ܪ̈ܗܘܡܝܐ 7 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

ܛܘܦ̮ܣܐ ܡ̣ܢ ܓܒ݂ܪܐ

¹ ܐܲܚܘܿܢܘܵܬ‌ܝܼ̈، ܗܲܡܙܘܼܡܹܐ ܝܘܸܢ ܐܸܠܵܘܟ݂ܘܿܢ ܐܲܝܟ݂ ܐܵܢܝܼ ܕܟܹܐ ܝܵܕܥܝܼ ܢܵܡܘܿܣܵܐ. ܟܹܐ ܝܵܕܥܝܼܬܘܿܢ ܕܢܵܡܘܿܣܵܐ ܐܝܼܬ ܠܹܗ ܫܘܼܠܛܵܢܵܐ ܥܲܠ ܚܲܕ ܐܢܵܫܵܐ ܟܡܵܐ ܕܗ̇ܘ ܐܢܵܫܵܐ ܚܵܝܵܐ ܝܠܹܗ.

² ܩܵܐ ܛܘܼܦ̮ܣܵܐ، ܚܕܵܐ ܒܲܟ݂ܬܵ‌ܐ ܓܒ݂ܝܼܪܬܵ‌ܐ ܐܣܝܼܪܬܵ‌ܐ ܝܠܵܗ̇ ܒܓܲܒ݂ܪܘܼܗ̇ ܟܡܵܐ ܕܓܲܒ݂ܪܘܼܗ̇ ܚܵܝܵܐ ܝܠܹܗ. ܐܝܼܢܵܐ ܐܸܢ ܡܵܐܹܬ ܓܲܒ݂ܪܘܼܗ̇، ܒܸܬ ܦܵܝܫܵܐ ܫܪܝܼܬܵ‌ܐ ܡ̣ܢ ܩܵܢܘܿܢܵܐ ܕܓܒ݂ܵܪܵܐ.

³ ܒܘܼܬ ܐܵܗܵܐ ܐܸܢ ܓܵܒ݂ܪܵܐ ܠܚܲܕ ܐܚܹܪܢܵܐ ܟܲܕ ܓܲܒ݂ܪܘܼܗ̇ ܚܵܝܵܐ ܝܠܹܗ، ܒܸܬ ܦܵܝܫܵܐ ܩܪܝܼܬܵ‌ܐ ܓܲܝܵܪܬܵ‌ܐ. ܐܝܼܢܵܐ ܐܸܢ ܡܵܐܹܬ ܓܲܒ݂ܪܘܼܗ̇، ܦܝܼܫ ܠܵܗ̇ ܫܪܝܼܬܵ‌ܐ ܡ̣ܢ ܩܵܢܘܿܢܵܐ ܘܠܹܐ ܝܠܵܗ̇ ܓܲܝܵܪܬܵ‌ܐ ܐܘܼܦ ܐܸܢ ܕܓܵܒ݂ܪܵܐ ܠܚܲܕ ܐܚܹܪܢܵܐ.

⁴ ܗܵܕܟ݂ܵܐ ܐܘܼܦ ܐܲܚܬܘܿܢ، ܐܲܚܘܿܢܘܵܬ‌ܝܼ̈، ܡܝܼܬ ܠܵܘܟ݂ܘܿܢ ܠܢܵܡܘܿܣܵܐ ܒܝܲܕ ܦܲܓ݂ܪܵܐ ܕܡܫܝܼܚܵܐ ܕܗܵܘܹܝܬܘܿܢ ܠܚܲܕ ܐܚܹܪܢܵܐ، ܗ̇ܘ ܕܩܝܼܡ ܠܹܗ ܡ̣ܢ ܓܵܘ ܡܝܼ̈ܬܹ‌ܐ ܕܝܵܗܒܲܚ ܛܥܘܼܢܝܵܬܹ̈‌ܐ ܠܐܲܠܵܗܵܐ.

⁵ ܐܝܼܡܲܢ ܕܝܼܘܲܚ ܗܘܵܘ ܙܘܼܒܛܸܢܹܐ ܒܟܝܵܢܵܐ ܚܲܛܵܝܵܐ، ܫܲܗܘܲܬܝܵܬܹ̈‌ܐ ܕܚܛܝܼܬܵ‌ܐ ܦܝܼܫܹܐ ܝܗܘܵܘ ܡܘܼܪܥܸܫܹܐ ܓܵܘܲܢ ܒܝܲܕ ܢܵܡܘܿܣܵܐ، ܘܒܸܦܠܵܚܵܐ ܝܗܘܵܘ ܓܵܘ ܗܲܕܵܡܲܢ̈ ܕܡܲܒܪܝܼ ܗܘܵܘ ܡܵܘܬܵ‌ܐ.

