha a varra a om ani, a man tute siatna masul na ranga chuan tho mak.

¹¹ Tak-ha a u anai a enda mi ha ko a jing karra a chea a om ani han a jing karra a chea hon ma a jong a chea tung na kan jet mak ajarko a jing in ite man mu mak.

¹² Khrista jarra nan siatna hi a na ngaidam jui hava jarra kein nang ni jiang ka na manjet ani.

¹³ Pangai an phut man lai a phut na tenna alui om ama ha nang nin nan jet jarra kein nang ni jiang ka na manjet ani. Reather, nai pangngai jiang ka jiak ajarko a satlui ha nang nin nan tor jui.

¹⁴ Naipang jiang ka jiak ret ajarko a phut na alui om Pathian ha nang nin nan jet, reathar ngai nang ni jiang ka jiak a ka na manjet ret; ajarko, nang nin Pathian chong ha nan chunga a om chak jarra, a satlui ha kan tor nanti.

¹⁵ Nang nin ramuol le ramuol la om phur ha dei maru. Nang ni ramuol la phur nan dei inko Pathian ha lungsiat mak che u.

¹⁶ Ajarko ramuol la om phur rakip tak sa ning a dei, mit a mu na pal tho man kan lian hingai rakip hi Pathian tenna ahong nimak, hivahi ramuol tenna phut a hong ani.

¹⁷ Ramuol la miringngai ning an dei phur rakip hi ko a lamang rang ke, tak-ha Pathian lungdo tho mi ha ko amongtibuia om nati.

Khrista en dangai

¹⁸ Ka naingai a torna rang pha a nai jui! Khrista en dangai ha hong suak rang anni ti ha an na manjet jui han a tun Khrista enda a tam tak, a hong suak jarra a torna rang pha a nai jui.

¹⁹ Anmani ngaihi keini mi a chang mak jarra, keini tenna an suak an na mak jui. Tak-ha, keini mi aninko keini le kan chun chak kan ti, a tun ko anmani nang ni ta ni maksing tirang jarra an suak jui.

²⁰ Tak-ha nang nin Khrista ning a na juang bunthuan Thavang ha nan lui nei a chang jarra adik ha nan renga nan jet jui.

²¹ Nang nin adik ha jet ma che u tia ki na manjet nimak, nang nin nan jet, hale adik tenna phut leisei i tik om suak mak tihi nan jet.

²² Han ko a leisei mi ha tu mo? Han ko Jisu ha Khrista nimak a ti mi ha ani, hava mi ha Khrista le a kan enda pui mi ha ani. A ma ning Khrista le a pa le a kan enda pui pet ani.

²³ Tu ang mi ning A Pasalnai a jot lui rakip ning A pa mu noning; hale A pa jot lui mi ham A pasalnai ha mu noning.

²⁴ Nang nin a phut na tenna nan lui jet sa chong ha nan lung sunga om pui chakru, a phut na khan na nan lunga nan von a chang inko A pa an khat om A pasalnai jiang om jon jet nanti.

²⁵ Khrista ning keini jiang kum sot ringna na pek rang ama a thei jak a chong sam ke ani.

²⁶ Hivahi nang ni a le lam tiang lam anna kei mak na ranga ka na manjet.

²⁷ Tak-ha nang ni ranga Khrista thavang ha a na bunthuan jui. Thavang ha nan chunga a om lai lim tu in nom na man chu rang hi ngai mak adik ruija le adik lui ruia. Thavang in ana manjet na ngaiha jui nang Khrista jiang om chakru.

²⁸ Ka naingai ama jiang om chakru ha a chang inko, ama a hong kando karra, jak nei lui a lung ngam tak-a om tor nanti.

²⁹ Khrista ko mi dik ke ti a nang nin nan jet, hava jarra adik tho rakip ha tu a chang innom Pathian nai ke anni.