⁶ ܐܝܼܢܵܐ ܐܵܕܝܼܵܐ ܦܝܼܫ ܠܲܢ ܫܸܪܝܹܐ ܡ̣ܢ ܢܵܡܘܿܣܵܐ ܣܵܒܵܒ ܡܝܼܬ ܠܲܢ ܠܗ̇ܘ ܕܙܘܼܒܛܸܢܲܢ ܝܼܗܘܵܐ. ܐܵܕܝܼܵܐ ܒܸܥܒ݂ܵܕܵܐ ܝܘܲܚ ܚܸܠܡܲܬ ܒܚܲܕܬܘܼܬܵ‌ܐ ܕܪܘܼܚܵܐ، ܘܠܵܐ ܒܥܲܬܝܼܩܘܼܬܵ‌ܐ ܕܟܬܵܒ݂ܵܐ.

ܦܠܫܐ ܕܠܩܘܒ݂ܠ ܕܚܛܝܬ‌ܐ

⁷ ܡܘܼܕܝܼ ܐܵܡܪܲܚ؟ ܢܵܡܘܿܣܵܐ ܚܛܝܼܬܵ‌ܐ ܝܠܹܗ؟ ܚܵܣ ܠܝܼ. ܠܹܐ ܝܵܕܥܹܢ ܗܘܵܐ ܡܘܼܕܝܼ ܝܗܘܵܐ ܚܛܝܼܬܵ‌ܐ ܐܸܠܵܐ ܒܝܲܕ ܢܵܡܘܿܣܵܐ ܝܕܝܼܥ ܠܝܼ. ܠܹܐ ܝܵܕܥܹܢ ܗܘܵܐ ܡܘܼܕܝܼ ܝܗܘܵܐ ܫܲܗܘܲܬܬܵ‌ܐ ܐܸܢ ܢܵܡܘܿܣܵܐ ܠܵܐ ܐܵܡܹܪ ܗܘܵܐ: ”ܠܵܐ ܫܲܗܘܸܬܸܬ.“

⁸ ܐܝܼܢܵܐ ܚܛܝܼܬܵ‌ܐ ܟܲܕ ܡܘܼܫ݇ܟ̰ܸܚ ܠܵܗ̇ ܥܸܠܬܵ‌ܐ ܒܝܲܕ ܦܘܼܩܕܵܢܵܐ، ܡܘܼܒܪܹܐ ܠܵܗ̇ ܓܵܘܝܼ ܫܲܗܘܲܬܬܵ‌ܐ، ܣܵܒܵܒ ܕܠܵܐ ܢܵܡܘܿܣܵܐ ܚܛܝܼܬܵ‌ܐ ܡܝܼܬܬܵ‌ܐ ܝܠܵܗ̇.

⁹ ܩܲܕܡܵܝܬܵ‌ܐ ܐܵܢܵܐ ܚܵܝܵܐ ܝܘܸܢ ܗܘܵܐ ܕܠܵܐ ܢܵܡܘܿܣܵܐ، ܐܝܼܢܵܐ ܐܝܼܡܲܢ ܕܦܘܼܩܕܵܢܵܐ ܐܬܹ‌ܐ ܠܹܗ، ܚܛܝܼܬܵ‌ܐ ܚܝܹܐ ܠܵܗ̇ ܘܐܵܢܵܐ ܡܝܼܬ ܠܝܼ.

¹⁰ ܣܵܒܵܒ ܦܘܼܩܕܵܢܵܐ ܕܝܼܗܘܵܐ ܩܵܐ ܚܲܝܹ̈ܐ، ܚܙܹܐ ܠܝܼ ܩܵܐ ܡܵܘܬܵ‌ܐ ܝܗܘܵܐ.

¹¹ ܘܚܛܝܼܬܵ‌ܐ ܡܘܼܫ݇ܟ̰ܸܚ ܠܵܗ̇ ܥܸܠܬܵ‌ܐ ܒܦܘܼܩܕܵܢܵܐ، ܥܘܼܠܕܹܐ ܠܵܗ̇ ܐܸܠܝܼ، ܘܩܵܡ ܩܵܛܠܵܐ ܠܝܼ ܒܝܲܕ ܦܘܼܩܕܵܢܵܐ.

¹² ܗܵܕܟ݂ܵܐ ܢܵܡܘܿܣܵܐ ܩܲܕܝܼܫܵܐ ܝܠܹܗ، ܘܦܘܼܩܕܵܢܵܐ ܩܲܕܝܼܫܵܐ ܝܠܹܗ، ܘܟܹܐܢܵܐ، ܘܛܵܒ݂ܵܐ.

¹³ ܒܵܣ ܗ̇ܘ ܕܝܼܗܘܵܐ ܛܵܒ݂ܵܐ ܗܘܹܐ ܠܹܗ ܐܸܠܝܼ ܡܵܘܬܵ‌ܐ؟ ܚܵܣ ܠܝܼ. ܐܝܼܢܵܐ ܚܛܝܼܬܵ‌ܐ ܕܡܲܒܝܸܢܵܐ ܐܲܝܟ݂ ܚܛܝܼܬܵ‌ܐ، ܡܘܼܥܒܸܪܵܗ̇ ܒܝܼܝܼ ܡܵܘܬܵ‌ܐ ܒܝܲܕ ܛܵܒ݂ܬܵ‌ܐ، ܕܗܵܕܟ݂ܵܐ ܒܝܲܕ ܦܘܼܩܕܵܢܵܐ ܚܛܝܼܬܵ‌ܐ ܦܵܝܫܵܐ ܝܕܝܼܥܬܵ‌ܐ ܪܵܒܵܐ ܚܲܛܵܝܬܵ‌ܐ.

¹⁴ ܒܝܼܕܵܥܵܐ ܝܘܲܚ ܕܢܵܡܘܿܣܵܐ ܪܘܼܚܵܢܵܝܵܐ ܝܠܹܗ، ܐܝܼܢܵܐ ܐܵܢܵܐ ܠܹܐ ܝܘܸܢ ܪܘܼܚܵܢܵܝܵܐ، ܙܘܼܒܢܵܐ ܐܲܝܟ݂ ܚܲܕ ܥܲܒ݂ܕܵܐ ܕܚܛܝܼܬܵ‌ܐ.

¹⁵ ܡܸܢܕܝܼ ܕܒܸܥܒ݂ܵܕܵܐ ܝܘܸܢ ܠܹܐ ܝܘܸܢ ܒܝܼܕܵܥܵܐ، ܣܵܒܵܒ ܡܸܢܕܝܼ ܕܒܨܸܒ݂ܝܵܢܝܼ ܝܠܹܗ ܠܹܐ ܝܘܸܢ ܒܸܥܒ݂ܵܕܵܐ، ܐܸܠܵܐ ܡܸܢܕܝܼ ܕܒܸܣܢܵܝܵܐ ܝܘܸܢ، ܗ̇ܘ ܒܸܥܒ݂ܵܕܵܐ ܝܘܸܢ.

¹⁶ ܘܐܸܢ ܒܸܥܒ݂ܵܕܵܐ ܝܘܸܢ ܡܸܢܕܝܼ ܕܠܹܐ ܒܵܥܹܝܢ ܥܵܒ݂ܕܹܢ، ܒܸܣܗܵܕܵܐ ܝܘܸܢ ܕܢܵܡܘܿܣܵܐ ܛܵܒ݂ܵܐ ܝܠܹܗ.

¹⁷ ܡܲܒܝܘܼܢܹܐ ܝܠܵܗ̇ ܕܠܹܐ ܝܘܸܢ ܐܵܢܵܐ ܒܸܥܒ݂ܵܕܵܐ ܗܵܕܟ݂ܵܐ، ܐܸܠܵܐ ܚܛܝܼܬܵ‌ܐ ܕܒܸܥܡܵܪܵܐ ܝܠܵܗ̇ ܒܝܼܝܼ.

¹⁸ ܒܝܼܕܵܥܵܐ ܝܘܸܢ ܕܠܲܝܬ ܡܸܢܕܝܼ ܛܵܒ݂ܵܐ ܒܸܥܡܵܪܵܐ ܒܝܼܝܼ، ܝܲܥܢܹܐ ܓܵܘ ܟܝܵܢܝܼ ܚܲܛܵܝܵܐ، ܣܵܒܵܒ ܒܸܒܥܵܝܵܐ ܝܘܸܢ ܕܥܵܒ݂ܕܹܢ ܛܵܒ݂ܬܵ‌ܐ ܐܝܼܢܵܐ ܠܹܐ ܝܘܸܢ ܡܨܵܝܵܐ ܕܥܵܒ݂ܕܹܢ.

¹⁹ ܣܵܒܵܒ ܛܵܒ݂ܬܵ‌ܐ ܕܒܵܥܹܝܢ ܥܵܒ݂ܕܹܢ ܠܹܐ ܝܘܸܢ ܒܸܥܒ݂ܵܕܵܐ، ܐܸܠܵܐ ܒܝܼܫܬܵ‌ܐ ܕܠܹܐ ܒܵܥܹܝܢ ܥܵܒ݂ܕܹܢ، ܗ̇ܝ ܒܸܥܒ݂ܵܕܘܼܗ̇ ܝܘܸܢ.

²⁰ ܐܸܢ ܒܸܥܒ݂ܵܕܵܐ ܝܘܸܢ ܡܸܢܕܝܼ ܕܠܹܐ ܒܵܥܹܝܢ ܠܸܥܒ݂ܵܕܵܐ، ܠܹܐ ܝܘܸܢ ܐܚܹܪܢܵܐ ܐܵܢܵܐ ܒܸܥܒ݂ܵܕܹܗ ܐܸܠܵܐ ܚܛܝܼܬܵ‌ܐ ܕܒܸܥܡܵܪܵܐ ܝܠܵܗ̇ ܒܝܼܝܼ.

²¹ ܐܵܕܝܼܵܐ ܡܘܼܫ݇ܟ̰ܸܚ ܠܝܼ ܚܲܕ ܢܵܡܘܿܣܵܐ، ܐܝܼܡܲܢ ܕܒܵܥܹܝܢ ܥܵܒ݂ܕܹܢ ܛܵܒ݂ܬܵ‌ܐ، ܒܝܼܫܬܵ‌ܐ ܓܵܘܝܼ ܝܠܵܗ̇.

²² ܒܸܚܕܵܝܵܐ ܝܘܸܢ ܒܢܵܡܘܿܣܵܐ ܕܐܲܠܵܗܵܐ ܕܝܼܠܹܗ ܓܵܘ ܠܸܒܝܼ،

²³ ܐܝܼܢܵܐ ܒܸܚܙܵܝܵܐ ܝܘܸܢ ܚܲܕ ܢܵܡܘܿܣܵܐ ܐܚܹܪܢܵܐ ܓܵܘ ܗܲܕܵܡܹ̈ܐ ܕܦܲܓ݂ܪܝܼ، ܒܸܦܠܵܫܵܐ ܕܲܠܩܘܼܒ݂ܠ ܕܢܵܡܘܿܣܵܐ ܕܪܸܥܝܵܢܝܼ، ܘܒܸܥܒ݂ܵܕܝܼ ܝܠܹܗ ܐܲܣܝܼܪܵܐ ܠܢܵܡܘܿܣܵܐ ܕܚܛܝܼܬܵ‌ܐ ܕܝܼܠܹܗ ܓܵܘ ܗܲܕܵܡܝܼ̈.

²⁴ ܘܵܝ ܥܲܠܝܼ ܒܲܪܢܵܫܵܐ ܫܲܩܝܼ! ܡܵܢܝܼ ܒܸܬ ܦܲܨܹܐ ܠܝܼ ܡ̣ܢ ܐܵܗܵܐ ܦܲܓ݂ܪܵܐ ܡܵܝܘܿܬܵ‌ܐ؟

²⁵ ܫܲܟܘܼܪܹܐ ܝܘܸܢ ܠܐܲܠܵܗܵܐ ܒܝܼܫܘܿܥ ܡܫܝܼܚܵܐ ܡܵܪܲܢ. ܗܵܕܟ݂ܵܐ ܒܪܸܥܝܵܢܝܼ ܥܲܒ݂ܕܵܐ ܝܘܸܢ ܠܢܵܡܘܿܣܵܐ ܕܐܲܠܵܗܵܐ، ܐܝܼܢܵܐ ܒܟܝܵܢܝܼ ܚܲܛܵܝܵܐ ܥܲܒ݂ܕܵܐ ܝܘܸܢ ܠܢܵܡܘܿܣܵܐ ܕܚܛܝܼܬܵ‌ܐ.